ދެކުނު ކޮރެއާގެ ރައީސް ޔޫން ސުކް ޔެއޯލް މަގާމުން ވަކިކުރުމަށް، އެ ގައުމުގެ ގާނޫނު ހަދާ މަޖިލީހުން މިއަދު ނިންމައިފިއެވެ.
މާޝަލް ލޯ ތަންފީޒުކުރަން ނިންމުމަށް ރައީސް ޔޫން ކުރި ނާކާމިޔާބު މަސައްކަތުގެ ސަބަބުން ގައުމުގައި އުފެދުނު ބޮޑެތި ހަމަނުޖެހުންތަކާއެކު ޔޫން މަގާމުން ވަކިކުރުމަށް ގޮވާލައި އިހުތިޖާޖުކުރަން ވަނީ ފަށާފައެވެ.
މިކަމާ ގުޅިގެން ރައީސް މަގާމުން ދުރުކުރުމަށްޓަކައި އިދިކޮޅު ޕާޓީން މަޖިލީހަށް ހުށަހެޅި ބިލަށް ތާއީދުކޮށް, ޖުމްލަ 204 މެންބަރުން ވަނީ ވޯޓް ދީފައެވެ. މީގެ ތެރޭގައި ޔޫންގެ ޕީޕަލްސް ޕަވަރ ޕާޓީ (ޕީޕީޕީ) ގެ ބައެއް މެންބަރުންވެސް ހިމެނެއެވެ.
ނަމަވެސް މި ނިންމުން ތަންފީޒުކުރުމަށްޓަކައި ކޮންސްޓިޓިއުޝަނަލް ކޯޓުގެ ތާއީދު ބޭނުންވާނެވެ. މަޖިލީހުގެ ނިންމުން ދެމެހެއްޓުމަށްޓަކައި ކޯޓުން ވަކި ގޮތެއް ނިންމުމަށް 180 ދުވަހުގެ މުއްދަތެއް ވަނީ ދީފައެވެ. އަދި ކޯޓުން މިކަމަށް ތާޢީދުކޮށްފިނަމަ, 60 ދުވަސް ތެރޭގައި ރިޔާސީ އިންތިޚާބެއް ބާއްވަން ޖެހޭނެއެވެ.
މަޖިލީހުގެ ނިންމުމާ ގުޅިގެން ދެކުނު ކޮރެއާގެ ގާނޫނާ އެއްގޮތަށް ރައީސް ޔޫން ވަނީ މަގާމުން ސަސްޕެންޑްކޮށް, ވަގުތީ ރައީސް ކަމަށް ބޮޑު ވަޒީރަކަށް ހުރި ހަން ޑަކް-ސޫ ހަމަޖައްސާފައެވެ.
ޔޫން އިމްޕީޗްކުރުމަށް ދެކުނު ކޮރެއާގެ އާންމުންގެ ތާއީދު ވަރަށް ބޮޑެވެ. ރައީސް މަގާމުން ވަކިކުރުމަށް ބޭއްވުނު ޖަލްސާ ކުރިއަށް ދިޔަ ވަގުތު ގިނަ އަދަދެއްގެ ރައްޔިތުން ވަނީ މަޖިލީސް ކައިރިއަށް އެއްވެ އޭނާ މަގާމުން ވަކިކުރުމަށް ގޮވާފައެވެ.