މާދަމާއިން ފެށިގެން ސަލްޓަން ޕާކު ބަންދުވާނެ ކަމަށް އިމާރާތްކުރުމާއި، ގެދޮރުވެރިކަމާއި ބިނާރާ ބެހޭ ވުޒާރާއިން ބުނެފިއެވެ.
އެ ވުޒާރާއިން ކުރި އިޢުލާނެއްގައި ބުނެފައިވަނީ 1446 ވަނަ އަހަރުގެ ފިޠުރު ޢީދުގެ މުނާސަބަތުގައި ސަރުކާރުން އިންތިޒާމުކުރައްވާ "ޢީދު ހަވީރު 1446" ގެ ތައްޔާރީތަކަށްޓަކައި، 2025 މާރިޗު 28 ވަނަ ދުވަހުން ފެށިގެން ފިޠުރު ޢީދު ދުވަހާއި ހަމައަށް ސަލްޓަން ޕާކު އާންމުންނަށް ބަންދުކުރެވޭނެ ކަމަށެވެ.
އެ ވުޒާރާއިން މިހެން ބުނެފައިވާއިރު، އެމްއެންޑީއެފުން ބުނީ "ޢީދު ހަވީރު 1446" ގެ ނަމުގައި ފިޠުރު ޢީދުގެ އުފަލުގައި ޢާއިލާތައް އެކުވެރި މާހައުލެއްގައި ބައްދަލުވެ ޢީދު ސަލާންކޮށް ހިތްހަމަޖެހޭ މާހައުލެއްގައި ވަގުތު ހޭދަކޮށްލުމުގެ ގޮތުން، ފިޠުރު ޢީދު ދުވަހުގެ ހަވީރު މާލޭގައި ޚާއްޞަ ހަރަކާތެއް އޮންނާނެ ކަމަށެވެ.
މިގޮތުން ޢީދު ހަވީރު 1446 އޮންނާނީ މާލޭ ސަލްޓަން ޕާކުން ފެށިގެން އިސްލާމީ މަރުކަޒު މައިދާނާއި، ޖުމްހޫރީ މައިދާނާއި، ރަސްމީ ބޮޑު ފާލަމުގެ ސަރަހައްދު ހިމެނޭހެން އެކަމަށް ތައްޔާރުކުރެވިފައިވާ ބޮޑު ސަރަހައްދެއްގައި ކަމަށާއި، މި ސަރަހައްދުގައި ޢީދު ހަވީރަށް ޒިޔާރަތްކުރާ ހުރިހާ ޢާއިލާތަކަށް މަޑުކޮށްލައިގެން ތިބެވޭނެ އިންތިޒާމާއި، ޢީދު އުފަލުގައި ބާއްވާ އެކި ކުޅިވަރުތަކުގައި ބައިވެރިވުމުގެ އިންތިޒާމު ހަމަޖެހިފައިވާނެ ކަމަށް އެމްއެންޑީއެފުން ބުންޏެވެ. އަދި މުނިފޫހިފިލުވުމުގެ ތަފާތު އައިޓަމްތަކާއި ޢީދު ހަދިޔާ ދިނުންވެސް ޢީދު ހަވީރުގައި ކުރިއަށްދާނެ ކަމަށް އެމްއެންޑީއެފުން ބުނެއެވެ.
މިއީ ސިފައިންނާއި ފުލުހުން އަދި ސަރުކާރު ހިއްސާވާ ކުންފުނިތައް ގުޅިގެން އިންތިޒާމުކުރާ ހަވީރެކެވެ. މި ހަވީރުގައި ބައިވެރިވުމުގެ ދަޢުވަތު އެމްއެންޑީއެފުން ވަނީ ހުރިހާ ޢާއިލާތަކަށްވެސް އަރުވައިފައެވެ. އެ މުއައްސަސާއިން ބުނެފައިވާ ގޮތުގައި ކުޑަކުދިންނާއި ބެލެނިވެރިންނާއެކު ޢީދު ހަވީރުގައި ބައިވެރިވެ، ޢާއިލާތައް ބައްދަލުވެ އުފާ ފާޅުކުރުމުގެ ފުރުސަތު ހުރިހާ ރައްޔިތުންނަށްވެސް ވަނީ ހުޅުވާލައިފައެވެ.
އެމްއެންޑީއެފުން ބުނީ މާލޭގައި މިފަދަ ޢީދު ހަވީރެއް ސަރުކާރުގެ އިދާރާތައް ގުޅިގެން އިންތިޒާމުކުރުމުގެ އެންމެ ބޮޑު ބޭނުމަކީ، އިސްލާމީ މި މުހިންމު މުނާސަބާގެ އުފަލުގައި ވީހައި ގިނަ ދިވެހި ޢާއިލާތަކެއް އެއް ތަނަކުން ބައްދަލުވެ، އިޖުތިމާޢީ ރޫހޫ އާލާކުރުން ކަމަށާއި، ވަކިން ޚާއްޞަކޮށް ކުޑަކުދިންނަށް ޢީދުގެ އުފާވެރިކަން ބޮޑަށް އިޙްސާސްކޮށްދިނުން ކަމަށެވެ. އަދި ޒަމާނުއްސުރެ ކޮންމެ ޢީދެއްގައި ދިވެހިންގެ މެދުގައި އޮތް އެއް ބަޔަކު އަނެއް ބަޔަކާ ބައްދަލުވެ ސަލާންގަލާންކޮށް، މުނިފޫހިފިލުވައި ހަދިޔާ ބަދަލުކުރުން ފަދަ ރީތި އާދަތަކަށް ދިރުން ގެނެސްދިނުން ކަމަށްވެސް އެމްއެންޑީއެފުން ބުންޏެވެ.
މީގެ އިތުރުން އެ މުއައްސަސާއިން ބުނީ މި ފަހަރުގެ ޢީދު ހަވީރު ކުރިއަށްދާނީ ކުޑަކުދިން ގަޔާވާ ވަރަށް ގިނަ ކަންކަން ހިމަނައިގެން ކަމަށާއި، އެކި ފަންނުވެރިންގެ ރީތި ހުށަހެޅުންތަކުގެ އިތުރުން ކުޅިވަރު ކުޅުމާއި، ޚާއްޞަ އެކި ފަރާތްތަކާ ބައްދަލުވުމުގެ ހަނދާނީ ވަގުތުކޮޅުތަކާވެސް އެކު ކަމަށެވެ.
ޢީދު ހަވީރު ކުރިއަށްދާނީ ފިޠުރު ޢީދު ދުވަހުގެ ހަވީރު 4:00 އިން 6:00 އަށެވެ.
މި ލިޔުން ކިޔާލުމުން
