ޣައްޒާގައި ހިނގަމުންދާ 14 މަސްދުވަހުގެ ހަނގުރާމަ ނިމުމަކަށް ގެނައުމަށް, އިސްރާއީލާއި ހަމާސްއިން އެއްބަސްވުމަކާ ކައިރިވެފައި ވަނިކޮށް, ދެ ފަރާތުން ވެސް މަސައްކަތް ހުރަސް އަޅަމުންދާ ކަމަށް ތުހުމަތުކޮށްފިއެވެ.
އިސްރާއީލާއި ހަމާސްއިން ބުދަ ދުވަހު ވަނީ އެއްބަޔަކު އަނެއްބަޔަކަށް ހުއްޓުމަކަށް އައުމުގެ މަސައްކަތްތަކަށް ހުރަސްއެޅުމުގެ ތުހުމަތުކޮށްފައެވެ. މިއީ ޣައްޒާގައި ހިނގަމުންދާ 14 މަސްދުވަހުގެ ހަނގުރާމަ ނިމުމަކަށް ގެނައުމަށް އެއްބަސްވުމަކާ ކައިރިވަމުންދާ ދަނޑިވަޅެކެވެ.
ޣައްޒާގައި ހިފަހައްޓާފައިވާ ގިނަ އަދަދެއްގެ ރަހީނުން ގެއަށް ގެނައުމަށް އެއްބަސްވުމަކާ ވާސިލުވުމަށް, މަސްތަކަކަށް ދެމިގެން ދިޔަ މަޝްވަރާއަށްފަހު މިއީ މިހާތަނަށް ދެ ފަރާތުން އެއްބަސްވުމާ އެންމެ ކައިރިކުރެވުނު ފަހަރެވެ. ނަމަވެސް، މީގެކުރިން ވެސް މަޝްވަރާތައް ކައިރިވެފައި ވަނިކޮށް ވަނީ ފެއިލްވެފައެވެ. އެއްބަސްވުމަކާ ހަމައަށް ވާސިލުވުމަށް ކުރިއެރުން ލިބެމުންދާކަމަށް އިސްރާއީލާއި ހަމާސްއިން އުންމީދު ފާޅުކޮށްފައިވީ ނަމަވެސް، ރަހީނުންނާއި ޖަލު ބަންދުން މީހުން ބަދަލުކުރުމާއި ޣައްޒާއިން އިސްރާއީލުގެ ސިފައިން އަނބުރާ ގެނައުމާ ގުޅޭ ގޮތުން އަދިވެސް ހުރަސްތަކެއް ހުރިކަމަށް މަޝްވަރާތަކުގައި ބައިވެރިވާ ފަރާތްތަކުން ވަނީ ބުނެފައެވެ.ޖަލުބަންދުގައި ތިބި މީހުންނާއި، ގެދޮރު ދޫކޮށްފައިވާ މީހުން އަނބުރާ ގެނައުމާ ގުޅޭގޮތުން އިސްރާއީލުން އައު ޝަރުތުތަކެއް ތަޢާރަފުކޮށްފައިވާކަމަށް ބުނެ، އެކަމުގެ ސަބަބުން އެއްބަސްވުން ލަސްވަމުންދާކަމަށް ހަމާސްއިން ވަނީ ބުނެފައެވެ.
ނަމަވެސް ދެފަރާތުން ވެސް ބުނެފައިވަނީ މަޝްވަރާތައް ނުހުއްޓި ކުރިއަށްދާކަމަށެވެ.
