މަސްތުވާތަކެތި ބޭނުންކުރާ މީހުންނަށް ފަރުވާދިނުމުގެ މަސައްކަތްކުރަމުން އަންނަ ހިންމަފުށީ ރިހެބިލިޓޭޝަން ސެންޓަރުގެ ޖާގަ 500 މީހުންނަށް އިތުރުކުރުމުގެ މަސައްކަތް ކުރިއަށްދާ ކަމަށް ނޭޝަނަލް ޑްރަގް އެޖެންސީ (އެންޑީއޭ) އިން ބުނެފިއެވެ. މިހާރު އެ ސެންޓަރުގައި ހުރީ 200 މީހުންގެ ޖާގައެވެ.
"450 ޖާގަ ޚާއްސަކުރަނީ ފަރުވާއަށް ބޭނުންވާ ކުދިންނަށް. ބާކީ 50 ޖާގަ ޚާއްސަކުރަނީ ޑުއަލް ޑައިގްނޯސިސް ނުވަތަ ޚާއްސަ އެހީއަށް ބޭނުންވާ ކުދިންނަށް. ދާޚިލީ ވުޒާރާގެ ބަޖެޓުގެ ތެރެއިން މަސައްކަތް ކުރިއަށްދަނީ،" އެންޑީއޭގެ އެކްޓިން ސީއީއޯ މުޙައްމަދު ރާޝިދު ވިދާޅުވިއެވެ.
ފާއިތުވި ތަނުގައި މަސްތުވާތަކެތީގެ ފަރުވާދޭ މަރުކަޒުތައް އިތުރުކޮށް، އެ ތަންތަނުގެ ޚިދުމަތުގެ ފެންވަރު ރަނގަޅުކުރުމަށް އެކަށީގެންވާ މަސައްކަތްތަކެއް ކުރެވިފައި ނުވާކަން ރާޝިދު ފާހަގަކުރެއްވިއެވެ. އެހެންކަމުން މި ސަރުކާރުން ވަނީ އެ ތަންތަން މަރާމާތުކޮށް ފަރުވާ ދެވޭނެ ޖާގަ އިތުރުކުރުމުގެ ގިނަ މަސައްކަތްތަކެއް ފަށާފައެވެ.
1997 ވަނަ އަހަރު ހުޅުވުނު ހިންމަފުށީ ޑްރަގް ޓްރީޓްމެންޓް އެންޑް ރިހެބިލިޓޭޝަން ސެންޓަރަށް 28 އަހަރު ފާއިތުވެގެން ދިޔައިރުވެސް ތަނުގެ މަރާމާތަށާއި ޖާގަ އިތުރުކުރުމަށް މަސައްކަތްތަކެއް ކުރެވިފައި ނުވާކަން އެންޑީއޭއިން ފާހަގަކުރެއެވެ. ސަރުކާރުން ނިންމާފައިވަނީ މި ދައުރުގައި އެ ޖާގަ 1,000 މީހުންގެ ޖާގައަށް އިތުރުކުރުމަށެވެ.
ރާއްޖޭގައި މިހާރު ހުރި 6 ޑްރަގް ރީހެބިލިޓޭޝަން ސެންޓަރުން އެއްފަހަރާ ފަރުވާ ދެވެނީ ގާތްގަނޑަކަށް 570 އެއްހާ މީހުންނަށެވެ. އެންޑީއޭއިން ހާމަކޮށްފައިވާ އެންމެ ފަހުގެ މަޢުލޫމާތުތަކުން އެނގޭ ގޮތުގައި ފަރުވާއަށް ޙުކުމްކޮށް ފަރުވާ ދޭން ނުފެށި 100 އެއްހާ މީހުން މިހާރުވެސް އެބަތިއްބެވެ.
މި ލިޔުން ކިޔާލުމުން
