މާލެ އާއި ހުޅުމާލޭގެ ފެނުގެ ވިއުގަ ކުރިއަށް އޮތް 2025 ވަނަ އަހަރު ގުޅާލެވޭނެ ކަމަށް މޯލްޑިވްސް ވޯޓަރ އެންޑް ސްވަރޭޖް ކޮމްޕެނީ (އެމްޑަބްލިޔޫއެސްސީ) ގެ މެނޭޖިން ޑިރެކްޓަރ ޢަބްދުލް މަތީނު މުޙައްމަދު ވިދާޅުވެއްޖެއެވެ.
އެމްއެމްޓީވީގެ "ބޮޑު ޚަބަރު" ޕްރޮގްރާމުގައި ވާހަކަފުޅު ދައްކަވަމުން، މަތީނު ވިދާޅުވި ގޮތުގައި 2018 ވަނަ އަހަރު ސިނަމާލެ ބްރިޖުގެ މަސައްރިޖުގެ މަސައްކަތާއެކު މާލެ އާއި ހުޅުމާލެއާ ދެމެދު ފެން ހޮޅި އަޅާފައިވީ ނަމަވެސް، މިހާތަނަށް ޕަމްޕު ސިސްޓަމް ޤާއިމްކުރެވިފައި ނުވާކަމަށެވެ.
އިތުރަށް މަޢުލޫމާތު ދެއްވަމުން މަތީނު ވިދާޅުވީ، މިހާރު އެމްޑަބްލިޔޫއެސްސީއިން ދެކޮޅުގައި ގާއިމްކުރަންޖެހޭ ޕަމްޕު ސިސްޓަމްގެ މަސައްކަތް ފަށާފައިވާކަމަށެވެ. އަދި މި މަސައްކަތް 2025 ވަނަ އަހަރު ފެށޭއިރު މުޅިން ނިންމާލައި، ޚިދުމަތަށް ތައްޔާރުކުރެވޭނެ ކަމަށް އޭނާ ވިދާޅުވިއެވެ.
މި މަޝްރޫޢަކީ ރާއްޖޭގެ ވެރިރަށް މާލޭގެ ފެނުގެ ރައްކާތެރިކަން ކަށަވަރުކުރުމަށްޓަކައި ކުރެވޭ އިންތިހާއަށް މުހިންމު މަސައްކަތެކެވެ. މި މަސައްކަތް ނިމުމުން، މާލެ ނުވަތަ ހުޅުމާލޭގައި މަރާމާތުގެ މަސައްކަތެއް ކުރަންޖެހުމުގެ ސަބަބުން ނުވަތަ އެހެންވެސް ސަބަބަކާހުރެ ފެނުގެ ޚިދުމަތް މެދުކެނޑިއްޖެ ހާލަތެއްގައި، ލުއިފަސޭހަކަމާއެކު ހުޅުމާލެ އާއި މާލެއާ ދެމެދު އަދި މާލެ އާއި ހުޅުމާލެ އާ ދެމެދު ފެން ފޯރުކޮށްދިނުމުގެ މަގު ތަނަވަސްވެގެންދާނެއެވެ.
މީގެ އިތުރުން، ފެން އުފެއްދުމާއި ރައްކާކުރުމުގެ ޤާބިލުކަން އިތުރުކުރުމަށް އެ ކުންފުނިން ގިނަގުނަ މަސައްކަތްތަކެއް ކުރަމުންދާކަން މަތީން ފާހަގަކުރެއްވިއެވެ. މި ގޮތުން، މާލެ އާއި ހުޅުމާލޭގައި ދުވާލަކު 5000 ޓަނުގެ ފެން އުފައްދާ ދެ ޕްލާންޓް ޤާއިމުކުރުމަށް، ބަޔަކު ހޮވާފައިވާ ކަމަށް އޭނާ ވިދާޅުވިއެވެ.
މި އައު ފެން ޕްލާންޓްތަކުގެ އެހީގައި ފެން އުފެއްދުމުގެ ޤާބިލުކަން 30 އިންސައްތަ އިތުރުވެގެންދާނެއެވެ. އަދި 2025 ވަނަ އަހަރުގެ ނިޔަލަށް ފެން ރައްކާކުރެވޭ މިންވަރު ދެގުނަ ކުރުމަކީވެސް، ވެރިރަށުގެ ފެނުގެ ރައްކާތެރިކަން ހަރުދަނާކުރުމަށް އެ ކުންފުނިން އަމާޒުހިފާފައިވާ ކަމެއްކަމުގައި މަތީން ވިދާޅުވިއެވެ.
މި ލިޔުން ކިޔާލުމުން
