ސުވަރުގެއާއި ނަރަކައަށް ވައްދާނެ މީހުން އިޢުލާން ކުރުމަކީ ދެންތިބި ސިޔާސީ ބޭފުޅުންނަށްވެސް ހުރި ލަދެއް: ވަޒީރު ރާފިޢު

ސުވަރުގެއާއި ނަރަކައަށް ވައްދާނެ މީހުން އިޢުލާން ކުރުމަކީ ދެންތިބި ސިޔާސީ ބޭފުޅުންނަށްވެސް ހުރި ލަދެއް ކަމުގައި ކުޅިވަރާއި ހަށިހެޔޮކަމާ ބެހޭ ވަޒީރު، ޢަބްދުﷲ ރާފިޢު ވިދާޅުވެއްޖެއެވެ. ވަޒީރު މިހެން ވިދާޅުވީ މިއަދު އެކްސްގައި ކުރެއްވި ޕޯސްޓެއްގައެވެ.

ހަސަދަވެރިކަން މިހާގަދަވިޔަސް، ގިޔާމަތްދުވަސް އައުމުގެ ކުރިން، ސުވަރުގެއަށް އަދި ނަރަކައަށް ވައްދާނެމީހުން ކަނޑައަޅާ، އިއުލާންކުރުމަކީ ދެންތިބި ސިޔާސީ ބޭފުޅުންނަށްވެސް ހުރި ލަދުވެތި ކަމެއް! މާތް الله އަޅަމެން އެންމެނަށް ހެޔޮ ރަހުމަތް ލައްވާށި! އާމީން

— Abdulla Rafiu (@AbdhullahRafiu) April 19, 2025

މިގޮތުން އެ ޕޯސްޓުގައި ވަޒީރު ވިދާޅުވީ ހަސަދަވެރިކަން މިހާ ގަދަވިޔަސް، ގިޔާމަތްދުވަސް އައުމުގެ ކުރިން، ސުވަރުގެއަށް އަދި ނަރަކައަށް ވައްދާނެ މީހުން ކަނޑައަޅައި، އިޢުލާންކުރުމަކީ ދެންތިބި ސިޔާސީ ބޭފުޅުންނަށްވެސް ހުރި ލަދުވެތި ކަމެއް ކަމަށެވެ. "މާތް الله އަޅަމެން އެންމެނަށް ހެޔޮ ރަހުމަތް ލައްވާށި! އާމީން"، ވަޒީރުގެ ޕޯސްޓުގައި ވިދާޅުވެފައިވެއެވެ. ވަޒީރު މިހެން ވިދާޅުވެފައި މިވަނީ ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ ޕާޓީ ކަމަށްވާ ޕީޕަލްސް ނޭޝަނަލް ފްރަންޓް (ޕީއެންއެފް) އިން ސިލްސިލާކޮށް ބާއްވަމުން އަންނަ ޖަލްސާތަކުގެ ތެރެއިން، ބުރާސްފަތި ދުވަހުގެ ރޭ ކުރިއަށްގެންދިޔަ ޖަލްސާގައި ކުރީގެ ނައިބު ރައީސް ޑރ. މުޙައްމަދު ޖަމީލް އަޙްމަދު، ރައީސް ޑރ. މުޢިއްޒަށް އަމާޒުކޮށް ދެއްކި ވާހަކައާ ގުޅިގެންނެވެ. މިހާރު ދައުރުވަމުންދާ ވީޑިއޯގައި ޑރ. ޖަމީލް ވިދާޅުވަނީ މަކަރު ހަދާ މީހުންގެ މައްޗަށް ﷲ ސުވަރުގެ ހަރާން ކުރައްވާނެ ކަމަށް ހަދީސްގައި އަންގަވާފައިވާ ކަމަށެވެ.