އެމްއެންޑީއެފް ނޮދަން އޭރިއާ ކޮމާންޑާއި ހއ.އުތީމު އަންހެނުން ތަރައްޤީއަށް މަސައްކަތްކުރާ ކޮމެޓީއާ ގުޅިގެން ހއ. އުތީމުގެ ރައްޔިތުންނަށް ޚާއްޞަކޮށްގެން އެ ރަށުގައި "މޫދު ކަސްރަތު" ޕުރޮގުރާމެއް ހިންގައިފިއެވެ.
2024 ޑިސެންބަރު 11 ވަނަ ދުވަހުން ފެށިގެން 21 ދުވަހުގެ މުއްދަތަށް ހިންގި މި ޕުރޮގުރާމު އެ ރަށުގެ 72 މީހަކު ވަނީ ފުރިހަމަކޮށްފަވެއެވެ.
މި ޕުރޮގުރާމެއް ނިންމުމުގެ ގޮތުން ޖަނަވަރީ 1 ވަނަ ދުވަހު ބޭއްވި ރަސްމިއްޔާތު ޝަރަފުވެރިކޮށްދެއްވީ އެމްއެންޑީއެފް ނޮދަން އޭރިއާ ކޮމާންޑްގެ ޑެޕިއުޓީ ކޮމާންޑަރ، ލެފްޓިނެންޓް ކާނަލް އަޙްމަދު ލިޒާނެވެ. ރަސްމިއްޔާތުގައި ޝަރަފުވެރި މެހެމާން ވަނީ ރަސްމިއްޔާތުގެ ބައިވެރިންނާ މުޚާތަބުކުރައްވައި ވާހަކަފުޅު ދައްކަވާފައެވެ.
އެމްއެންޑީއެފުން ބުނީ މި ޕުރޮގުރާމަކީ، ރައްޔިތުންނަށް ބޭނުންވާ ދުޅަހެޔޮކަމާއި، ދުޅަހެޔޮ ޞިއްޙަތާއި، ރައްޔިތުން ބާރުވެރިކުރުމާއި އިޖުތިމާޢީ ފޭރާން ވަރުގަދަ ކުރުމުގެ އިތުރުން އެއްބަޔަކު އަނެއް ބަޔަކަށް އިޙްތިރާމްކުރާ، އެކުވެރިކަމާއެކު ގުޅިގެން މަސައްކަތްކުރާ އެއްބައެއްވަންތަ މުޖުތަމަޢުއެއް ބިނާކުރުމުގެ މަޤްޞަދުގައި އެ ރަށު ކައުންސިލްއާ ގުޅިގެން އެމްއެންޑީއެފް ނޮދަން އޭރިއާ ކޮމާންޑުން ކުރިއަށް ގެންދިޔަ ޕުރޮގުރާމެއް ކަމަށެވެ.
މި ޕުރޮގުރާމުގައި ބައިވެރިވި ފަރާތްތަކުގެ ތެރެއިން ރަންވަނަތައް ހާސިލުކުރެއްވި ފަރާތްތަކަށް ވަނީ ސެޓްފިކެޓާއި އެވޯޑް ހަވާލުކޮށްފައެވެ. މިގޮތުން މި ޕުރޮގުރާމުގެ މުއްދަތުގައި ބަރުދަން ލުއިކުރި ބައިވެރިންގެ ތެރެއިން އެންމެ ބޮޑަށް ބަރުދަން ލުއިކުރި ބައިވެރިންގެ ތެރެއިން ތިންވަނަ، ދެވަނަ އަދި އެއްވަނަ ބައިވެރިޔާއަށް ސެޓްފިކެޓާއި އެވޯޑް ހަވާލުކޮށްދެއްވީ، ރަސްމިއްޔާތުގެ ޝަރަފުވެރި މެހެމާންއެވެ.
އަދި މި ރަސްމިއްޔާތުގައި، "މޫދު ކަސްރަތު" ފުރިހަމަކުރެއްވި ބައިވެރިންނަށް ހަނދާނީ ލިޔުން ހަވާލުކޮށްދެއްވީ ނޮދަން އޭރިއާ ކޮމާންޑްގެ އެސް1، ކެޕްޓަން އަޙްމަދު އިހުސާނެވެ. އަދި އެޓެންޑެންސް އެވޯޑް ހާސިލުކުރެއްވި ފަރާތްތަކަށް އެވޯޑާއި ސެޓްފިކެޓް ހަވާލުކޮށްދެއްވީ އެމްއެންޑީއެފް ނޮދަން އޭރިއާ ކޮމާންޑްގެ އެސް 3 ކެޕްޓަން މުޙައްމަދު ސަވާދު ސައުދުاللهއެވެ.
މި ޕުރޮގުރާމުގައި ރައްޔިތުންނަށް ބޭނުންވާ ދުޅަހެޔޮ ޞިއްޙަތާއި ދުޅަހެޔޮ ޞިއްޙަތެއްގައި ހުރުމަށް ކަސްރަތު ކުރުމުގެ މުހިންމުކަމާއި، ކަސްރަތުން ލިއްބައިދޭ ފައިދާތަކާއި ކަސްރަތު ކުރަންވީ ރަނގަޅު ގޮތްތަކާއި އަދި ރަނގަޅު ޞިއްޙަތެއްގައި ހުރުމަށް ރަނގަޅު ކާނާ ކެއުމުގެ މުހިންމުކަމާ ބެހޭގޮތުން ބައިވެރިންނަށް ވަނީ މަޢުލޫމާތު ދީފައެވެ. މީގެ އިތުރުން މި ޕްރޮގްރާމްގައި ބައިވެރިންނަށް އެއްބަޔަކު އަނެއް ބަޔަކަށް އިޙްތިރާމްކުރުމާއި ލީޑަރޝިފާއި ތަރުތީބުން ކަންކަން ކުރުމުގެ މުހިންމުކަމާއި އަދަބު އަޙްލާޤާއި ރިވެތި އާދަކާދަތަކާއި ގަޑިއަށް ފަރުވާތެރިކަން ބެހެއްޓުމާއި އަދި އެކުވެރިކަމާއެކު ގުޅިގެން މަސައްކަތްކުރާ އެއްބައިވަންތަ ބައެއްގެ ގޮތުގައި މަސައްކަތްކުރާނެ ގޮތާއި އާދަތައް ކިޔަދީފައިވެއެވެ.
އުތީމުގައި ކުރިއަށް ގެންދިޔަ މި ޕްރޮގްރާމްގައި ކުލާސްތައް ނަގައިދިނީ އެމްއެންޑީއެފް ނޮދަން އޭރިއާ ކޮމާންޑްގެ އިންސްޓްރަކްޓަރުންނެވެ.
މި ލިޔުން ކިޔާލުމުން
