މިޑިޔާ ރެގިއުލޭޓްކުރުމާބެހޭ ގޮތުން ސަންއޮންލައިންއަށް ދިން އިންޓަރވިއުގައި ދެއްކި ވާހަކަ ބައެއް މީޑިއާ ތަކުން ފަތުރަމުން ދަނީ ވާހަކައިގެ ހަޤީޤީ މަފްޙޫމް އޮޅުން އަރާފަދަ ގޮތަކަށް ކަމަށް ރައްޔިތުންގެ މަޖިލީހުގެ ނައިބް ރައީސް އަހުމަދު ނާޒިމް މިއަދު ވިދާޅުވެއްޖެ އެވެ.
އެމަނިކުފާނަކީ އެއްވެސް ޒަމާނެއްގައި މިނިވަން މީޑިއާއާއި ދެކޮޅު ފަރާތެއް ނޫން ކަމަށް ބުނެ އެކްސްގައި ނާޒިމް ހިއްސާ ކުރެއްވި ބަޔާނެއްގައި ބުނީ މީޑިއާއަށް ހުރަސް އަޅަން ދުވަހަކުވެސް ތާއީދު ކޮށްފައި ނުވާނެ ކަމަށެވެ.
ނާޒިމް ވިދާޅުވީ މީޑިއާތައް ރެގިއުލޭޓްކުރަން އުފައްދާފައިވާ ދެ މުއައްސަސާވެސް އެންމެ ފުރިހަމަ ގޮތުގައި ހިނގަމުން ނުދާކަން ހުދު މީޑިއާތައްވެސް ގަބޫލުކުރާ ކަމަށެވެ. އެެއީ ދައުލަތުގެ ރިސޯސްތައް ޑުޕްލިކޭޓްވުމުގެ އިތުރުން ނަތީއްޖާ ނުނެރެވޭ ފަދަ ގޮތަކަށް އޮތް 2 މުއައްސަސާކަން ފާހަގަކުރައްވައި ނާޒިމް ވިދާޅުވީ 2024 ވަނަ އަހަރުގެ ބަޖެޓުންވެސް އެ ދެ މުއައްސަސާއަށް ދައުލަތުން 18 މިލިއަން ރުފިޔާ ހޭދަކޮށްފައިވާ ކަމަށެވެ.
އެމަނިކުފާނު ވިދާޅުވީ އެމަނިކުފާނުގެ މަގްސަދަކީ މި ފަދަ ދޯހަޅިކޮށް ހުރި މުއައްސަސާތައް ރިފޯމްކުރުން ކަމަށާއި އަދި މީޑީއާތަކުންވެސް ބޭނުންވަނީ ހަގީގީ ބެލެނިވެރި ފަރާތަކީ ކޮބައިތޯ ދެނެގަތުން ކަމަށެވެ.
އަދި ހަމައެއާއެކު މީޑިއާތަކުން ބޭނުންވަނީ އެ މީހުންގެ ހައްގުގައި އަޑުއުފުލާނެ ހަގީގީ ބާރުވެރި ފަރާތެއްކަން ޔަގީންކޮށް ކަށަވަރުކުރުން ކަމަށްވެސް ނާޒިމް ވިދާޅުވިއެވެ.
ނާޒިމް އިތުރަށް ވިދާޅުވީ މި ފަހަކަށް އައިސް ސޯޝަލް މިޑިއާގެ އެކި ޕްލެޓްފޯމްތައް ޒުވާނުން ބޭނުންކުރާ މިންވަރު ވަރަށް ބޮޑަށް އިތުރުވެފައިވާއިރު ޒުވާނުން މުނިފޫހިފިލުވުމުގެ އިތުރުން އާމްދަނީ ހޯދުމާއި އެމީހުން ޝުއުރޫތައް ފާޅުކުރާ އެންމެ ވަރުގަދަ ވަސީލަތަކަށް ޝޯޝަލް މިޑިއާ ވެފައިވާ ކަމަށެވެ.
އެހެންކަމުން އެ ޕްލެޓްފޯމްތައް ރެގިއުލޭޓްކުރުމަކީ މުހިއްމުކަމެއްކަަން ހުރިހާ ފަރާތުން އެއްބަސްވެލައްވާނެ ކަމާއި، އެއީ އެއްވެސް ހާލަތެއްގައި އެފަދަ މަންސަތައް ބްލޮކްކޮށް ނުވަތަ މީޑިއާގެ މިނިވަންކަން ނިގުޅައިގަތުން ނޫން ކަމަށް ނާޒިމް ވިދާޅުވިއެވެ.
މީޑިއާ އާއި އިންޓަނެޓް ރެގިއުލޭޓްކުރާ ބިލެއް މަޖިލީހަށް ހުށަހެޅުމަށް ތައްޔާރުވަމުންދާ ކަމަށް ނާޒިމް ވިދާޅުވުމާ ގުޅިގެން ކަންބޮޑުވުންތަކެއް ވަނީ އުފެދިފަ އެވެ.
އެ ބިލުގެ ސަބަބުން މީޑިއާގެ މިނިވަންކަން ގެއްލޭނެ ކަމަށްވެސް އެއްބަޔަކު ދެކެ އެވެ.
މި ލިޔުން ކިޔާލުމުން
