ރާއްޖެއިން މިއަހަރު ޒަކާތުގެ ގޮތުގައި ލިބުނު ފައިސާއިން، 500,000 ރުފިޔާ ފަލަސްތީނުގެ ގާޒާގެ ކުޑަކުދިންގެ ކާބޯތަކެއްޗަށް ހަދިޔާކުރަން ނިންމާފައިވާ ކަމަށް އިސްލާމިކް އެފެއާޒް މިނިސްޓްރީން ހާމަކޮށްފިއެވެ.
އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވި ގޮތުގައި، މިއަހަރުގެ ފިތުރު ޒަކާތުގެ ގޮތުގައި ފަގީރުންގެ ދަފުތަރުގައި ހިމެނޭ ކޮންމެ މީހަކަށް 4,500 ރުފިޔާ ވަނީ ޖަމާކޮށްފައެވެ. އަދި މާލެ ސަރަހައްދުގައި ދިރިއުޅޭ ދަފުތަރުގައި ހިމެނޭ ފަރާތްތަކަށް ގޮވާމުން 15 ކިލޯ ބަހާނެ ކަމަށްވެސް އެމަނިކުފާނު ވިދާޅުވިއެވެ.
މިއަހަރަކީ ފުރަތަމަ ފަހަރަށް ފަގީރުންގެ ދަފުތަރުގައި ހިމެނޭ އެންމެންނަށް އެއްހަމައަކުން ފިތުރު ޒަކާތް ބަހަން ނިންމި އަހަރެވެ. މިއީ އިޖްތިމާޢީ އަދާލަތު ޤާއިމުކުރުމުގެ ގޮތުން ގެނެވުނު ބަދަލެއްކަމަށް ވަޒީރު ވަނީ ފާހަގަކުރައްވާފައެވެ. ކުރިން ޒަކާތް ބަހަމުން އައީ އެރަށަކުން ލިބޭ އެއްޗެއް އެރަށެއްގެ ފަގީރުންނަށް ބަހާ އުސޫލުންނެވެ.
"މިހާރު މުޅި ރާއްޖެއަކީ އެއްބައެއްގެ ގޮތުގައި ބަލައިގެން ފިތުރު ޒަކާތް ބެހުމުން، ހުރިހާ ފަގީރުންނަށްވެސް ހަމަހަމަ ގޮތެއްގައި މި އެހީތެރިކަން ލިބިގެންދާނެ،" ވަޒީރު ވިދާޅުވިއެވެ.
ފިތުރު ޒަކާތަކީ ރަމަޟާން މަސް ނިމުމާއެކު ޒަކާތް ޙައްޤުވާ ފަރާތްތަކަށް ދޭންޖެހޭ މާއްދީ އެހީތެރިކަމެކެވެ. މިއީ ހިޖުރައިން 2 ވަނަ އަހަރު ފަރުޟު ކުރެވުނު އަޅުކަމެކެވެ. ކޮންމެ މުސްލިމެއްގެ މައްޗަށް މި ޒަކާތް ދެއްކުން ވާޖިބުވެގެންވެއެވެ.
