މި އަހަރުގެ މިހާތަނަށް ޒަކާތު ފަންޑަށް 90 މިލިއަނަށްވުރެ ގިނަ ރުފިޔާ ލިބިފައިވާ ކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ސަރުކާރަށް އަހަރެއް ފުރުމާ ގުޅިގެން ދައުލަތުގެ މީޑިއާ ޕީއެސްއެމްއިން ގެނެސްދިން 'ހަފުތާ 52' ކަވަރޭޖަށް ދެއްވި ބަސްދީގަތުމެއްގައެވެ.
މިނިސްޓަރު ވިދާޅުވީ މިއީ ތާރީޚުގައި ވެސް ފުރަތަމަ ފަހަރަށް ޒަކާތު ފަންޑަށް އެންމެ ގިނަ އަދަަަދަކަށް ފައިސާ ލިބުނު އަހަރު ކަމަށާއި، އެގޮތުން މި އަހަރުގެ މިހާތަނަށް ޒަކާތު ފަންޑަށް 90 މިލިއަނަށްވުރެ ގިނަ ރުފިޔާ ލިބިފައިވާ ކަމަށެވެ. އަދި އަމާޒަކީ އަހަރު ނިމޭއިރު، މި އަދަދު 100 މިލިއަނަށް އިތުރުކުރުން ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ މި އަހަރުގެ މިހާތަނަށް ޒަކާތު ފަންޑަށް 90 މިލިއަނަށްވުރެ ގިނަ ރުފިޔާ ލިބުމަކީ ސަރުކާރުގެ އެއް އަހަރު ދުވަހުގައި ދީނީ ދާއިރާއިން ހާސިލުކުރެވުނު ބޮޑު ކާމިޔާބެކެވެ.
މިނިސްޓަރު އިތުރަށް ވިދާޅުވީ އަމާޒަކީ މިހާރަށްވުރެ ބޮޑަށް ޒަކާތު ފަންޑު ތަރައްގީކުރުން ކަމަށެވެ.
ދިވެހިރާއްޖޭގެ ޒަކާތުގެ ނިޒާމު ހަރުދަނާކުރުމުގެ މަސައްކަތާއި، ޒަކާތުގެ ނަފާ އޭގެ ބެހެނިވެރިންނަށް ފުޅާ ދާއިރާއެއްގައި ލިބޭނެ ގޮތަށް ޒަކާތު ފަންޑު ތަރައްގީކުރުމަކީ ރައީސް ޑރ. މުޙައްމަދު މުޢިއްޒުގެ ރިޔާސީ ވައުދުފުޅެކެވެ.
އެގޮތުން ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 116 ވަނަ މާއްދާއިން ރައީސުލްޖުމްހޫރިއްޔާއަށް ލިބިވަޑައިގަންނަވާ އިޚުތިޔާރުގެ ދަށުން ރައީސް ވަނީ "މޯލްޑިވްސް ޒަކާތު ހައުސް" ގެ ނަމުގައި އިދާރާއެއް އުފައްދަވާފައެވެ.
މި ލިޔުން ކިޔާލުމުން
