ނުފޫޒާއި ބާރު ބޭނުންކޮށްގެން ނާޖާއިޒު ގޮތުގައި އާންމު ފަރުދުންގެ މުދަލުންނާއި ދައުލަތުގެ މުދަލުން ތަނަވަސްކަން ހޯދުމަކީ ޙަރާމް ކަމެއް ކަމުގައި މިއަދުގެ ހުކުތު ޚުޠުބާގައި ވިދާޅުވެއްޖެއެވެ.
މިއަދުގެ ޚުޠުބާގެ މައުޟޫޢަކީ "ބާޠިލް ގޮތުގައި މުދާ ކެއުން" އެވެ.
މިއަދު ޚުޠުބާގައި ވިދާޅުވީ އިސްލާމް ދީނުގައި މުދާ ހޯދުމަށާއި މުދާ ހޭދަކުރުމަށް ހަރުދަނާ ނިޒާމެއް ލައްވާފައިވާ ކަމަށާއި، އެހެން މީހުންގެ މުދަލަށް އަރައިގަތުން ވަނީ ޙަރާމްކުރައްވާފައި ކަމަށެވެ. މިގޮތުން މުދަލަށް ޚިޔާނާތްތެރިވުމާއި، މުދާ ފޭރުމާއި، މުދަލުން ވައްކަން ކުރުމާއި، ޓެކުމާއި، ރިޝްވަތު ނެގުމާއި، ރިބާ ކެއުމާއި، ޖުވާ ކުޅުން ފަދަ ކަންކަމުން މުދާ ހޯދުމަކީ އިސްލާމް ދީން މަނާކުރާ ކަންތައް ކަމަށެވެ.
މީގެ އިތުރުން، ބާޠިލު ގޮތުގައި ދައުލަތުގެ މުދާ ކެއުމުގެ ތެރޭގައި ފައިސާއާއި ތަކެތި ބަލަހައްޓާ މުވައްޒަފުގެ އަތުގައި ހުންނަ ފައިސާއާއި ތަކެތީގައި ޖެހުންވާ ކަމަށާއި، މިއީ ޙަރާމް ކަމެއް ކަމަށާއި، އަމާނާތަށް ޚިޔާނާތްތެރިވުން ކަމުގައި ޚުޠުބާގައި ވިދާޅުވެފައިވެއެވެ.
އަދި، ބާޠިލު ގޮތުގައި މުދާ ކެއުމުގެ ތެރޭގައި ތިމާ ކުރަންޖެހޭ މަސައްކަތް ރަނގަޅަށް ނުކުތުމާއި، މަސައްކަތުގެ ގަޑީގައި ވަގުތު ބޭކާރުކުރުން ހިމެނޭ ކަމަށާއި، ކުރަންޖެހޭ މަސައްކަތްތައް ރަނގަޅަށް ކުރުމަކީ އީމާންކަން ފުރިހަމަކަމުގެ ޢަލާމާތެއް ކަމަށްވެސް ވިދާޅުވެފައިވެއެވެ. މީގެ އިތުރުން މިފަދަ މީހަކު ނަމަ އޮފީހަށް ގޮސް އެތަނުގެ މަސައްކަތާ ނުގުޅޭ ކަންކަމުގައި މަޝްޣޫލުވެއެއް ނޫޅޭނެ ކަމަށާއި، އޭނާގެ މަސައްކަތަށް ﷲ ބައްލަވާވޮޑިގަންނަވާކަން ދަންނަ މީހާ، އޭނާ މަސައްކަތް ކުރޭތޯ ވެރިމީހާ ބެލިޔަސް ނުބެލިޔަސް ބަރާބަރަށް މަސައްކަތް ކުރާނެ ކަމަށް ޚުތުބާގައި ވިދާޅުވިއެވެ.
މިއަދުގެ ޚުޠުބާގައި އިތުރަށް ވިދާޅުވީ، ދައުލަތުގެ މުދަލަށް ޚިޔާނާތްތެރިވުމުގެ ތެރޭގައި ރިޝްވަތު ނެގުންވާ ކަމަށާއި، ރިޝްވަތަކީ ވަރަށް ނުބައި ބައްޔެއް ކަމަށާއި، އެއީ ކަންކަން ފާސިދުކުރާ ވަބާއެއް ކަމަށާއި، އެއީ ޙައްޤު ބާޠިލަށް ހަދައި ބާޠިލު ޙައްޤުކަމަށް ފުރޮޅައިލާ އާލާތެއް ކަމަށެވެ. ރިޝްވަތަކީ ވަރަށް ތަފާތު ނަންނަމުގައި ވަރަށް ގިނަ ސިފަސިފައިގައި މީހުން މަޅީގައި ޖެއްސުމަށާއި ބޭއިންސާފުން ކަންތައްތައް ކުރުވުމަށް ބޭނުންކުރާ ތޫރު ހަތިޔާރެއް ކަމަށާއި، ހަދިޔާއެއް ނުވަތަ ސައެއް ނުވަތަ އެހެން ނަމެއްގައި ދިން ނަމަވެސް އެ ވާނީ ރިޝްވަތަށް ކަމަށާއި، ދުނިޔެ މަތީގައި އެކަމުގެ އުޤޫބާތުން ސަލާމަތްވި ނަމަވެސް އާޚިރަތުގެ ޢުޤޫބާތުން އެމީހާ ސަލާމަތެއް ނުވާނެކަން ކަށަވަރު ކަމަށް ޚުޠުބާގައި ވިދާޅުވެފައިވެއެވެ.
މި ލިޔުން ކިޔާލުމުން
