ޞައްޙަ ނޫން ފޯމުތަކެއްގެ މުޤާބިލުގައި ޕާޓީއަށް މެންބަރުން އިތުރުކޮށް ދިވެހި ރައްޔިތުންގެ ޙައްޤުތަކެއް ގެއްލޭފަދަ ގޮތަކަށް އެއްވެސް ކަމެއް ކުރުމަކީ ޕާޓީގެ ރައީސް އަދި ލީޑަރޝިޕުން އެއްވެސް ވަރަކަށް ބަލައިގަންނަ ނުވަތަ ހިތްވަރުދޭނެ ކަމެއް ނޫން ކަމުގައި ޕީޕާލްސް ނޭޝަނަލް ކޮންގްރެސް (ޕީއެންސީ) އިން ބުނެފިއެވެ.
ޕީއެންސީ އަށް މެންބަރުން ވެއްދުމުގައި ޞައްޙަ ނޫން ފޯމުތަކެއް އިލެކްޝަންސް ކޮމިޝަން (އީސީ) އަށް ހުށަހަޅާފައިވާ ކަމަށް ބުނާ މައްސަލައާ ގުޅިގެން ނެރުނު ނޫސްބަޔާނެއްގައެވެ.
ޕީއެންސީން ބުނީ އެ ޕާޓީއަށް މެންބަރުން އިތުރު ކުރުމަށް މުޅި ރާއްޖެއަށް ހުޅުވާލެވިގެން ޕާޓީގެ އެކްޓިވިސްޓުންނާއި ހެޔޮ އެދޭ ފަރާތްތަކުގެ ބައިވެރިވުމާއެކު ހިންގި 'މެންބަރޝިޕް ޑްރައިވް' ގައި ޕާޓީއަށް ހުށަހެޅުނު އެތައް ހާސް ފޯމެއް އީސީ އަށް ހުށަހަޅާފައި ވަނިކޮށް، މަދުން ނަމަވެސް ޞައްޙަ ނޫން ފޯމުތަކެއް ހުށަހެޅިފައިވާކަން އެ ޕާޓީއަށް މިހާރު ފާހަގަކުރެވިފައިވާ ކަމަށެވެ.
"ދެންނެވުނު "މެންބަރޝިޕް ޑްރައިވް" އަކީ ރާއްޖޭގައި މިހާތަނަށް އެއްފަހަރާ އެންމެ ގިނަ ޢަދަދަކަށް ސިޔާސީ ޕާޓީއަކަށް މެންބަރުން ވަނުމަށް ފޯމު ހުށަހެޅުނު އެއް ޙަރަކާތް ކަމަށްވެފައި، ޕާޓީގެ އިދާރީ މުވައްޒަފުން ނުހަނު ބުރަކޮށް މަސައްކަތްކޮށް، ޕާޓީގެ އިލެކްޝަންސް ޕޯޓަލް މެދުވެރިކޮށް އެ ފޯމުތައް އަޕްލޯޑު ކުރަމުން ދިޔަ ނަމަވެސް، ޕާޓީއަށް ލިބޭ ފޯމުތަކުގެ ޞައްޙަކަން ކަށަވަރު ކުރުމުގެ ޤާބިލުކަން ޕާޓީގައި ނެތުމުގެ ނަތީޖާއަކީ ފޯމެއްގެ ޞައްޙަކަމާމެދު ސުވާލެއް އުފެދޭ ހިސާބަކީ އިލެކްޝަންސް ކޮމިޝަނަށް ފޯމު ހުށަހެޅުމުގެ ފަހުގެ މަރުޙަލާއެއް ކަމުގައިވުން. ގިނަ ޕާޓީ އެކުލެވޭ ވާދަވެރި ސިޔާސީ މާހައުލެއް ދިވެހިރާއްޖޭގައި ވުޖޫދު ކުރެވުނު ހިސާބުން ފެށިގެން މިއަދާ ހަމައަށްވެސް، ރާއްޖޭގައި ވަސީލަތްތައް ހުރިގޮތުން މިކަމަކީ މި ޕާޓީއަށް އެކަނި އޮތް ގޮންޖެހުމެއް ނޫންކަންވެސް މި ފުރުޞަތުގައި ފާހަރަކުރަން"، އެ ބަޔާނުގައި ވެއެވެ.
މީގެ އިތުރުން ޕީއެންސީން ބުނީ މިހާތަނަށް އެކި ފަރާތްތަކުން ޞައްޙަ ނޫން ފޯމުތަކެއް އެ ޕާޓީގެ ނަމުގައި އީސީ އަށް ހުށަހަޅާފައިވާ ކަމަސް ބަޔާންކޮށް އީސީ އަށާއި ފުލުހުންނަށް ޝަކުވާތަކެއް ލޮގް ކޮށްފައިވާތީ، އެ ދެ މުއައްސަސާއިންވެސް އެ މައްސަލަތައް ބަލަމުން ގެންދާކަން އެ ޕާޓީއަށް އަންގާފައިވާ ކަމަށާއި، މިފަދަ ފޯމުތައް ހުށަހެޅިފައިވާ ގޮތް ޕީއެންސީންވެސް ބަލަމުންދާ ކަމަށެވެ.
ޕީއެންސީން ވަނީ އެ ޕާޓީގެ ފަރާތުން އީސީ އާއި ފުލުހުންނަށް އެ މައްސަލަ ބެލުމުގައި ފުރިހަމަ އެއްބާރުލުން ދެމުންގެންދާނެކަމުގެ ޔަޤީންކަންވެސް ދީފައެވެ.
ޕީއެންސީން ބުނީ އުފެދިފައި މިވާ މައްސަލައަށް އަވަސް ޙައްލެއް ގެނައުމަށާއި، އެ ޕާޓީގެ މެންބަރުން އަދި ޖުމުލަކޮށް ދިވެހި ރައްޔިތުންގެ ޙައްޤުތައް ކަށަވަރު ކޮށްދިނުމަކީ ޒިންމާދާރު ސިޔާސީ ޕާޓީއެއްގެ ހައިސިއްޔަތުން އެ ޕާޓީން ކުރަންޖެހޭ ކަމެއް ކަމުގައި ދެކޭ ކަމަށެވެ. އަދި، ޞައްޙަ ނޫން ފޯމެއް މެދުވެރިކޮށް އެ ޕާޓީއަށް ވެއްދުމުގެ އެއްވެސް މައްސަލައެއް ކުރިމަތި ވެފައިވާނަމަ އެ ޕާޓީގެ ރަސްމީ އީމެއިލް [email protected] އަށް މެއިލްކުރުމުން އެފަދަ ޙުސޫމާތުތަކަށް އަވަސް ހައްލެއް ގެނެސްދިނުމަށް ކުރެވެން ހުރި ހުރިހާ ކަމެއް ކޮށްދޭނެކަން ރައްޔިތުންނަށް ކަށަވަރުކޮށްދޭ ކަމަށްވެސް ޕީއެންސީގެ ބަޔާނުގައި ބުނެފައިވެއެވެ.
މި ލިޔުން ކިޔާލުމުން
