މާޒީގައި ވެރީން ވައްކަމާއި، ކޮރަޕްޝަނަށް ބީރު ކަންފަތެއްދީ، ރިއެކްޓް ނުކުރި ނަމަވެސް މި ސަރުކާރުން އެފަދަ ކަންކަމަށް ފުރިހަމައަށް ރިއެކްޓް ކުރާނެ ކަމަށް ރައްޔިތުންގެ މަޖިލީހުގެ ފުނަދޫ ދާއިރާގެ މެންބަރު މުޙައްމަދު މަމްދޫހު މިއަދު ވިދާޅުވެއްޖެއެވެ.
މަމްދޫހު މިހެން ވިދާޅުވީ "ބިންވެރިޔާ" ސްކީމަށް ޝަރުތު ހަމަނުވާ އެތައް ބަޔަކަށް ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ) އިން ދޮގު ލިޔުން ތައްޔާރުކޮށް، މަކަރާއި ހީލަތުން ބިންތައް ދީފައިވާ ކަމަށް ބުނާ މައްސަލަ ބަލަން ފަށައި، އެކަމުގައި ތުހުމަތުކުރެވޭ ފަރާތްތަކާމެދު ފިޔަވަޅު އަޅާފައިވަނިކޮށް އެކްސްގައި ކުރެއްވި ޕޯސްޓެއްގެއެވެ.
މަމްދޫހު ވިދާޅުވީ މިއަދު ފެނިގެން މިދަނީ ވައްކަމަށް މަގުފަހިވާނެ ކަންކަމަކަށް ރައީސް ޑރ. މުޙައްމަދު މުޢިއްޒު ޖާގަ ނުދެއްވާނެ ކަމާއި، އެފަދަ ކަންކަން ‘ޓޮލަރޭޓު’ ނުކުރައްވާނެކަން ކަމަށެވެ. އަދި ކަމާގުޅުން ހުރި މުއައްސަސާތަކާއި، ކޮމިޝަންތައް، ފުރިހަމަ ބާރުވެރިކަމުގައި ނުފޫޒެއްނެތި، ހަރަކާތްތެރިވުމުގެ މިނިވަންކަން ލިބިދީފައި އޮތްކަން ކަމަށެވެ.
މަމްދޫހު ވިދާޅުވީ މިއީ މާޒީގައި ސަރުކާރުތަކުގެ ތެރެއިން ފެނިގެން ދިޔަ ކަމެއް ނޫން ކަމަށެވެ. މާޒީގައި ފެނިގެންދިޔައީ މިނިވަން މުއައްސަސާތަކުން ސަރުކާރުގެ ކުންފުނިތަކުގެ ވައްކަންތައް ބަލަން ފަށާ ހިސާބުން ވައްކަންތައް ފޮރުވުމަށްޓަކައި އެ މުއައްސަސާތައް ކޮށާލައި، ބާރު ކަނޑުވާލައި، މުއައްސަސާތަކާއި ގުޅުންހުރި އިދާރާތައް 'ޕެރަލައިޒް' ކޮށްލަމުން ދިޔަ މަންޒަރު ކަމަށެވެ.
އެގޮތުން ބަލާއިރު، ވެންޓިލޭޓަރު ވައްކަމާއި، ބިލިއަނުން ސަރުކާރުގެ ކުންފުނިތަކުން ހިންގަމުންދިޔަ ވައްކަންތަކާއި، ފްލެޓަކާއި ބިންތަކުން ކުރަމުންދިޔަ ވައްކަންތައް ބެލޭނެ މަގުތައް، މާޒީގައި ސަރުކާރުތަކުން ދިޔައީ ބަންދުކުރަމުން ކަމަށް މަމްދޫހު ވިދާޅުވިއެވެ. އަދި ރަށްތަކާއި ފަޅުތައް ގާތް ބޭބޭފުޅުންނަށް ބަހާލައި، ބިލިއަނުން ރައްޔިތުންނަށް ގެއްލުން ލިބޭނެ މަގަށް ކަންކަން ކުރަމުންދިޔައިރު، އޭރުގެ ވެރީން ތިއްބެވީ އެކަންކަމަށް ހިތްވަރުދީ، އެކަންކަމުގައި ފުރިހަމައަށް ބައިވެރިވެގެން ކަމަށް މަމްދޫހު ވިދާޅުވިއެވެ.
ގޯހުން ކަމެއް ހިނގައިފިނަމަ، ގޯހުން ކަމެއް ކޮށްފިނަމަ، ގާނޫނު ފުރިހަމައަށް ތަންފީޒުކުރެވިގެންދާނެ. މާޒީގައި ވެރީން ވައްކަމާއި ކޮރަޕްޝަނަށް، ބީރު ކަންފަތެއްދީ ރިއެކްޓް ނުކުރިކަމުގައިވީ ނަމަވެސް، އަދުގެ ސަރުކާރުން ކަންކަމުގައި އޮންނަ އުސޫލުން ފުރިހަމަ ގޮތުގައި ރިއެކްޓް ކުރައްވާނެ.
މަމްދޫހު ވިދާޅުވީ ވައްކަމާއި ކޮރަޕްޝަނަކީ، ރައީސް ޑރ.މުޢިއްޒު ކުޑަކޮށްވެސް 'ޓޮލަރޭޓު' ކުރައްވާނެ ކަންކަމެއް ނޫން ކަމަށާއި، މިއަދު ފެނިގެން މިދަނީ އަމަލީ ގޮތުން އެކަން ސާބިތުކޮށްދެއްވަމުން ގެންދަވާ މަންޒަރު ކަމަށެވެ.
މި ލިޔުން ކިޔާލުމުން
