ޕެސިފިކް ކަނޑުގައިވާ ޖަޒީރާ ގައުމެއް ކަމަށްވާ ވަނުއާޓޫއަށް މިއަދު ބާރުގަދަ ބިންހެލުމެއް އަތުވެއްޖެއެވެ.
އެމެރިކާގެ ޔުނައިޓެޑް ސްޓޭޓްސް ޖިއޮލޮޖިކަލް ސަރވޭއިން މިއަދު ރިޕޯރޓްކޮށްފައިވާ ގޮތުގައި ވަނުއާޓޫގެ ވެރިރަށް ޕޯޓް ވިލާ ކައިރިއަށް އައީ 7.4 މެގްނިޓިއުޑްގެ ބާރުގަދަ ބިންހެލުމެކެވެ. އަދި ހޮނޮލޫލޫގައި ހުންނަ ޕެސިފިކް ސުނާމީ ވޯނިންގ ސެންޓަރުން ވަނީ މި ބިންހެލުމުގެ ސަބަބުން ސުނާމީއެއް އުފެދިދާނެ ކަމުގެ އިންޒާރުވެސް ދީފައެވެ.
ޔުނައިޓެޑް ސްޓޭޓްސް ޖިއޮލޮޖިކަލް ސަރވޭއިން ފުރަތަމަ ނެރުނު ރިޕޯޓުގައި ބުނެފައިވަނީ ބިންހެލުން އައިސްފައި ވަނީ ވަނޫއާޓޫގެ ވެރިރަށް ޕޯރޓް ވިލާ އާއި 37 ކިލޯމީޓަރު (22.9 މޭލު) ދުރުމިނުގައި އާއި އަދި 10 ކިލޯމީޓަރު (6.2 މޭލު) ފުންމިނުގައި ކަމަށެވެ.
ފަހުން އައި ރިޕޯޓުތަކުގައި ބުނެފައިވަނީ ބިންހެލުން އައިސް ފައިވަނީ 43 ކިލޯމީޓަރު ފުންމިނުގައި (26.7 މޭލު) ކަމަށެވެ. އަދި އޭގެ ފަހުން ހަމަ އެ ސަރަޙައްދުގައި 5.5 މެގްނިޓިއުޑްގެ އާފްޓަރޝޮކްތައް އައިސްފައިވެއެވެ.
ސޯޝަލް މީޑިއާގައި ޕޯސްޓްކޮށްފައިވާ ފުޓޭޖްތަކުގައި ދައްކާގޮތުން ޕޯޓް ވިލާގައި ހުރި ބޭރުގެ އެމްބަސީތައް ހިމެނޭ އިމާރާތެއްގެ ކޮންކްރީޓް ތަނބުތައް ވެއްޓި އަދި ކުޑަދޮރުތައް ހަލާކުވެފައިވެއެވެ. މީގެ ތެރޭގައި އެމެރިކާ، ފްރާންސް، ނިއުޒީލަންޑް އަދި ޔުނައިޓެޑް ކިންގްޑަމްގެ އެމްބަސީތައް ހިމެނެއެވެ.
މި ހާދިސާއާއި ގުޅީގެން, ވިލާ ސެންޓްރަލް ހޮސްޕިޓަލުން ވަނީ އެކަކު މަރުވެފައިވާކަން ކަށަވަރުކޮށްދީފައިވެއެވެ.
ބިންހެލުމަށްފަހު ވަނުއާޓޫ ސަރުކާރުގެ ވެބްސައިޓްތަކާއި ފުލުހުންނާއި ސަރުކާރުގެ ގިނަ އިދާރާތަކުގެ ފޯނުތައް ވެސް މަސައްކަތް ނުކުރެއެވެ.
ހޮނޮލޫލޫގައި ހުންނަ ޕެސިފިކް ސުނާމީ ވޯނިންގ ސެންޓަރުން ބުނާގޮތުގައި ބިންހެލުމަށްފަހު ރާޅުތަކެއް ފެނިފައިވެއެވެ. ނަމަވެސް ފަހުން ވަނީ ކައިރީގައިވާ ރަށްތަކަށް ކުރިމަތިވެފައިވާ ސުނާމީގެ ނުރައްކާ ނިމުމަކަށް އައިސްފައިވާ ކަމަށް އިޢުލާނުކޮށްފައެވެ.
މި ލިޔުން ކިޔާލުމުން
