Tuesday, November 17
ސީއެސްސީގެ ނައިބު ރައީސް އިސްތިއުފާ ދެއްވައިފި
ސިވިލް ސަރވިސް ކޮމިޝަން (ސީއެސްސީ) ގެ ނައިބު ރައީސްގެ މަޤާމުގައި ހުންނެވި އިބްރާހިމް ރަޝީދު މަގާމުން ވަކިކުރުމުގެ މަރުހަލާ ފެށުމަށް ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން ފާސްކޮށްފައި ވަނިކޮށް، އޭނާ އެ މަޤާމުން މިއަދު އިސްތިއުފާ ދެއްވައިފިއެވެ. އިބްރާހީމް ރަޝީދު އިސްތިއުފާ ދެއްވުމާ ގުޅިގެން ސީއެސްސީން ވަނީ އޭނާ އެ ކޮމިޝަނަށް ކޮށްދެއްވި ޚިދުމަތްތަކުގެ އަގުވަޒަންކޮށް ޝުކުރު ދަންނަވައި އެކްސްގައި ޕޯސްޓެއް ކޮށްފައެވެ. އިއްޔެ ބޭއްވި ކޮމިޓީ ބައްދަލުވުމުގައި އިބްރާހިމް ރަޝީދު މަގާމުން ވަކިކުރުމުގެ މަރުހަލާ ފެށުމަށް ހުށަހެޅުއްވީ ޕީއެންސީ ޕީޖީގެ ނައިބު ލީޑަރު، ހުޅުދޫ ދާއިރާގެ މެންބަރު މުހައްމަދު ޝާހިދު (ޝާޑު) އެވެ. ކޮމިޓީގެ މުގައްރިރު، މާފުށި ދާއިރާގެ މެންބަރު ހުސައިން ރިޒާ ވިދާޅުވި ގޮތުގައި މި ހުށަހެޅުމަށް އިއުތިރާޒުކުރެއްވީ ހަމައެކަނި ގަލޮޅު ދެކުނު ދާއިރާގެ މެންބަރު މީކާއިލް އަހްމަދު ނަސީމެވެ. ނަމަވެސް މި މައްސަލައިގައި ކުރެވޭ ތުހުމަތުތަކާއި ތަފްސީލުތައް ހާމަކުރުމަކާ ނުލައި، މެންބަރުން މަޝްވަރާކުރެއްވީ ނުރަސްމީކޮށް މައިކް އޮފްކޮށްލައިގެންނެވެ. ކޮމިޓީގެ މެންބަރަކު ވަނީ މިއީ ސީއެސްސީގެ ނައިބު ރައީސް އިބްރާހިމް ރަޝީދު މަގާމުން ވަކިކުރުމާ ގުޅޭ މައްސަލައެއްކަން ކަށަވަރުކޮށްދެއްވާފައެވެ. އިބްރާހިމް ރަޝީދަކީ ކުރީގެ ރައީސް އިބްރާހިމް މުހައްމަދު ސޯލިހްގެ ވެރިކަމުގައި، 2020 ވަނަ އަހަރުގެ ސެޕްޓެމްބަރު މަހު ސިވިލް ސަރވިސް ކޮމިޝަނަށް އައްޔަންކުރެވުނު ބޭފުޅެކެވެ.

މި ލިޔުން ކިޔާލުމުން

Like
Love
Ah Ah
Wow
Sad
ކިޔުންތެރިންގެ ހިޔާލު