އަންނަ ރަމަޟާން މަހު ރާއްޖޭގެ މިސްކިތްތަކުގައި އިމާމުވެ ޙިފްޡުކޮށް ތަރާވީހު ނަމާދުކުރާނެ ދިވެހި ހާފިޒުން ހޯދުމަށް މިނިސްޓްރީ އޮފް އިސްލާމިކް އެފެއާޒުން މިއަދު އިއުލާނުކޮށްފިއެވެ.
މިނިސްޓްރީން ކުރި އިއުލާނެއްގައި ބުނީ އިމާމުވެ ޙިފްޡުކޮށް ތަރާވީހު ނަމާދުކުރުމަށް ބޭނުންވާ ދިވެހި ހާފިޒުންނަށް ފުރުސަތު ހުޅުވާލައިފައިވާ ކަމަށެވެ.
އެގޮތުން މާލޭސިޓީގެ މިސްކިތްތަކުގައި އިމާމުވެ ޙިފްޡުކޮށް ތަރާވީޙު ނަމާދު ކުރުމަށް އެދޭ ދިވެހި ހާފިޒުނ ކަނޑައެޅިފައިވާ ފޯމު ފުރިހަމަކޮށް ލިޔުންތަކާއެކު 2025 ޖަނަވަރީ 20 ވާ ހޯމަ ދުވަހުގެ 14:00 ގެ ނިޔަލަށް އެ މިނިސްޓްރީއަށް ހުށަހެޅުއްވުމަށް ވަނީ އެދިފައެވެ. އަދި ރަށްރަށުގެ މިސްކިތް ތަކުގައި އިމާމުވެ ޙިފްޡުކޮށް ތަރާވީހު ނަމާދު ކުރުމަށް އެދޭ ދިވެހި ހާފިޒުން ކަނޑައެޅިފައިވާ ފޯމާއި ލިޔުންތަކާއެކު 2025 ފެބުރުވަރީ 06 ވާ ބުރާސްފަތި ދުވަހުގެ 14:00 ގެ ކުރިން ހުށަހަޅުއްވާނީ، ސިޓީ ކައުންސިލްގެ އިދާރާތައް ހިމެނޭ ރަށްރަށާއި އަދި އެ ރަށެއްގެ ރަށު ކައުންސިލްގެ އިދާރާއަށް ކަމަށް އިއުލާނުގައި ބުނެފައިވެއެވެ.
މީގެއިތުރުން ސިޓީ ކައުންސިލްގެ އިދާރާތައް ހިމެނޭ ރަށްރަށާއި އެރަށެއްގެ ރަށު ކައުންސިލްގެ އިދާރާ އިން ފޯމާއި އެހެނިހެން ލިޔުންތައް އެ މިނިސްޓްރީއަށް ހުށަހަޅުއްވާނީ، 2025 ފެބުރުވަރީ 16 ވާ އާދިއްތަ ދުވަހުގެ 14:00 ގެ ކުރިންނެވެ.
އިމާމުވެ ޙިފްޡުކޮށް ތަރާވީހު ނަމާދުކުރުމަށް އެދޭ ފޯމު ކައުންސިލްގެ އިދާރާ ތަކުންނާއި އިސްލާމިކް މިނިސްޓްރީގެ ވެބްސައިޓުން ލިބެން ހުންނާނެއެވެ.
މިނިސްޓްރީގެ އިއުލާނުގައިވާ ގޮތުން ދިވެހި ޙާފިޡުންނަށް އެލަވަންސް ފައިސާ ދެވޭނީ އިމާމުވެ ޙިފްޡުކޮށް ތަރާވީހު ނަމާދު ކުރައްވާ ކޮންމެ ރެޔަކަށް 500 ރުފިޔާގެ މަގުންނެވެ. އެގޮތުން ގިނަވެގެން ފައިސާ ދޭނީ މިސްކިތަކަށް ދިވެހި 02 ޙާފިޡުންނަށެވެ.
އިމާމުވެ ޙިފްޡުކޮށް ތަރާވީޙު ނަމާދު ކުރުމަށް ހުއްދަ ދެވޭނީ މާލެ ސިޓީ ފިޔަވައި އެހެން ސިޓީ ކައުންސިލްގެ އިދާރާތައް ހިމެނޭ ރަށްރަށާއި އެ ރަށެއްގެ ރަށު ކައުންސިލްގެ އިދާރާތައް މެދުވެރިކޮށް މިނިސްޓްރީ އަށް ހުށަހަޅުއްވާ ލިޔުންތަކަށް ބަލާފައެވެ. އަދި މި އުސޫލާ ޚިލާފަށް ހުށަހަޅުއްވާ ފޯމުތަކަށް އަމަލުކުރެވެން ނޯންނާނެ ކަމަށް މިނިސްޓްރީގެ އިއުލާނުގައި ބުނެފައިވެއެވެ.
މިނިސްޓްރީން މިއަދު ކުރި އެހެން އިއުލާނެއްގައި ބުނީ އަންނަ ރަމަޟާންމަހު މަސްޖިދުއްސުލްޠާން މުޙައްމަދު ތަކުރުފާނުލް އަޢުޡަމް (އިސްލާމީ މަރުކަޒު) އާއި، މަސްޖިދު މަލިކި ސަލްމާންގައި އިމާމުވެ ޙިފްޡުކޮށް ތަރާވީހު ނަމާދުކުރާ ފަރާތްތަކަކީ ދިވެހި ހާފިޒުން ކަމުގައި ހެދުމަށާއި، އެކަމަށް އެންމެ ގާބިލު ދިވެހި ހާފިޒުން ހޯދަން ބޭނުންވާ ކަމަށެވެ.
އެހެންކަމުން އިމާމުވެ ޙިފްޡުކޮށް ތަރާވީހު ނަމާދުކުރުމަށް ބޭނުންވާ ދިވެހި ހާފިޒުންނަށް ވަނީ ފުރުސަތު ހުޅުވާލައިފައެވެ.
އިސްލާމީ މަރުކަޒާއި، ސަލްމާން މިސްކިތުގައި ޙިފްޡުކޮށް ތަރާވީހު ނަމާދު ކުރުމަށް އެދި ހުށަހަޅުއްވާ ފަރާތްތަކުގެ މެދުގައި ޓެސްޓެއް ބޭއްވޭނެ ކަމަށާއި، އެއަށްފަހު ޙިފްޡު އެންމެ ރަނގަޅު 04 ފަރާތެއް ކަނޑައެޅިގެންދާނެ ކަމަށް މިނިސްޓްރީން ބުންޏެވެ.
މިނިސްޓްރީން ބުނީ އެ ދެ މިސްކިތުގައި އިމާމުވެ ޙިފްޡުކޮށް ތަރާވީހު ނަމާދު ކުރުމަށް ކުރިމަތިލުމަށް 2025 ފެބުރުވަރީ 16 ވާ އާދިއްތަ ދުވަހުގެ 14:00 ގެ ނިޔަލަށް ފުރުސަތު ހުޅުވާލައިފައިވާ ކަމަށެވެ.
އެ ދެ މިސްކިތުގައި ދިވެހި ހާފިޒުންނަށް އެލަވަންސް ފައިސާ ދޭނީ އިމާމުވެ ޙިފްޡުކޮށް ތަރާވީހު ނަމާދުކުރާ ކޮންމެ ރެޔަކަށް 700 ރުފިޔާގެ މަގުންނެވެ. މިގޮތުން ގިނަވެގެން ފައިސާ ދޭނީ މިސްކިތަކަށް ދިވެހި 02 ހާފިޒުންނަށެވެ.
މި ލިޔުން ކިޔާލުމުން
