"މައިންޑްފުލް ރަމަޟާން" ތާނަ ބަހުން ލިޔެފައިވާ ބެކްޑްރޮޕަށް ކިޔާ ފާޑުކިޔުންތަކަށް އިސްލާމީ ކަންތައްތަކާ ބެހޭ ވުޒާރާގެ ވަޒީރު ޑރ. މުހައްމަދު ޝަހީމް އަލީ ސަޢީދު ރައްދު ދެއްވައިފިއެވެ.
އެމަނިކުފާނުގެ ފޭސްބުކްގައި ހިއްސާކުރެއްވި ޕޯސްޓެއްގައި ވިދާޅުވެފައިވަނީ ކަންބޮޑުވުން ހުރި ކަންކަން ހައްލު ކުރައްވާނެ ކަމަށެވެ.
ހަމަ އެއާއެކު އެމަނިކުފާނު ވަނީ ފާޑު ކިޔާ އެންމެންގެ ނަން ފޭސްބުކުގައި ލިޔެފައި ހުރީ ފަރަންޖީ އަކުރުން ކަމަށް ވިދާޅުވެ އެމީހުންގެ ނަންތައް ތާނަ އަކުރުން ނުލިޔަނީ ކީއްވެތޯ ސުވާލު ކުރައްވާފައެވެ.
"ފާޑު ކިޔާ އެންމެންގެ ނަން ފޭސްބުކުގައި ލިޔެފައި ހުރީ ފަރަންޖީ އަކުރުން. ކީއްވެބާ އެމީހުންގެ ނަންތައް ތާނަ އަކުރުން ނުލިޔަނީ. ގައިމު ތާނަ އަކުރުން ލިޔެވޭނެ."
ޑރ. ޝަހީމް ވިދާޅުވެފައިވެއެވެ.
އެމަނިކުފާނު އިތުރަށް ވިދާޅުވެފައިވަނީ ޒުވާން ކުދިން ތަކަކަށް ކުރެވޭ ކަމަކަށް އިސްތިޢުމާރުވެފައި ތިބި ބައެއްގެ ގޮތުގައި ސިފަކޮށް ރައްދުދީ ހެދުން އެހާ ބަލައިނުގަނެވޭ ކަމަށާއި ކަންކަން އިސްލާހު ކުރަން ހެޔޮ ނަސޭހަތް ދެއްވުން މުހިންމު ކަމަށެވެ.
