Wednesday, November 18
އީސީގެ ރައީސަކަށް ޒާހިދު އަދި ނައިބަކަށް ޞަލާޙް ޢައްޔަންކުރަން ރުހުންދީފި

އިލެކްޝަންސް ކޮމިޝަން (އީސީ) ގެ ރައީސާއި ނައިބު ރައީސްގެ މަޤާމަށް ޢައްޔަންކުރުމަށް ރައީސް ޑރ. މުޙައްމަދު މުޢިއްޒު މަޖިލީހަށް ހުށަހެޅުއްވި ދެ ބޭފުޅުންނަށް މަޖިލީހުން މިއަދު ރުހުން ދީފިއެވެ.

އީސީގެ ރައީސްކަމަށް ޢައްޔަންކުރެއްވުމަށް ރައީސް ހުށަހަޅުއްވާފައިވަނީ އެ ކޮމިޝަންގެ މެންބަރު މުޙައްމަދު ޒާހިދު ދަފްތަރު ނަންބަރު ރސ 1548 ގެ ނަންފުޅެވެ. އަދި ނައިބު ރައީސްކަމަށް ޢައްޔަންކުރެއްވުމަށް ހުށަހަޅުއްވާފައިވަނީ ޢަބްދުއްރަޙްމާން ޞަލާޙް ރަޝީދު ރޯޒް/ކ.ހުރާ އެވެ.

އީސީގެ ރައީސް ކަމަށް ޒާހިދު ޢައްޔަންކުރަން ފާސްވީ 68 މެންބަރުންގެ އިއްތިފާޤުންނެވެ. އަދި ޞަލާޙް އެ ކޮމިޝަންގެ ނައިބު ރައީސަކަށް ޢައްޔަންކުރަން ފެންނަ ކަމަށް 69 މެންބަރުން ވަނީ ވޯޓު ދެއްވައިފައެވެ.

ޒާހިދާއި ޞަލާޙް އީސީގެ މެންބަރުކަމަށް ޢައްޔަންކުރެއްވީ މިދިޔަ މަހުގެ 26 ވަނަ ދުވަހުއެވެ. އޭސީސީގެ މެންބަރުކަމުގެ ދެ މަޤާމެއް ހުސްވީ އެ ކޮމިޝަނުގެ ކުރީގެ ނައިބު ރައީސް ޢަބްދުއްސަލާމާއި، މެންބަރު ޠާހާ މުޙައްމަދު މަގާމުން ވަކިކުރުމަށް މަޖިލީހުގެ ކޮމިޓީން ނިންމާފައިވަނިކޮށް އެ ދެ ބޭފުޅުން އަމިއްލައަށް އިސްތިއުފާ ދެއްވުމާ ގުޅިގެންނެވެ.

ޒާހިދަކީ ކުރިން ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗް.އާރް.ސީ.އެމް) ގެ ނައިބު ރައީސްކަމާއި، ޖެންޑަރ މިނިސްޓްރީގެ ޑެޕިއުޓީ މިނިސްޓަރުގެ މަޤާމު އަދާކުރައްވާފައިވާ ބޭފުޅެކެވެ.

އަދި ޞަލާޙަކީ އީސީގެ ސެކްރެޓަރީ ޖެނެރަލްގެ މަޤާމާއި ދާޚިލީ ސަލާމަތާއި ފަންނިއްޔާތާ ބެހޭ ވުޒާރާގެ ޕަރމަނަންޓް ސެކްރެޓަރީގެ މަޤާމު އަދާކުރައްވައިފައެވެ.

މި ލިޔުން ކިޔާލުމުން

Like
Love
Ah Ah
Wow
Sad
ކިޔުންތެރިންގެ ހިޔާލު