މުޖުތަމައުގެ ހަމަޖެހުމާއި މަސްލަހަތު ނަގާލުމަަށް ގޮވާލުމުގެ އިތުރުން އަނިޔާވެރި އަމަލުތައް ކުރުމަށް ހިތްވަރު ލިބޭ ގޮތަށް ފާޅުކުރާ ޚިޔާލަކީ، ޚިޔާލުފާޅުކުރުމުގެ މިނިވަންކަމުގެ ހައްގުގެ ރޫހާ ޚިލާފު ކަމެއް ކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އިން މިރޭ ބުނެފިއެވެ.
އެ ކޮމިޝަނުން މިރޭ ނެރުނު ބަޔާނެގައި ބުނީ އެމްޑީޕީން ދާދިފަހުން ބާއްވާފައިވާ ހަފުލާތަކެއްގައި އެ ޕާޓީގެ ޗެއާޕާސަން ފައްޔާޟް އިސްމާޢީލާއި، އެ ޕާޓީގެ އާންމު މެންބަރަކު ވާހަކަ ދައްކާފައިވަނީ އާންމުންގެ މެދުގައި ނަފުރަތު އުފައްދައި އަނިޔާވެރިވުމަށް ހިތްވަރު ލިބޭ ގޮތަށް ކަމަށެވެ.
ޚިޔާލު ފާޅުކުރުމުގެ މިނިވަންކަމަކީ ވަރަށް ފުޅާކޮށް ގާނޫނުއަސާސީގެ ދަށުން ލިބިދީފައިވާ ހައްގެއް ނަމަވެސް، އެ ހައްގުގެ ބޭނުންކުރަންވާނީ ވަކި ހުދޫދެއްގެ ތެރެއިން އަނެކާގެ ހައްގުތަކަށް އިހުތިރާމު ކުޑަނުވާ ގޮތަށް ކަމަށް އެޗްއާރްސީއެމްއިން ބުންޏެވެ.
ސިޔާސީ ޕާޓީތަކުން ބާއްވާ ޖަލްސާތަކާއި އެއްވުންތަކާއި، މީޑިއާ އަދި ސޯޝަލް މީޑިއާގެ ޒަރިއްޔާއިން ފާޅުކުރެވޭ ޚިޔާލުތަކުގައި ވެސް މީހުންގެ މެދުގައި ނަފުރަތު އުފެއްދުމަށާއި، މުޖުތަމައުގެ ހަމަޖެހުމާއި މަސްލަހަތު ނަގާލުމަަށް ގޮވާލުމުގެ އިތުރުން އަނިޔާވެރި އަމަލުތައް ކުރުމަށް ހިތްވަރު ލިބޭ ގޮތަށް ފާޅުކުރާ ޚިޔާލަކީ ގާނޫނުއަސާސީގެ 27 ވަނަ މާއްދާއިން ލިބިދޭ ޚިޔާލުފާޅުކުރުމުގެ މިނިވަންކަމުގެ ހައްގުގެ ރޫހާ ޚިލާފު ކަމެއް.
އެޗްއާރްސީއެމްއިން ބުނީ މިފަދަ އަމަލުތައް ކުރުމަށް ހިތްވަރު ލިބޭ ގޮތަށް ގޮވާލައި ފާޅުކުރާ ޚިޔާލުފާޅުކުރުންތަކަކީ އެ ކޮމިޝަނުން ވަރަށް ކަންބޮޑުވާ ކަމެއް ކަމަށެވެ. އަދި މިފަދަ އަމަލުތައް ކުށްވެރިކޮށް، ސިޔާސީ ޕާޓީތަކުންނާއި، ޕާޓީތަކުގެ އިސް ފަރާތްތަކުން މިފަދަ އަމަލުތައް ނުކުރުމަށް ވަނީ ގޮވާލައިފައެވެ.
ގާނޫނުއަސާސީގެ 27 ވަނަ މާއްދާއިން ލިބިދޭ ޚިޔާލުފާޅުކުރުމުގެ މިނިވަންކަމުގެ ހައްގުގެ ބޭނުން ހިފުމުގައި އެހެން މީހުންގެ އިންސާނީ ކަރާމަތަށާއި ހައްގުތަކަށް ހުރުމަތްތެެެރިކޮށް ހިތުން އިސްކޮށް، ހަމަނުޖެހުން ހިންގުމަށާއި، އަނިޔާވެރި އަމަލުތައް ކުރުމަށް ހިތްވަރު ލިބޭފަދަ އެއްވެސް އަމަލެއް ނުކުރުމަށް ވެސް ވަނީ އިލްތިމާސްކޮށްފައެވެ. އަދި ސިޔާސީ ހަރަކާތްތަކުގެ ތެރެއިން ޚިޔާލާއި ޝުއޫރު ފާޅުކުރުމުގައި އަނެކާގެ އަބުރާއި ނަފުސަށް ގެއްލުންވާފަދަ އަދި ނަފުރަތު އުފެދޭފަދަ އެއްވެސް އަމަލެއް ނުކުރުމަށާއި، ސިޔާސީ ޕާޓީތަކުން އިންތިޒާމުކުރާ ހަރަކާތްތަކުގައި އާންމު މަސްލަހަތު އިސްކޮށް، މިފަދަ ކަންކަން ނުހިނގާނެ ގޮތަކަށް ސިޔާސީ ހަރަކާތްތައް ރޭވުމަށް އިސްކަން ދިނުމަށް ސިޔާސީ ޕާޓީތަކަށް ވަނީ ގޮވާލައިފައެވެ.
މި ފަހުން ކުޅުދުށްފުށި ސިޓީގައި ބޭއްވި ޖަލްސާއެއްގައި އެމްޑީޕީ މެންބަރެއް ކަމަށްވާ ޢަބްދުއްރަޙްމާން އިސްމާޢީލް ވަނީ ކުރީގެ ރައީސް މުޙައްމަދު އަމީނަށް ހެދި ގޮތް ރައީސް ޑރ. މުޙައްމަދު މުޢިއްޒަށް ހަދަންޖެހޭ ކަމަށް ދޭހަަވާ ފަަދައިން ވާހަކަ ދައްކާފައެވެ.
އެމްޑީޕީން އިއްޔެ ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ މިކަމާ ގުޅިގެން ފައްޔާޟާ ސުވާލުކޮށްފައެވެ.
އެގޮތުން ޢަބްދުއްރަޙްމާން އިސްމާޢީލްގެ ވާހަކަ ދިފާއުކުރައްވައި ފައްޔާޟް ވިދާޅުވީ ޢަބްދުއްރަޙްމާން އެހެން އެ ވިދާޅުވީ ރައީސް ޑރ. މުޢިއްޒަށް ނަސޭހަތެއްގެ ގޮތުގައި ކަމަށާއި، ރާއްޖޭގެ ތާރީޚުގައި ހިނގާފައި ހުރި ކަންތައްތައް ވެރިންނަށް ހަނދާން ކޮށްދިނުމަކީ ކޮންމެހެން ކުރަން ޖެހޭ ކަމެއް ކަމަށެވެ.
ރައްޔިތުންނަށް ދެރަދިނީމާ ހަދަން ޖެހޭނީ ހަމަ މުޙައްމަދު އަމީނަށް ހެދިހެން ކަމަށާއި، ރައްޔިތުންނަށް އަނިޔާވެެރިވާނަމަ، ދިވެހި ރައްޔިތުން އެ ތާރީޚު އަލުން އިއާދަކުރާނެ ކަމަށް ވެސް އޭނާ ވިދާޅުވިއެވެ.
މި ލިޔުން ކިޔާލުމުން
