ސަރުކާރުގެ ރަސްމީ ލިޔެކިޔުމާއި، ޑޭޓާބޭސްތަކުން މައުލޫމާތު ވަގަށް ނަގައިގެން ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ މެމްބަޝިޕް ފޯމު އެކިއެކި މީހުންގެ ނަމުގައި ވަގަށް ފުރާފައިވާ ކަމަށް ތުހުމަތުކުރެވޭ މައްސަލައިގައި ދާޚިލީ ވަޒީރުގެ މަގާމުން ޢަލީ އިޙްސާން އިސްތިއުފާ ދިނުމަށް ދަ ޑިމޮކްރެޓްސް އިން ގޮވައިލައިފިއެވެ.
ޑިމޮކްރެޓްސްއިން މިރޭ ނެރުނު ބަޔާނެއްގައި ބުނީ ސަރުކާރުގެ ރަސްމީ ލިޔެކިޔުމާއި، ޑޭޓާބޭސްތަކުން މައުލޫމާތު ވަގަށް ނަގައިގެން ޕީއެންސީގެ މެމްބަޝިޕް ފޯމު އެކިއެކި މީހުންގެ ނަމުގައި ވަގަށް ފުރާފައިވަނީ ދާޚި ވަޒީރު އިސްވެ ހުންނަވައި، އެ ވުޒާރާ ހިންގާ އޮފީހުގެ ތެރޭގައި ކަމަށެވެ.
''މިއީ ދާޚިލީ ވަޒީރުގެ ބެއްލެވުމުގެ ދަށުން ރޭވިގެން ހިންގާފައިވާ ކުށުގެ އަމަލެއްކަމަށް ވިޔަސް ނުވަތަ ވަޒީރުގެ ޒިންމާއާއި މަސްއޫލިއްޔަތު އަދާނުކުރެއްވުމުގެ ސަބަބުން ހިންގާފައިވާ އަމަލެއް ކަމަށް ވިޔަސް، އެކަމުގެ ސަބަބުން ދާހިލީ ވަޒީރު މަގާމުން އިސްތިއުވާ ދެއްވަންޖެހޭ ވަރުގެ ސަބަބެއްކަމަށް މި ޕާޓީން ދެކެމެވެ.''
ޑިމޮކްރެޓްސްއިން ބުނީ ދައުލަތުން މުސާރަ ލިބޭ ސިޔާސީ މުވައްޒަފުން، ސަރުކާރުގެ ރަސްމީ މަސައްކަތު ގަޑީގައި، ދާޚިލީ ވުޒާރާގެ ދަށުން ހިންގާ ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން (ޑީއެންއާރް) ގައި ހުރި އާންމު ރައްޔިތުންގެ ޒާތީ މައުލޫމާތު ވަގަށް ނަގައިގެން އަމިއްލަ ޒާތީ ސިޔާސީ މަންފާއަށް ބޭނުންކުރުމަކީ ފައިސާތަކެއް ވަގަށް ނެގުމަށްވުރެ، މި ޒަމާނަށް ބަލާއިރު ނުރައްކާތެރިކަން ބޮޑު ޚިނާތެއްކަމުގައި އެ ޕާޓީއިން ދެކޭ ކަމަށެވެ. އަދި މިއީ މަކަރާއި ހީލަތަކަށް ފުދޭ ވިޔާނުދާ ކަމެއްގެ އިތުރުން، އައިޑެންޓިޓީ ފޯޖުކުރުމާއި ސައްހަނޫން ލިޔެކިޔުން ދައުލަތުގެ އިދާރާއަކަށް ގަސްދުގައި އޮޅުވާލައިގެން ހުށަހެޅުން ހިމެނޭ ޖިނާއީ ކުށެއްކަން ވެސް ޑިމޮކްރެޓްސްގެ ބަޔާނުގައި ފާހަގަކޮށްފައިވެއެވެ.
މީގެއިތުރުން ޑިމޮކްރެޓްސްއިން ބުނީ ރައްޔިތުންގެ ޒާތާއި، އާއިލާއާއި، ދިރިއުޅުމާއި އަދި ޖާނާއި މާލާ ބެހޭ އެންމެ އަސާސީ މައުލޫމާތު ބަލަހައްޓާ ފަރާތުގެ އަމާނާތްތެރިކަމާއި ނަޒާހާތްތެރިކަން، އިތުބާރާއި އިންސާފު ގެއްލިދިޔުމަކީ ދައުލަތެއްގެ ނިޒާމު ފޫދިޔުން ކަމަށް ދެކޭ ކަމަށެވެ.
ދާޚިލީ ވުޒާރާއަކީ ޑީއެންއާރްގެ އިތުރުން ކޮމިއުނިކޭޝަން އޮތޯރިޓީ އޮފް މޯލްޑިވްސް (ކޭމް)، ފުލުހުން އަދި މޯލްޑީވްސް ކަރެކްޝަނަލް ސަރވިސްގެ ވެސް ބެލެނިވެރި ފަރާތްކަން ފާހަގަަކޮށް ޑިމޮކްރެޓްސްއިން ބުނީ އެ ވުޒާރާ ހިންގަވާން ހުންނެވި ވަޒީރުގެ ފެނުމާއި އެނގުމުގެ ތެރެއިން އައިޑެންޓިޓީ ވަގަށް ނަގައިގެން ޕީއެންސީގެ ފޯމު ފުރުމުގެ ޖިނާއީ އަމަލު ހިންގާފައިވާކަން ދަނީ އެނގި ހާމަވަމުން ކަމަށެވެ. އަދި ވަގު ފޯމު ފުރައިގެން ޕީއެންސީއަށް ވައްދާފައިވާ އެތައް ބައެއްގެ ކޭސް ކޮންމެ ދުވަހަކުމެ ފަޅާ އަރަމުންދާ ކަމަށް ބަޔާނުގައި ބުނެފައިވެއެވެ.
''އެހެންވީމާ ފުލުހުންނާއި ކުށްވެރިންގެ ކަންކަން ބެލެހެއްޓުމާއި ޒާތީ މުއާމަލާތްތަކާއި މުވާސަލަތުފަދަ ހައްސާސް މަސައްކަތާއި ހަވާލުވެހުރުމުގެ މޯރަލް އޮތޯރިޓީ ނުވަތަ އަހްލަގީ ފަންވަރު މިނިސްޓަރު އަލީ އިހްސާންގެ ކިބައިން ގެއްލިފައިވާކަމަށްވެސް މި ޕާޓީއިން ދެކޭ ކަމުގައި ދަންނަވާ ހާލު، މި މަސްއޫލިއްޔަތުތަކާ މި ޒިންމާތަކުން ޢަލީ އިޙްސާނު ދުރުކޮށް، ތަހުގީގު ހިންގުމަށާއި މިކަން ސީރިއަސް ޖިނާއީ މައްސަލައެއްގެ ގޮތުގައި ތަހްގީގުކުރުމަށް މޯލްޑިވްސް ޕޮލިސް ސާވިސްގެ މައްޗަށް މި ޕާޓީއިން ގޮވާލަމެވެ.'' ބަޔާން ނިންމައިލަމުން ޑިމޮކްރެޓްސްއިން ގޮވައިލައިފައިވެއެވެ.
ބައެއް މީހުންނަށް ނޭނގި އެ މީހުންގެ ނަންމަތީގައި ވަގު ފޯމު ހުށަހަޅައިގެން ޕާޓީތަކަށް މީހުން ވައްދާފައިވާ މައްސަލަތަކެއް ވަނީ ފެންމަތިވެފައެވެ.
އެގޮތުން ބަލާއިރު، ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ޙުސައިން ޒިޔާދަށް އެނގިވަޑައިގަތުމެއްނެތި، ޕީއެންސީއަށް ރަޖިސްޓަރީކުރުމަށްޓަކައި އީސީއަށް ފޯމެއް ހުށަހަޅައިގެން، އެކަން އެ ކޮމިޝަނުގެ ސަމާލުކަމަށް އައުމާ ގުޅިގެން އެ ފޯމު ވަނީ ބާތިލުކޮށްފައެވެ.
ކުރެވޭ ތުހުމަތުތައް ދޮގުކުރައްވަމުން އިޙްސާން ވިދާޅުވެފައިވަނީ ސައްހަ ނޫން ފޯމު އީސީއަށް ހުށަހެޅުމުގައި އޭނާގެ އެއްވެސް ބައިވެެރިވުމެއް ނޯންނާނެ ކަމަށް ވިދާޅުވެފައެވެ.
މި ލިޔުން ކިޔާލުމުން
