މެރިޓައިމް ދާއިރާއަށް ޒުވާނުން ނެރުމަށްޓަކައި މޯލްޑިވްސް ސްޓޭޓް ޝިޕިންގ ކޮމްޕެނީ (އެމްއެސްއެސް) އިން ސްކޮލަރޝިޕް ފުރުޞަތުތަކެއް ހުޅުވާލައިފިއެވެ.
2025 ވަނަ އަހަރުގެ 'ކަލާސީން' ސްކޮލަރޝިޕްގެ ދަށުން އެމްއެސްއެސް އިން ވަނީ ޖުމުލަ ދެ ފުރުޞަތެއް ހުޅުވާލައިފައެވެ. އެއީ ޑިޕްލޮމާ އިން ނޯޓިކަލް ސްޓަޑީސް ކިޔެވުމުގެ އެއް ފުރުޞަތާއި ޑިޕްލޮމާ އިން މެރިން އިންޖިނިއަރިންގ ކިޔެވުމުގެ އެއް ފުރުޞަތެވެ.
މި ކޯސްތައް މި އަންނަ މާރިޗު މަހުގެ ތެރޭގައި ފެށޭނެއެވެ. ކޯހުގެ މުއްދަތަކީ ތިން އަހަރާއި ހަތަރު މަސް ދުވަހެވެ. އަދި މި ކޯސްތަކުގައި ބައިވެރިވެވޭނީ އޯލެވެލް ނުވަތަ އެއަށްވުރެ މަތީ ސަނަދެއް އޮންނަ ފަރާތްތަކަށެވެ. މިއާއެކު އައިއީއެލްޓީއެސް އިން 5.0 އިން މަތީގެ ސްކޯއެއް ނުވަތަ ޓީއޯއީއެފްއެލް އައިބީޓީ އިން 40 ނުވަތަ ޓީއޯއީއެފްއެލް އެސެންޝަލް އިން 7.5 އަށްވުރެ މަތިން ސްކޯ ލިބިފައިވާ ފަރާތަކަށްވެސް ވާންޖެހޭނެއެވެ.
އެމްއެސްއެސް އިން ބުނީ ހަމައެކަނި ދިވެހިންނަށް ހުޅުވާލާފައިވާ ފުރުޞަތުތަކެއް ކަމަށެވެ.
މި ސްކޮލަރޝިޕްގެ ދަށުން ކިޔަވާ ދަރިވަރުން ކޯސް ފުރިހަމަކުރުމަށްފަހު އެމްއެސްއެސްގައި 18 މަސް ދުވަހު މަސައްކަތް ކުރުމަށް ބޮންޑްކުރެވޭނެއެވެ. މި ސްކޮލަރޝިޕަށް ކުރިމަތިލުމުގެ ފުރުޞަތު ހަމަވާނީ 21 ޖަނަވަރީ 2025 ގެ 14:00 އަށެވެ.
މި ލިޔުން ކިޔާލުމުން
