ގއ. ގެމަނަފުށީ ރައްޔިތުންނާ ބައްދަލުކޮށް ހިޔާލު ބަދަލުކުރުމުގެ ހަރަކާތެއް ދިވެހި ފުލުހުންގެ ޚިދުމަތުން ކުރިއަށް ގެންގޮސްފިއެވެ.
ފުލުހުން ބުނީ މިއީ ކުށްމަދު އަމާން ވެއްޓެއް ގާއިމުކޮށް ރައްޔިތުންނަކީ ހޭލުންތެރި ބަޔަކަށް ހެދުމަށް ފުލުހުން ކުރަމުންދާ މަސައްކަތްތަކުގެ ތެރެއިން ކުރިއަށްގެންދިޔަ ހަރަކާތެއް ކަމަށެވެ.
މިގޮތުން ފުލުހުން ބުނީ އިއްޔެ ގެމަނަފުށީގައި ކުރިއަށްގެންދިޔަ މި ހަރަކާތުގައި ރަށުގެ މަގުމަތިންނާއި އެކި ސަރަހައްދުތަކުން ރައްޔިތުންނާ ބައްދަލުކޮށް މުހިންމު ކަންކަމާ ގުޅޭގޮތުން ހިޔާލު ބަދަލުކޮށް މަޝްވަރާކޮށްފައިވާ ކަމަށެވެ. އެގޮތުން، ކުށްތަކުން ރައްކާތެރިވުމަށް އަބަދުވެސް ހޭލުންތެރިވެ ތިބުމަށާއި އާންމުކޮށް ރަށުގައި ހިނގާ ކުށްތަކުގެ މައުލޫމާތު ހިއްސާކޮށްފައިވާ ކަމަށާއި، ސޯޝާލް މީޑިއާގެ އެޕްތަކުގައި ޓޫ ފެކްޓަރ އޯތަންޓިކޭޓަރ ހެދުމުގެ މުހިންމުކަމާ ގުޅޭ މައުލޫމާތުވެސް ހިއްސާކޮށްފައިވާ ކަމަށް ފުލުހުން ބުންޏެވެ.
މީގެ އިތުރުން ފުލުހުންގެ ޚިދުމަތާމެދު ރައްޔިތުން ދެކޭ ގޮތާމެދު ހިޔާލުބަދަލުކޮށް ރައްޔިތުންގެ ކަންބޮޑުވުންތައް އޮޅުންފިލުވައި، ވިޔަފާރީގެ މުއާމަލާތް ކުރުމުގައި ސަމާލުކަންދޭންޖެހޭ ކަންކަމާއި ރައްކާތެރި ގޮތުގައި އިންޓަނެޓް ބޭނުންކުރާނެ ގޮތްތަކުގެ މައުލޫމާތުވެސް ހިއްސާކޮށްފައިވާ ކަމަށް ފުލުހުން ބުނެއެވެ.
ފުލުހުން ބުނީ ގެމަނަފުށީ ޕޮލިސް ސްޓޭޝަނުން މި ހަރަކާތް ކުރިއަށް ގެންދިއުމުގައި ރައްޔިތުންގެ ފަރާތުން ވަރަށް ފުރިހަމަ އެއްބާރުލުމެއް ލިބިފައިވާ ކަމަށާއި، މި ހަރަކާތަކީ ރައްޔިތުންނާއި ފުލުހުންނާ ދެމެދު އޮތް ގުޅުން އިތުރަށް ބަދަހިކޮށް މުޖުތަމައުގެ ރައްކާތެރިކަން އިތުރުކުރުމަށާއި ރައްޔިތުން އެދޭ ކޮންމެ ކަމެއްގައި އެންމެ ގާތުގައި ފުލުހުން ތިބޭނެކަން ރައްޔިތުންނަށް ހާމަކޮށްދިނުމުގެ ގޮތުން ކުރިއަށް ގެންދިޔަ ހަރަކާތެއް ކަމަށެވެ.
މި ލިޔުން ކިޔާލުމުން
