އިންޑިއާއިން ރާއްޖެއަށް އެތެރެކުރާ ޒަރޫރީ ބާވަތްތައް ރާއްޖެ އެތެރެކުރަން ކަނޑައަޅައިފައިވާ މިންވަރު އެ ގައުމުން އިތުރުކޮށްދީފިއެވެ.
މިގޮތުން އިންޑިއާގެ ކޮމާސް އެންޑް އިންޑަސްޓްރީ މިނިސްޓްރީން ވަނީ ރާއްޖެއަށް އެކްސްޕޯޓުކުރާ ޒަރޫރީ ކާބޯތަކެތީގެ ބާވަތްތަކާއި، ކޮންސްޓްރަކްޝަން މަސައްކަތަށް ބޭނުންވާ މުދަލުގެ މިންވަރު އިތުރުކޮށްފައެވެ.
އެންމެ ފާހަގަކޮށްލެވޭ އެއް ބަދަލެއްގެ ގޮތުގައި، ހިލައާއި ހިލަވެލި ރާއްޖެއަށް އެކްސްޕޯޓްކުރަން ކަނޑައަޅައިފައިވާ މިންވަރު ވަނީ 30 ޕަސެންޓު އިތުރުކޮށް، 1،300،000 މެޓްރިކް ޓަނަށް އިތުރުކޮށްފައެވެ. މީގެ އިތުރުން ޒަރޫރީ ކާބޯތަކެތީގެ ގިނަ ބާވަތްތަކެއްގެ ކޯޓާވެސް ވަނީ ފަސް ޕަސެންޓުން އިތުރުކޮށްފައެވެ.
އިތުރުކުރެވުނު ކާބޯތަކެތީގެ ތެރޭގައި ބިސް 448،913،750 ކޭސް، އަލުވި 22،589 މެޓްރިކް ޓަން، ފިޔާ 37،537 މެޓްރިކް ޓަން، ހަނޑޫ 130،429 މެޓްރިކް ޓަން، ފުށް 114،621 މެޓްރިކް ޓަން އަދި ހަކުރު 67،719 މެޓްރިކް ޓަން ހިމެނެއެވެ. އަދި މުގު އެތެރެކުރާ މިންވަރު ވަނީ 56 ޕަސެންޓުން އިތުރުކޮށް، 350 މެޓްރިކް ޓަނަށް ބަދަލުކޮށްފައެވެ.
"މިއީ 1981 ވަނަ އަހަރުން ފެށިގެން އަމަލުކުރެވެމުން އަންނަ އެއްބަސްވުމުގެ ދަށުން ކޯޓާގެ އަދަދު އެންމެ ބޮޑަށް އިތުރުކުރެވުނު ފަހަރު" ކަމުގައި އިންޑިއާ ސަރުކާރުން ފާހަގަކޮށްފައިވެއެވެ. މި ބަދަލުތައް ގެނެވިފައިވަނީ ދެ ގައުމުގެ ދެމެދުގައި އޮންނަ ހާއްސަ ގުޅުމުގެ ސަބަބުން ކަމަށް އެ ގައުމުން ބުނެފައިވެއެވެ.
ފާއިތުވި ދެ އަހަރު ދުވަހުގެ ތެރޭގައި ދެ ގައުމުގެ ދެމެދުގައި ހިނގާ ވިޔަފާރި ވަނީ 978.53 މިލިއަން އެމެރިކާ ޑޮލަރަށް އިތުރުވެފައެވެ. މިއީ ދިވެހިރާއްޖެއާއި އިންޑިއާގެ ދެމެދުގައި އޮތް ވިޔަފާރީގެ ގުޅުން އިތުރަށް ހަރުދަނާވަމުން އަންނަކަން ދައްކުވައިދޭ ހެއްކެކެވެ.
މި ލިޔުން ކިޔާލުމުން