މި އަހަރުގެ އެންމެ ފަހު ރީތި ތާޜީޚް ކަމަށް ފާހަގަކުރެވޭ 24.12.2024 (މިއަދު) 52 ކައިވެންޏެއް ކޮށްދިނުމަށް ހަމަޖެހިފައިވާ ކަމަށް ފެމިލީ ކޯޓުން ހާމަކޮށްފިއެވެ.
އެ ކޯޓުން ހާމަކުރި ތަފާސްހިސާބަށް ބަލާއިރު، މިއަދު ރަސްމީ ގަޑީގައި 16 ކައިވެނި ކޮށްދިނުމަށް ހަމަޖެހިފައިވާއިރު، ނުރަސްމީ ގަޑީގައި ކޮށްދޭ 36 ކައިވެންޏާއެކު މިއަދު ޖުމުލަ 52 ކައިވެނި މާލޭގައި ކޮށްދިނުމަށް ވަނީ ހަމަޖެހިފައެވެ.
މިއަދު މާލޭގައި ގިނަ ކައިވެނިތަކެއް ކުރުމަށް ހަމަޖެހިފައިވާއިރު، އަތޮޅު ތެރޭގެ ރަށްތަކުގައިވެސް ގިނަ ބަޔަކު ކައިވެނި ކުރާނެ ކަމަށް ލަފާކުރެވެއެވެ. ނަމަވެސް، އެކަމުގެ ތަފްޞީލެއް އެއްވެސް އިދާރާއަކުން ހާމަކޮށްފައެއް ނުވެއެވެ.
މި އަހަރުގެ އޭޕްރީލް މަހުގެ 24 ވަނަ ދުވަހު (24.4.24) ގައިވެސް ފެމިލީ ކޯޓުން 41 ކައިވެނިކޮށްދީފައިވާއިރު، މިދިޔަ އަހަރުގެ ފަހު ރީތި ތާޜީޚް ކަމަށް ބެލެވުނު 23.11.2023 ގައި ފެމިލީ ކޯޓުން އަޤުދުކޮށްދީފައިވަނީ 29 ކައިވެންޏެވެ.
ރީތި ތާރީޚްތަކުގައި ކައިވެނި ކުރުމަކީ ދިވެހިންގެ ތެރޭގައި މިހާރު އާންމުވެފައިވާ އާދައެކެވެ. އެގޮތުން ކޮންމެ އަހަރަކުވެސް އަންނަ މިފަދަ ދުވަސްތަކުގައި ކުރާ ކައިވެނީގެ އަދަދުތައް އިތުރުވެއެވެ.
