މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ/ ވިޒިޓް މޯލްޑިވްސް) އިން ލިވަޕޫލް ފުޓްބޯޅަ ކުލަބުގެ ރާއްޖޭގެ ސަޕޯޓަރުންނަށް ހާއްސަކޮށްގެން ކުރިއަށް ގެންދިޔަ "ޝޯ ޔޯ ރެޑްސް ލޯކަލް" ފޮޓޯ މުބާރާތުގެ ނަސީބުވެރިން ލިވަޕޫލަށް ފުރައިފިއެވެ.
މި މުބާރާތުން މޮޅުވި ދެ ދިވެހިން ކަމަށްވާ އަލީ ޝަހުދު އާއި އަބްދުﷲ އަހްނަފް ވަނީ އެންފީލްޑްގައި ލިވަޕޫލް އެފްސީ އާއި ޓޮޓެންހާމް ބައްދަލުކުރާ މެޗު ބެލުމަށް ހުކުރު ދުވަހު ދަތުރު ފަށައިފައެވެ. މި ދެ ނަސީބުވެރިން ހޮވާފައިވަނީ ފޮޓޯކޮލިޓީ އާއި އޮރިޖިނަލިޓީ އަދި ފޭން ސްޕިރިޓްގެ ޖުމްލަ ޑިސްޕްލޭއަށް ބަލައިގެންނެވެ.
އޭޕްރީލް މަހުގެ 13 އިން 20 އަށް ހަމައެކަނި ދިވެހިންނަށް ހާއްސަކޮށް ތައާރަފްކުރި މި މުބާރާތުގައި އިންސްޓަގްރާމް، ފޭސްބުކް ނުވަތަ ޓްވިޓާގައި ފޮޓޯތައް މެދުވެރިކޮށް ލިވަޕޫލް އެފްސީއަށް އޮތް ލޯބި ހިއްސާކުރުމަށް ސަޕޯޓަރުންނަށް ދައުވަތު ދިނެވެ. ބައިވެރިންނަށް ރަސްމީ އެލްއެފްސީ ގިއާ، ފޭސް ޕެއިންޓް ނުވަތަ ހަނދާންތައް ދައްކާލާ، ހޭޝްޓެގް #ShowYourRedsLocal ބޭނުންކޮށް، ވިޒިޓް މޯލްޑިވްސް އާއި ލިވަޕޫލް އެފްސީގެ ރަސްމީ ޕޭޖްތަކަށް ޓެގްކުރުމަށް އެދުނެވެ.
މި ކެމްޕޭނަކީ ރާއްޖޭގެ އައްސޭރިފަށުން ފެށިގެން އެންފީލްޑްގެ ސްޓޭންޑްތަކާ ހަމައަށް ކުޅިވަރުގެ އެއްބައިވަންތަކަމުގެ ބާރު ދައްކުވައިދިނުމުގައި ލިބުނު މާނަހުރި ކާމިޔާބީއެކެވެ. އަދި ފުޓުބޯޅައަށް ޝައުގުވެރިވާ ފަރާތްތަކުން ޗުއްޓީ ހޭދަކުރުމަށް އެންމެ އެކަށިގެންވާ މަންޒިލުގެ ގޮތުގައި ދިވެހިރާއްޖެ ވަނީ ފާހަގަވެފައެވެ.
މި މުބާރާތަކީ ލިވަޕޫލް އެފްސީއާއެކު ވިޒިޓް މޯލްޑިވްސް އިން ފުޅާ ދާއިރާއެއްގައި ކުރިއަށް ގެންދާ ޕާޓްނާޝިޕްގެ ދަށުން ކުރިއަށް ގެންދާ މުބާރާތެކެވެ. މި ޕާޓްނާޝިޕް އިއުލާނުކުރި ފަހުން ވިޒިޓް މޯލްޑިވްސްއިން ވަނީ އެންމެ ހަފުތާއެއްގެ ތެރޭގައި ސޯޝަލް މީޑިއާގައި 80 މިލިއަނަށް ވުރެ ބޮޑު ރީޗްއެއް ހޯދާފައެވެ.
މީގެ އިތުރުން، މައިއެލްއެފްސީ ފޭން އެޕް މެދުވެރިކޮށް ކުރިއަށް ގެންދާ "ވިން އަ ހޮލިޑޭ ޓު މޯލްޑިވްސް" ކެމްޕެއިނަށް 50،000 އަށް ވުރެ ގިނަ އެންޓްރީ ލިބިފައިވާއިރު، އެ ޕްލެޓްފޯމްގައި މިހާރު ވެސް އަންނަނީ އެންމެ ޖޯޝާއެކު ހިނގާ ކެމްޕޭނެއްގެ ގޮތުގައި ޕާފޯމް ކުރަމުންނެވެ.
