ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން "ސަރުކާރު ހިއްސާވާ ކުންފުނިތަކުގެ އިދާރީ އޮނިގަނޑާއި މުސާރައިގެ އޮނިގަނޑަށް ބަދަލު ގެނައުމުގައި ޢަމަލުކުރާނެ ގޮތުގެ ގައިޑްލައިން" އެކުލަވާލައިފިއެވެ.
ޕީސީބީ އިން ސަރުކާރު ހިއްސާވާ ކުންފުނިތަކަށް ފޮނުވި ސަރކިއުލަރގައި ބުނެފައިވަނީ، މިއީ ދައުލަތުގެ ވިޔަފާރި ތަންތަން ޕްރައިވަޓައިޒްކުރުމާއި ކޯޕަރަޓައިޒްކުރުމާއި އަދި މޮނިޓަރކޮށް އިވެލުއޭޓް ކުރުމުގެ ޤާނޫނުގެ 2 ވަނަ މާއްދާގެ 6 ވަނަ ނަންބަރުގައި ބަޔާންކޮށްފައިވާ މަޤުޞަދުތައް ޙާޞިލުކުރުމުގެ ގޮތުން ސަރުކާރުގެ ކުންފުނިތަކާއި، ސަރުކާރު ބައިވެރިވާ ކުންފުނިތަކާއި، ވިޔަފާރި އުސޫލުން ހިންގާ ސަރުކާރުގެ ތަންތަން ހިންގުން އިތުރަށް ހަރުދަނާކުރުމަށް މަގުފަހިކޮށްދިނުމަށާއި، ކޯޕަރޭޓް ގަވަރނަންސްގެ ހަމަތައް ނެގެހެއްޓުމަށްޓަކައި އެ ޤާނޫނުގެ 62 ވަނަ މާއްދާގެ (މ) ގެ ދަށުން އެކުލަވާލާފައިވާ ގައިޑްލައިނެއް ކަމަށެވެ.
މިގޮތުން އިދާރީ ނުވަތަ މުސާރައިގެ އޮނިގަނޑަށް ބަދަލު ގެނައުމަށް ބޭނުންވާ ކުންފުނިތަކުން، މި ގައިޑްލައިނާ އެއްގޮތަށް ގެންނަން ބޭނުންވާ ބަދަލުތަކަށް ހުއްދަ ހޯދުމަށްޓަކައި ކުންފުނީގެ ބޯޑުން ނިންމުމަށްފަހު، ކުންފުނީގެ ހިއްސާދާރުގެ ހުއްދައަށް އެދި ފޮނުވަންވާނެ ކަމަށެވެ. އަދި ހުއްދަ ލިބުމުން، ކުންފުނީގެ ބޯޑުން އައު އޮނިގަނޑު ފާސްކުރާތާ ފަސް ދުވަހުގެ ތެރޭގައި، ޕީސީބީ އާ ހިއްސާކުރަންވާނެ ކަމަށްވެސް ސަރކިއުލަރގައި ބުނެފައިވެއެވެ.
ޕީސީބީގެ ސަރކިއުލަރގައި އިތުރަށް ބުނެފައިވަނީ "ކޯޑް އޮފް ކޯޕަރޭޓް ގަވަރނަންސް ފޯރ ސްޓޭޓް އޯންޑް އެންޓަޕްރައިޒަސް" ގެ 22 ވަނަ މާއްދާއަށް ޕީސީބީގެ 35/2024 ނަންބަރު ބައްދަލުވުމުގައި ގެނެސްފައިވާ އިސްލާހުގެ ދަށުން އެ ކޯޑަށް ޢަމަލުކުރަންޖެހޭ ކުންފުނިތަކުން މި ގައިޑްލައިނުގައިވާ ކަންތައްތައް ފުރިހަމަކުރުމަށް ފަހު ހުއްދަ ހޯދުމަށް އެދި ފޮނުވާނީ މާލީ ވުޒާރާއަށް ކަމަށެވެ. އަދި، މި ކޯޑަށް ޢަމަލުކުރުން މިވަގުތު އިސްތިސްނާވާ ކުންފުނިތަކުގެ ތެރެއިން، ސަރުކާރު މެޖޯރިޓީ ހިއްސާވާ ކުންފުނިތަކުންވެސް މި ގައިޑްލައިންގައިވާ ކަންތައްތައް ފުރިހަމަ ކުރުމަށްފަހު ހުއްދަ ހޯދުމަށް އެދި ފޮނުވާނީ މާލީ ވުޒާރާއަށް ކަމަށް ސަރކިއުލަރގައި ބުނެފައިވެއެވެ. އެހެނިހެން ދައުލަތުގެ ވިޔަފާރި ތަންތަނުންވެސް ކުންފުނީގެ އޮނިގަނޑު ބަދަލުކުރުމުގައި މި ގައިޑްލައިންގައިވާ ކަންތައްތައް ފުރިހަމަ ކުރުމަށްފަހު ހިއްސާދާރުގެ ހުއްދަ ހޯދުމަށް ޕީސީބީން ވަނީ އެދިފައެވެ.
މި ލިޔުން ކިޔާލުމުން
