ދުންފަތުގެ ދުމުން މުޖުތަމަޢު ރައްކާތެރިކުރުމަށް މިހާރު އެކުލަވާލާ ޤަވާާޢިދަށް ޢަމަލުކުރަން ފެށުމުން މިހާރު ދުންފަތުގެ އިސްތިޢުމާލު ނުކުރެވޭނެ ކަމަށް ކަނޑައެޅޭ ތަންތަން އިތުރު ވެގެންދާނެ ކަމަށް ހެލްތު މިނިސްޓްރީން ވިދާޅުވެއްޖެއެވެ.
ހެލްތު މިނިސްޓްރީ އާއި ޓީވީމޯލްޑިވްސް ގުޅިގެން ގެނެސްދޭ "ދަފަރާ" ޕެނަލް ޑިސްކަޝަންގައި ހެލްތު މިނިސްޓްރީގެ ޑެޕިއުޓީ މިނިސްޓަރ އަލްއުސްތާޛު އިސްމާއިލް ޒާހިރު ވިދާޅުވީ އެ ޤަވާއިދަށް ކޮމެންޓްތައް ލިބި މިހާރު ޑްރަފްޓް ނިމިފައިވާކަމަށެވެ.
އެ ޤަވާާޢިދުގެ ގެޒެޓް ކުރުމުން ދުންފަތުގެ އިސްތިއުމާލުކުރެވޭނެ ތަންތަނާއި ނުކުރެވޭނެ ތަންތަނަށް ބޮޑެތި ބަދަލުތަކެއް އަންނާނެއެވެ. އެގޮތުން މިހާރު ދުންފަތުގެ އިސްތިޢުމާލު ނުކުރެވޭނެ ކަމަށް ކަނޑައަޅާފައިވާ ތަންތަން އިތުރު ވެގެންދާނެއެވެ. ހަމަ މިއާއި އެކު ދުންފަތުގެ އިސްތިއުމާލު ކުރެވޭނެ ތަންތަންވެސް ސާފުކޮށް ކަނޑައެޅި ތަންފީޒީ އިދާރަކުން މި ޤާނޫނު ތަންފީޒުކުރުމަށް ކުރަންޖެހޭ ކަންކަން ފަސޭހަވެގެންދާނެކަމަށެވެ.
ދުންފަތް ކޮންޓްރޯލް ކުރުމަށް ޤާނޫނަށް ގެނެވުނު އިސްލާހާއި ގުޅިގެން އަތޮޅުތަކުގައި އާންމުން ހޭލެންތެރިކުރުމަށް، ކައުންސިލްތަކާއި، އަންހެނުންގެ ތަރައްޤީއަށް މަސައްކަތް ކުރާ ކޮމިޓީ، އަދި ޖަމްޢިއްޔާ ތަކާއި ގުޅިގެން މިނިސްޓްރީން ދަނީ މަސައްކަތްކުރަމުނެވެ. ސަރުކާރުގެ އެކި އެކި މުއައްސަސާތަކާއި ކަމާގުޅޭ ފަރާތްތައް އަހުލުވެރި ކުރުމާއި އެފަރާތްތައް ގުޅިގެން މަސައްކަތްތަކެއް ކުރެވެމުންދާކަމަށް ރޭގެ ޕެނަލް ޑިސްކަޝަންގައި ޑެޕިއުޓީ މިނިސްޓަރ އިސްމާޢީލް ޒާހިރު ވިދާޅުވިއެވެ.
"ދަފަރާ" ޕެނަލް ޑިސްކަޝަންގައި، މިނިސްޓްރީ އޮފް ހެލްތު ގެ އިތުރުން، މޯލްޑިވްސް ޕޮލިސް ސާރވިސް، އަދި މޯލްޑިވްސް ކަސްޓަމްސް ސަރވިސް ގެ ފަރާތުންވެސް ބައިވެރިވަޑައިގެންނެވިއެވެ.
ޕެނަލްގައި ބައިވެރި ވަޑައިގެންނެވި ސަބް އިންސްޕެކްޓަރ އޮފް ޕޮލިސް ނިޒާމް މުޙައްމަދު ވަނީ މަގުމަތީގައާއި އާންމު ތަންތަނުގައި ވޭޕް ބޭނުން ކުރާނަމަ އެކަަން ފުލުހުންނަށް ރިޕޯޓްކުރުމަށް އެދިވަދައިގެންފައެވެ. އަދި އެކަމުގެ ރިޕޯޓް ލިބުމާއެކު ފުލުހުން އެތަނަކަށް ގޮސް ފިޔަވަޅު އަޅަމުންދާނެކަމަށް އޭނާ ވިދާޅުވިއެވެ.
ހެލްތު މިނިސްޓްރީން މިހާރު ދަނީ ދުންފަތް ކޮންޓްރޯލް ކުރުމާ ބެހޭ ގާނޫނަށް ގެނައި އިސްލާޙުގެ ދަށުން އެ ގާނޫނު ތަންފީޒުކުރުމަށް ފުލުހުން ނެތް ރަށްރަށުގައި ކައުންސިލްގެ އެހީތެރިކަން ހޯދުމުގެ މަސަައްކަތްވެސް ކުރަމުންނެވެ.
ވޭޕް ވިއްކާ އަދި ބޭނުންކުރާ މީހުންނަށް ގާނޫނީ ފިޔަވަޅު އަޅަމުން ގެންދާނެކަމަށާއި ޖޫރިމަނާ ކުރެވޭ ފަރާތްތަކަށް އެކަމުގެ މައުލޫމާތު މޯބައިލް ފޯނުގެ ޒަރިއްޔާއިން މެސެޖެއް މެދުވެރިކޮށް ފޮނުވޭނެކަމަށް ފުލުހުންވަނީ ހާމަކޮށްފައެވެ.
ދުންފަތާ ދުރުހެލިވާން ބޭނުންވާ ފަރާތްތަކަށް މިނިސްޓްރީ އޮފް ހެލްތު އިން ވަނީ ކުއިޓްލައިނެއް ޤައިމްކޮށްފައެވެ. ނަންބަރަކީ 1676. މި ނަންބަރުން ދުންފަތަށް ދެވިހިފާފައިވާ ފަރާތްތަކަށް ހުއްޓާލުމަށް ބޭނުންވާ ފަރާތްތަކަށް އެކަމަށް މަގުފަހިކޮށްދިނުމަށް އެހީތެރިވެދޭނެއެވެ. މި ނަންބަރުން 24 ގަޑިއިރު ޚިދުމަތް ލިބޭނެއެވެ.
މި ލިޔުން ކިޔާލުމުން
