އިލެކްޝަންސް ކޮމިޝަން (އީސީ) ގެ މެންބަރުކަމަށް އައްޔަންކުރެއްވުމަށް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނަން ފޮނުއްވާފައިވާ ބޭފުޅުންނާ ގުޅޭ ގޮތުން ޝަކުވާ ހުށަހެޅުމަށް ފުރުސަތު މިރޭ ހުޅުވާލައިފިއެވެ.
އީސީއަށް ދެ މެންބަރަކު އައްޔަންކުރެއްވުމަށްޓަކައި މަޖިލީހަށް ނަން ފޮނުއްވީ، އެ ކޮމިޝަނުގެ ނައިބު ރައީސްކަމުގައި ހުންނެވި ޢަލީ ނަޝާތުއާއި، މެންބަރު ކަމުގައި ހުންނެވި މުޙައްމަދު އާސިފް މަގާމުން ވަކިކުރުމަށް މިދިޔަ މަހުގެ 25 ވަނަ ދުވަހު މަޖިލީހުން ފާސްކުރުމާ ގުޅިގެންނެވެ.
އެގޮތުން އީސީގެ މެންބަރުކަމަށް ހުޅުވައިލުމުން ކުރިމަތިލެއްވި ބޭފުޅުންގެ ތެރެއިން ޝަރުތު ހަމަވާ ބޭފުޅުން ނަންތައް، ރައީސް އިސްކަންދެއްވި ތަރުތީބުން މަޖިލީހަށް ހުށަހެޅުއްވީ މިއަދުއެވެ. އެއާއެކު މި މައްސަލަ ދިރާސާކުރުމަށް މިނިވަން މުއައްސަސާތަކުގެ ކޮމިޓީއަށް ވަނީ ފޮނުވާފައެވެ.
ރައީސް އިސްކަން ދެއްވާފައިވާ ތަރުތީބު:
މުޙައްމަދު ޒާހިދު ދަފްތަރު ނަންބަރު ރސ 1548
ޢަބްދުއްރަޙްމާން ޞަލާޙް ރަޝީދު ރޯޒް/ކ.ހުރާ
މަޖިލީހުގެ އިދާރާއިން ކުރި އިއުލާނެއްގައި ބުނެފައިވަނީ އެ ދެބޭފުޅުންނާމެދު ޝަކުވާ ހުށަހެޅުމުގެ ފުރުސަތު މި މަހުގެ 19 ވަނަ ދުވަހުގެ 12:00 އާ ހަމައަށް ހުޅުވާލައިފައިވާ ކަމަށެވެ.
އެގޮތުން އެއްވެސް ޝަކުވާއެއް އޮތްނަމަ، ޝަކުވާ ހުށަހަޅާ ފަރާތުގެ ފުރިހަމަ ނަމާއި، ދާއިމީ އެޑްރެހާއި ގުޅޭނެ ފޯނު ނަންބަރު އެނގޭނެ ގޮތަށް އެ ޝަކުވާއެއް ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީގެ އީމެއިލް އެޑްރެސް [email protected] އަށް ނުވަތަ މަޖިލީހުގެ އިދާރާއަށް ލިޔުމުން ފޮނުވުމަށް ވަނީ އެދިފައެވެ.
މި ލިޔުން ކިޔާލުމުން
