ކުރީގެ ނައިބު ރައީސް ޢަބްދުﷲ ޖިހާދުގެ މައްޗަށް ކުރާ ދައުވާގެ މައްސަލަ ކްރިމިނަލް ކޯޓުން ނުބަލަން ނިންމި ނިންމުން ގޯސްކަމަށް ކަނޑައަޅައި، އެ މައްސަލައިގެ ޝަރީއަތް ހިންގުމަށް ހައިކޯޓުން މިއަދު ކްރިމިނަލް ކޯޓުގެ މައްޗަށް އަމުރުކޮށްފިއެވެ.
ޖިހާދުގެ މައްޗަށް ދައުވާކުރަނީ 2013 ވަނަ އަހަރު އޭނާ ފިނޭންސް މިނިސްޓަރު ކަމުގައި ހުންނެވިއިރު، ފުށިދިއްގަރުފަޅުގެ ސްޕެޝަލް ޓުއަރިސްޓު ޒޯނެއްގެ ގޮތުގައި ތަރައްގީކުރުމަށް ޕްރައިމް ކެޕިޓަލް މޯލްޑިވްސްއާއެކު ޖޮއިންޓް ވެންޗާ އެއްބަސްވުމެއްގައި ސޮއިކުރެއްވުމުގައި ދައުލަތަށް ފައިދާނުވާ ގޮތަށް އަމަލުކުރެއްވި ކަމުގެ ތުހުމަތުގައެވެ.
ޖިހާދު ސޮއިކުރެއްވި އެއްބަސްވުމުގައި އޮތީ %25 އެވެ. ނަމަވެސް ސްޕެޝަލް ޓޫރިޒަމް ޒޯނެއްގެ ގޮތުގައި ތަރައްގީކުރާ ތަންތަނުގައި މަދުވެގެން %50 ހިއްސާ އޮންނަންޖެހޭނެ ކަމަށް ނެޝަނަލް ޕްލޭނިންގ ކައުންސިލުން އޮތީ ލަފާދީފައެވެ.
މި މައްސަލާގައި ދައުލަތުން ޖިހާދުގެ މައްޗަށް އުފުލާފައިވާ ދައުލަތަށް ފައިދާވާން އޮތް ކަމެއްގައި އެ ނޫން ގޮތަކަށް އަމަލުކުރުމުގެ ދައުވާ ކުރިއަށް ނުގެންދެވޭނެ ކަމަށް ކްރިމިނަލް ކޯޓުން ނިންމީ ދައުވާއެއްގައި ހުންނަންޖެހޭ އަސާސީ ކަންކަމާއި، ތަހުގީގު ފުރިހަމަނުވާ ކަމަށް ކަނޑައަޅައިފައެވެ.
އެގޮތުން މިދިޔަ އޮގަސްޓު 12 ގައި ދައުލަތުން މި ނިންމުން ހައިކޯޓުގައި އިސްތިއުނާފުކުރުމުން، ޖިހާދު ދިރިއުޅުއްވާ އެޑްރެސް ސާފުނުވާތީ އެ ކޯޓުން ނިންމީ މައްސަލަ ބަލައިނުގަތުމަށެވެ.
އެގޮތަށް ނިންމީ ޖިހާދު އުޅޭ އެޑްރެސް ސާފުކުރުމަށްފަހު، ސެޕްޓެމްބަރު 19 އިން ފެށިގެން 15 ދުވަހުގެ ތެރޭގައި އަލުން މައްސަލަ ހުށަހެޅުމަށް އަންގައިފައެވެ. ނަމަވެސް ދައުލަތުން އެ މައްސަލަ ހުށަހެޅީ އެ މުއްދަތު ފަހަނައަޅައި ދިޔަ ފަހުން އޮކްޓޫބަރު 13 ގައެވެ.
އެގޮތުން ހައިކޯޓުން ބުނެފައިވަނީ އަލުން މައްސަލަ ހުށަހަޅަން ދިން މުއްދަތު ހަމަވެފައިވާތީ މައްސަލަ ބަލައިގަނެވެން ނެތް ކަމަށެވެ. ނަމަވެސް އޭގެފަހުން ހައިކޯޓުގެ ތިން ފަނޑިޔާރުންގެ ބެންޗަކުން ވަނީ ޖިހާދުގެ މައްސަލަ ބަލައިގަންނަން ހުއްދަ ދޭން ފެންނަ ކަމަށް ނިންމަވައިފައެވެ.
މިގޮތަށް ނިންމެވީ އެ މައްސަލަ އަލުން ހުށަހަޅަން ހައިކޯޓުން ދިން 15 ދުވަހުގެ މުއްދަތުގައި މައްސަލަ ހުށަހެޅިފައިނުވަނީ ޖިހާދު ކޯޓަށް ހާޒިރުކުރުމުގެ އިންތިޒާމު ހަމަނުޖެހި ވަނިކޮށް އެ މުއްދަތުގެ ތެރޭގައި އޭނާ ރާއްޖެއިން ބޭރަށް ވަޑައިގެންފައިވާތީ ކަމަށް ދައުލަތުން ބުނެފައިވާތީއެވެ.
އެއީ އަމިއްލަ ބާރު ނުފޯރާފަދަ ސަބަބެއް މެދުވެރިވެގެން ހިނގާފައިވާ ކަމަކަށްވާތީ މައްސަލަ ބަލައިގަތުމަށް ނިންމީ ކަމަށް ހައިކޯޓުގެ ތިން ފަނޑިޔާރުންގެ ބެންޗުން ނިންމަވާފައިވާ ނިންމުމުގައިވެއެވެ.
މި މައްސަލާގައި ހައިކޯޓުން މިއަދު އިއްވި ހުކުމުގައި ބުނީ ދަށު ކޯޓުން މައްސަލަ ބޭރުކޮށްލީ ގާނޫނީ ކޮން އަސާސެއްގެ މައްޗަށް ބިނާކޮށް ކަމެއް ސާފުނުވާ ކަމަށެވެ. އަދި ތަހުގީގުގައި އަމަލުކުރި ގޮތުގެ ސަބަބުން ޖިހާދުގެ އެއްވެސް އަސާސީ ހައްގެއް ގެއްލިފައިވާކަން ސާފުނުވާ ކަމަށް ވެސް ހުކުމުގައިވެއެވެ.
އަދި އެފަދަ ކަންކަމަކީ ދައުވާ އުފުލުމުގައި ހުރި އުނިކަމެއްކަން ބަޔާންކުރާ ގާނޫނީ ނައްސެއް ނެތް ކަމަށާއި، އަދީބުގެ ބަޔާނުގެ ސައްހަކަން ކަށަވަރުކޮށްފައިނުވާ ކަމަށް ދަށު ކޯޓުން ޝަރީއަތުގެ ކުރީގެ މަރުހަލާގައި ކަނޑައަޅާފައިވަނީ ގާނޫނީ ކޮން އަސާސެއްގެ މައްޗަށްކަން ސާފުނުވާ ކަމަށް ވެސް ހުކުމުގައިވެއެވެ.
އެގޮތުން ދަށު ކޯޓުގެ ނިންމުމަކީ ގާނޫނީ ހަމަތަކާ ޚިލާފު ނިންމުމެއް ކަމަށް ކަނޑައަޅައި، ހައިކޯޓުގައި މައްސަލަ ބެއްލެވި 3 ފަނޑިޔާރުންގެ އިއްތިފާގުން އަމުރުކުރެއްވީ މި މައްސަލާގެ ޝަރީއަތް ކްރިމިނަލް ކޯޓުން ކުރިއަށްގެންދަންޖެހޭ ކަމަށެވެ.
މި ލިޔުން ކިޔާލުމުން
