އެންމެހާ ޒުވާނުންނަކީ ވެސް މި ގައުމަށް ބޭނުންތެެެރި، ހެޔޮލަފާ ބަޔަކަށް ހެދުމަށް އީޖާބީ ވިސްނުން ކުރިއަށް ނެރެގެން މަސައްކަތްކުރަންޖެހޭ ކަމުގައި އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު މިރޭ ވިދާޅުވެއްޖެއެވެ.
އެމްއެމްޓީވީއިން މިރޭ ގެނެސްދިން ''ބޮޑު ޚަބަރު'' ޕްރޮގްރާމުގައި
ޒުވާން ޖީލު އިސްލާމީ ކަންތައްތަކާ ދުރަށްދާ ކަހަލަ މަންޒަރެއް ފެނުމަކީ ގިނަ ބައެއްގެ ކަންބޮޑުވުމެއްކަން ފާހަގަކުރައްވައި، އެކަމާމެދު ދެކެވަޑައިގަންނަވަނީ ކިހިނެއްތޯ އައްސަވައި ޕްރެސެންޓަރު ކުރެއްވި ސުވާލަށް ޖަވާބުދެއްވަމުން ޑރ. ޝަހީމް ވިދާޅުވީ އަބަދުވެސް ޕޮޒިޓިވް ވިސްނުން ކުރިއަށް ނެރުމަކީ ވަރަށް މުހިންމު ކަމެއް ކަމަށެވެ. އަދި ހުރިހާ ޒުވާނުންނަކީ ގޯސް މީހުންގެ ގޮތުގައި އެއްވެސް މީހަކު ސިފަކޮށްގެންނުވާނެ ކަމަށާއި، ހުރިހާ މުޖުތަމައުއެއްގައި ވެސް ތަފާތު ފިކުރުތަކުގެ ޒުވާނުންނާއި، ގޯސްމަގުންދާ ކުދިން ވެސް އުޅޭނެ ކަމަށެވެ.
ނަމަވެސް ގޯސްމަގުންދާ ކުދިން ވެސް އަބަދު ގޯސް މަގުގައި ތިބޭނެ ކަމަށް ވިސްނައިގެން ނުވާނެ ކަމަށާއި، އިސްލާހުގެ މަގަށް އަންނާނެ ކިތަންމެ ކުދިންނެއް އުޅޭނެކަން ޑރ. ޝަހީމް ފާހަގަކުރެއްވިއެވެ.
އެހެންކަމުން ކޮންމެ މީހަކު ވެސް ވާންޖެހޭނީ އީޖާބީ ޕޮޒިޓިވް ވިސްނުން ކުރިއަށް ނެރެގެން މަސައްކަތް ކުރާ މީހަކަށް ކަމަށާއި، ޒުވާނުންނަކީ ހެޔޮލަފާ، އިލްމީ، ގާބިލު، ހުނަރުވެރި ބަސްއަހާ ރަނގަޅު ޖީލަކަށްވޭތޯ ވެރިކަމުގެ ފަރާތުންނާއި، މުޖުތަމައުގެ ފަރާތުން ވެސް ވަރަށް ބޮޑަށް މަސައްކަތް ކުރަންޖެހޭނެ ކަމަށް މިނިސްޓަރު ވިދާޅުވިއެވެ.
އަޅުގަނޑުމެންގެ ރައީސް ވެރިކަމާ ހަވާލުވެވަޑައިގެން ދެއްވި ފުރަތަމަ ތަގުރީރުގަ ވެސް ވިދާޅުވެފަ އޮންނާނެ މަަސައްކަތް ކުރައްވަނީ ހަމައެކަނި މާއްދީ ތަރައްގީއަށް ނޫންކަން. އިންސާނާ ބިނާކުރުމަކީ ވެސް ވަރަށް މުހިންމު ކަމެއްކަން. އެހެންވީމަ އޭގެ ދަށުން އަޅުގަނޑުމެން މަސައްކަތް މި ކުރަނީ. އިރާދަކުރެއްވިއްޔާ އަޅުގަނޑުމެންގެ ވުޒާރާއާ ގުޅޭ ކަންތައްތަކުގަ އަޅުގަނޑުމެން މަަސައްކަތް ކުރާނީ އީޖާބީ ވިސްނުން ކުރިއަށް ނެރެގެން.
މިނިސްޓަރު އިތުރަށް ވިދާޅުވީ އެންމެހާ ޒުވާނުންނަކީ ވެސް މި ގައުމަށް ވަރަށް ބޭނުންތެެެރި ބައެއް ކަމަށާއި، ޒުވާނުންނަކީ މުސްތަގުބަލުގައި މި ގައުމުގައި އިސްލާމީ ޝަޚުސިއްޔަތު ދަމަހައްޓައި، ދީނީ ވަހުދަތު ހިފަހައްޓައި މި ގައުމު ރަނގަޅު މިސްރާބަކަށް ގެންދާނެ ޖީލު ކަމަށެވެ.
އެހެންކަމުން އެ ޖީލަށް ރަނގަޅު މަގު ދައްކައި، އެ މީހުންގެ އަތުގައި ހިފައި، އެ މީހުންނަކީ ފުދުންތެެރި އެހެން މީހުންނަށް ބަރޯސާނުވެ އުޅޭ ރަނގަޅު ބަޔަކަށް ހެދުމަށް މަސައްކަތް ކުރަންޖެހޭ ކަމަށް މިނިސްޓަރު ވިދާޅުވިއެވެ.
މި ލިޔުން ކިޔާލުމުން
