ރަގަޅު ގިނަ ވަސީލަތްތަކަކާއެކު އަންނަ މަހުގެ އަށްވަނަ ދުވަހު ތެލެސީމިއާ ސެންޓަރުގެ އާ އިމާރާތް ހުޅުވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
މިހާރު މާލޭގައި ހިންގާ ތެލެސީމިއާ ސެންޓަރުގެ ފެންވަރާއި މެދު ހިްހަމަނުޖެހިގެން، އެތަނުން ފަރުވާ ހޯދަމުންދާ ފަރާތްތައް މުޒާހަރާ ކުރުމުން ރައީސް ވަނީ މިދިޔަ މަހު އެތަނުގެ ހާލަތު ބައްލަވާލަން ވަޑައިގެންފަ އެވެ. ހާލަތު ބެއްލެވުމަށްފަހު އެތަން، ހުޅުމާލޭގައި ހުންނަ އޮރެންޖު ހިޔާއަށް ބަދަލުކުރުމުގެ މަސައްކަތް ހަލުވިކޮށް ރައީސްގެ ބެލުމުގެ ދަށުން ކަންކަން ކުރިއަށް ގެންދިއުމަށް ވަނީ ނިންމާފަ އެވެ.
ސިންފައިންނާ ހަވާލުކޮށްގެން ކުރިއަށް ގެންދާ އެ މަސައްކަތް މިމަހުގެ ނިޔަލަށް ނިންމާލެވޭނެ ކަމަށް ރައީސް އިއްޔެ ވަނީ ވިދާޅުވެފަ އެވެ.
"ރައްޔިތުންގެ އަޑު" ޕޮޑްކާސްޓްގައި އެމަނިކުފާނު މިއަދު ވިދާޅުވީ އަންނަ މަހުގެ އަށްވަނަ ދުވަހަކީ ދުނިޔޭގެ ތެލެސީމިއާ ދުވަސްކަމުން، އެ ދުވަހު އާ ސެންޓަރު ހުޅުވުމަށް މަސައްކަތް ކުރައްވަމުން ގެންދަވާ ކަމަށެވެ. އެތަން ހުޅުވާއިރު، މިހާރަށްވުރެ ވަސީލަތާ ހިދުމަތްތައް ވެސް ރަގަޅުވާނެކަން ވެސް ފާހަގަކުރެއްވި އެވެ.
"މިހާރު އަޅުގަނޑު ވާނީ ދަންނަވާފަ ޑީއެންއޭ ޓެސްޓް ކުރާ މެޝިންތަކާ، މިކަހަލަ ބައިވަރު ސާމްޕަލްތައް ބަހައްޓާނެ ތަނުގެ ޖާގަ ވެސް ބޮޑުވާނެ، އެތަނަށް އިތުރު ފްރިޖްތައް ހޯދުމާ މިކަހަލަ ހުރިހާ ކަމެއް ވެސް އެބަ ހިނގާ،" ރައީސް ވިދާޅުވި އެވެ.
ރައީސް ވިދާޅުވީ މިހާރަށްވުރެވެސް ރަނގަޅު ޚިދުމަތްތައް ލިބޭނެ ކަމަށާއި ވަސީލަތުގެ ގޮތުންވެސް ކަންކަން ހަމަޖައްސަވާފައިވާ ކަމަށް އެމަނިކުފާނު ވިދާޅުވިއެވެ.
''ޑީ.އެން.އޭ ޓެސްޓްކުރާނެ މެޝިންތައް ހޯދުމާއި، އެކަހަލަ ވަރަށްގިނަ ސާމްޕަލްތައް ބަހައްޓާނެ ޖާގަވެސް ތަނުގައި ވަރަށްބޮޑުވާނެ. އެތަނަށް އިތުރު ފްރިޖްތައް ހޯދުމާއި، މިކަހަލަ ހުރިހާ ކަމެއްވެސް އެބަ ހިނގާ. ސީނިއަރ ފިޒިޝަނެއްވެސް މިހާރު ފުލްޓައިމްކޮށް މަސައްކަތް ކުރަން ފަށައިފި. އެއީވެސް ވަރަށްގިނަ ދުވަސްވީ ކަމެއް، ނުކުރެވިފައި އޮތް އިނގޭތޯ. ފަސް ނަރުހުން ހޯދުމަށް ހުޅުވާލެވިފައި އެވަނީ. އެކަންވެސް އިރާދަކުރެއްވީތީ ހަމަޖެހިގެން އެދަނީ. އެކަންކަން ދަނީ ވަރަށް ރަނގަޅަށް އިނގޭތޯ" ރަޢީސް ޑރ. މުހައްމަދު މުއިއްޒު ވިދާޅުވިއެވެ.
ތެލެސީމިއާ ސެންޓަރުގެ މަސައްކަތް ސިފައިންނާ ހަވާލުކުރެއްވީ މިއީ ވަރަށް އަވަސް ހައްލެއް ބޭނުންވެފައިވާ މައްސަލައެއް ކަމަށް ރައީސް ވިދާޅުވިއެވެ.
މި މަސައްކަތް ކުރިއަށް ގެންދަނީ އެމްއެންޑީއެފްގެ ސާވިސް ކޯގެ ބެލުމުގެ ދަށުންނެވެ. އެގޮތުން، އެމްއެންޑީއެފް ސާވިސް ކޯގެ މިލިޓަރީ އިންޖިނިއަރުންނާއި އޯވަރޯލްކޮށް މަސައްކަތް ހަވާލުކޮށްގެން ކުރިއަށްގެންދާ މި މަސައްކަތުގައި، އެ އިމާރާތުގެ ކަރަންޓާއި އޭސީގެ މަސައްކަތް، އެމްއެންޑީއެފް އިލެކްޓްރިކަލް އެންޑް މެކޭނިކަލް އިންޖިނިއަރުން ދަނީ ކުރަމުންނެވެ.
ސިފައިން މިމަސައްކަތް ފެށީ މިދިޔަ މަހުގެ 28 ވަނަ ދުވަހުއެވެ.
މި ލިޔުން ކިޔާލުމުން
