ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، އިނގިރޭސިވިލާތަށް ކުރައްވަމުންގެންދަވާ ދަތުރުފުޅުގެ ތެރެއިން ލިވަރޕޫލްގައި ކިޔަވަމުންދާ ދިވެހި ދަރިވަރުންނާ ބައްދަލުކުރައްވައިފިއެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާ ވަނީ ދަރިވަރުންގެ ތަޢުލީމީ ކަންކަން ކުރިއަށްދާ ގޮތާއި، އެ ދަރިވަރުންގެ ތަޖުރިބާތަކާ ގުޅޭގޮތުން މަޝްވަރާކުރައްވާފައެވެ. އަދި މަތީ ތަޢުލީމު ހާސިލުކުރަމުންދާ ދަރިވަރުންނަށް ކުރިމަތިވާ ދަތިތައް ހައްލުކޮށްދެއްވުމުގައި ސަރުކާރުން ޚާއްޞަ ސަމާލުކަމެއް ދެއްވާނެ ކަމުގެ ޔަޤީންކަން ދަރިވަރުންނަށް ދެއްވާފައިވެއެވެ.
"ދިވެހި ދަރިވަރުންނާ މިގޮތަށް ބައްދަލުކޮށްލެވުނީތީ ވަރަށް އުފާވެއްޖެ. އަދި އެ ދަރިވަރުން މަތީ ތަޢުލީމު ހާސިލުކުރުމުގައި ލިބިފައިވާ ކާމިޔާބީތަކާމެދު ފަޚުރުވެރިވޭ،" ރައީސް މުޢިއްޒު ވިދާޅުވިއެވެ. މީގެއިތުރުން ޤައުމުގެ ތަޢުލީމީ ދާއިރާއަށް ކުރިމަތިވެފައިވާ ގޮންޖެހުންތަކާއި، އެކަންކަން ހައްލުކުރުމަށް ސަރުކާރުން އަޅުއްވަމުންގެންދަވާ ފިޔަވަޅުތަކުގެ މަޢުލޫމާތުވެސް ރައީސް ދަރިވަރުންނާ ހިއްސާކުރެއްވިއެވެ.
ރައީސުލްޖުމްހޫރިއްޔާ ރާއްޖެއިން ބޭރަށް ކުރައްވާ ދަތުރުފުޅުތަކުގައި، އެ ޤައުމުތަކުގައި ދިރިއުޅެމުންދާ ދިވެހިންނާއި ކިޔަވަމުންދާ ދަރިވަރުންނާ ބައްދަލުކުރެއްވުމަކީ އިސްކަންދެއްވާ ކަމެކެވެ. މިފަދަ ބައްދަލުވުންތަކުގައި ދިވެހިންނަށް ދިމާވާ ދަތިތަކާއި ގޮންޖެހުންތައް އޮޅުންފިލުއްވައި، އެކަންކަމަށް ހައްލު ހޯއްދަވައިދެއްވުމަށް ރައީސް ޚާއްޞަ އަހައްމިއްޔަތުކަމެއް ދެއްވައެވެ.
މި ލިޔުން ކިޔާލުމުން