ރައްޔިތުންނަށް ޚިދުމަތް ދެމުން މި ގެންދަވަނީ ސިޔާސީ ގޮތުން އަމިއްލަ ފައިދާއެއް ހޯދުމަކަށް ނޫން ކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިހެން ވިދާޅުވީ އަރިއަތޮޅު އުތުރުބުރިއާއި މާލެ އަތޮޅުގެ ބައެއް ރަށްތަކަށް މިއަދު ފެއްޓެވި ދަތުރުގެ ފުރަތަމަ މަންޒިލެއްގެ ގޮތުން އއ.ތޮއްޑޫއަށް ވަޑައިގެން އެ ރަށު ރައްޔިތުންނާއި ބައްދަލުކުރައްވައި ވާހަކަފުޅު ދައްކަވަމުންނެވެ.
ރައީސް ވިދާޅުވީ މި ސަރުކާރު އައި ފަހުން ފާއިތުވެ އެއް އަހަރުގައި ޚިދުމަތް ދެމުން ގެންދެވީ ސިޔާސީ ވިސްނުން އެއްކިބާ ކުރެއްވުމަށްފަހު، އެއްވެސް ތަފާތެއްނުކުރައްވައި ހަމަހަމަ ގޮތެއްގައި ކަމަށެވެ.
އަޅުގަނޑު ޚިދުމަތްކުރާއިރުގައި ބޭނުންވަނީ އެއްވެސްވަރެއްގެ ސިޔާސީ ވިސްނުމެއް ނުގެންގުޅެ، މިއަދާ ހަމަޔަށް އައިއިރުގައިވެސް ރައްޔިތުންނަށް ޚިދުމަތްކުރުމުގައި އަޅުގަނޑަށް ހުރިހާ ރައްޔިތުންވެސް ހަމަހަމަ. ކައުންސިލްގެ ފަރާތުން ކުރާ ކަންކަމުގައި އަދި ޑަބްލިޔޫޑީސީގެ ފަރާތުން ކުރާ ކަންކަމުގައިވެސް ހުރިހާ ރައްޔިތުންނަށް ހަމަހަމަކަމާއެކީ ޚިދުމަތް ދޭނަން.
ރައީސް ވިދާޅުވީ ޚިދުމަތް ދިނުމުގައި ބައްލަވަނީ ގައުމަށް ރަނގަޅު، ގައުމަށް މުހިންމު ކަންކަން، ރައްޔިތުންނަށް ވިސްނައިދީގެން ކޮށްދެއްވުމަށް ކަމަށެވެ. އަދި ސިޔާސީ ގޮތުން އަމިއްލަ ފައިދާއެއް ހޯދުމުގެ ނިޔަތުގައި ނުވަތަ އެފަދަ ބޭނުމެއްގައި އެއްވެސް ކަމެއް ނުކުރައްވާނެ ކަމުގެ ޔަގީންކަން ދެއްވިއެވެ.
ރައީސް އިތުރަށް ވިދާޅުވީ ރާއްޖޭގައި ހުރި އުނދަގޫ ބޮޑެތި ގިނަ މައްސަލަތައް ހައްލުކުރެއްވުމުގެ މަސައްކަތް ކުރައްވަމުން ގެންދަވާއިރު، އެއްކަމަކީ ގައުމަށް ހަމަޖެހުން ގެނެސްދެއްވުން ކަމަށެވެ.
މި ލިޔުން ކިޔާލުމުން
