ބަނގުރާ ބުއިމުކުގެ ކުށުގެ ދަޢުވާ ސާބިތުވި މީހަކު 40 އެތިފަހަރުން ޖަލްދުކުރުމަށް ކްރިމިނަލް ކޯޓުން ޙުކުމްކޮށްފިއެވެ.
މި މައްސަލައިގައި ޙުކުމްކޮށްފައިވަނީ ބ. އޭދަފުށި، ކުއްޅަވައްގެ، ޢަބްދުލްފައްތާޙު ޙަސަންގެ މައްޗަށެވެ. އޭނާގެ މައްޗަށް ދައުލަތުން ބަނގުރާ ބުއިކަމުގެ ދަޢުވާ އުފުލާފައިވަނީ، 22 ޖުލައި 2024 ގެ 19:50 ހާއިރު، މާލޭ ކާނިވަލް ސަރަހައްދުގައި ޕާކުކޮށްފައި އޮތް ކާރެއްގައި ބަނގުރާ ގެންގުޅުނު ކަމަށް ތުހުމަތު ކުރެވުނު މައްސަލައިގައި ފުލުހުންގެ ބެލުމުގެ ދަށަށް ގެންގޮސް ސުވާލުކުރުމުން، މި މައްސަލައިގައި ފެނުނު ބަނގުރަލަކީ އޭނާ ބޯން ގެންގުޅުނު ތަކެތި ކަމަށް ބުނެ، ބަނގުރާ ބުއިމުގެ ކުށަށް އިޢުތިރާފުވެފައިވާތީ އެވެ.
މި މައްސަލައާ ގުޅިގެން ކްރިމިނަލް ކޯޓުން ވަނީ ޢަބްދުލްފައްތާޙު ޙަސަންގެ މައްޗަށް 40 އެތިފަހަރުން ޖަލްދުކުރުމާއެކު، 2،700 ރުފިޔާއިން ޖޫރިމަނާކޮށް، 18 ޑިސެންބަރު 2024 އިން ފެށިގެން އެއް މަސް ދުވަހުގެ ތެރޭގައި ޖޫރިމަނާގެ ފައިސާ ދެއްކުމަށް ޙުކުމްކޮށްފައެވެ.
ދިވެހިރާއްޖޭގެ ޤާނޫނުލްއުޤޫބާތުގެ 411 ވަނަ މާއްދާގެ (ޅ) ގެ 3 ގައި ބަޔާންކޮށްފައިވާ ގޮތުން "ޖަލްދުކުރުން" ކަމަށް ބުނެފައި އެވަނީ، ހަށިގަނޑަށް ނުރައްކާތެރި އަނިޔާ ނުލިބޭނޭ ގޮތެއްގެމަތިން، އަދަބެއް ރަމްޒުކޮށްދިނުމުގެ ގޮތުން، ހަންމުށިން ނުވަތަ ދުއްރައިން މީހެއްގެ ގައިގާ ތަޅާތެޅުމަށެވެ. ޖަލްދު ކުރާހިނދު، އެ އަދަބަކަށް ހުއްދަ ކުރެވިގެންވާ ހުރިހާ އެތިފަހަރެއް ޖަހަންވާނީ އެކަކެވެ. އަދި ޖަލްދުކުރާ މީހާގެ އަތުގެ ކުޑަހުޅު ނޫނީ ލަންބައިގެން ނުވާނެއެވެ. އަދި އޭނާގެ އަތުގެ މުލައްދަނޑިއަށް އެއްވެސް ބާރެއް ލައިގެން ނުވާނެއެވެ. ނުވަތަ ކޮނޑާއި އުނަގަނޑާއި ފުރަގަހާއި ފަޔާއި ފުންނާބުގެ ޙަރަކާތެއްގެ ބާރު ބޭނުން ކޮށްގެން ނުވާނެއެވެ.
މި ލިޔުން ކިޔާލުމުން
