ސަރުކާރުގެ ފަރާތުން ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީއަށް ގެނައި އިސްލާހުތައް ބާތިލުކުރުމަށް ސުޕްރީމް ކޯޓަށް ހުށަހަޅާފައިވާ މައްސަލައަށް ތަދައްޚުލުވާން އެމްޑީޕީއާއި ޑިމޮކްރެޓްސްއިން ނިންމައިފިއެވެ.
މި މަހުގެ 20 ވަނަ ދުވަހު ގާނޫނުއަސާސީއަށް ގެނައި އިސްލާހުތައް ބާތިލުކުރުމަށް އެދި މައްސަލަ ހުށަހެޅުއްވީ ކެންދޫ ދާއިރާގެ ކުރީގެ މެންބަރު އަދި ގާނޫނީ ވަކީލު ޢަލީ ޙުސައިންއެވެ.
އޭނާ މިއަދު އެކްސްގައި ކުރެއްވި ޕޯސްޓެއްގައި ވިދާޅުވި ގޮތުގައި ކޯޓަށް މައްސަލަ ހުށަހެޅުއްވީ، ގާނޫނުއަސާސީއަށް 6 ވަނަ އިސްލާހު ގެނެސްފައިވަނީ ގާނޫނުއަސާސީގެ 4، 8، 26، 75 އަދި 90 ވަނަ މާއްދާއާ ޚިލާފަށް ކަމަށާއި، ގާނޫނުއަސާސީގެ އަސާސީ އޮނިގަނޑާ ވެސް ޚިލާފަށް ކަމަށްވާތީ ކަމަށެވެ.
ގާނޫނުއަސާސީއަށް ގެނައި އެއް އިސްލާހަކީ ގާނޫނުއަސާސީގެ 73 ވަނަ މާއްދާގެ (ރ) ގެ ފަހަތަށް އަކުރެއް އިތުރުކޮށް ހިމަނާފައިވަާ ބަދަލުތަކެވެ. މި ބަދަލުތަކާއެކު ރައްޔިތުންގެ މަޖިލިސް މެންބަރުންގެ ގޮނޑި ގެއްލޭނެ އާ ތިން ހާލަތެއް ވަނީ އިތުރުކުރެވިފައެވެ. އެއީ ސިޔާސީ ޕާޓީއެއްގެ ޓިކެޓުގައި އިންތިޚާބުވެފައިވާ މެންބަރަކު އެހެން ޕާޓީއަކަށް ބަދަލުވުމުން ނުވަތަ އަމިއްލަގޮތުން ކުރިމަތިލައިގެން އިންތިޚާބުވި މެންބަރަކު ޕާޓީއަކަށް ބަދަލުވުން ނުވަތަ ރައްޔިތުން މަޖިލީހުގެ މެންބަރަކު، އެ މެންބަރަކު ރައްޔިތުންގެ މަޖިލީހުގެ އުމުރުގެ ތެރޭގައި، ތަމްސީލުކުރާ ޕާޓީއިން އަމިއްލައަށް ވަކިވުމުން ނުވަތަ ޕާޓީއިން ވަކިކުރުމެވެ.
މީގެއިތުރުން ގާނޫނުއަސާސީގެ 3 ވަނަ މާއްދާގެ (ހ) އަދި (ށ) އަށް ގެނެވުނު ބަދަލާއެކު ދިވެހިރާއްޖޭގެ ސަރަހައްދަށް އެއްވެސް ބަދަލެއް ގެނެވޭނީ ރައްޔިތުންގެ މަޖިލީހުގެ ޖުމްލަ މެންބަރުންގެ ހަތަރުބައިކުޅަ ތިންބައިގެ އަޣުލަބިއްޔަތުން ފާސްކުރާ ގާނަކުންނެވެ. އަދި ގާނޫނުއަސާސީގެ 251 ވަނަ މާއްދާގެ (ނ) އަށް ގެނެވުނު އިސްލާހުގެ ދަށުން، އެއްބަސްވުމެއްގެ ދަށުން ނުވަތަ އެނޫންވެސް ގޮތަކުން، ރާއްޖެއިން ބޭރުގެ ފަރާތްތަކަށް ދިވެހިރާއްޖޭގެ ސަރަހައްދުގެ އެއްވެސް ބައެއް އަސްކަރީ ބޭނުމަކަށް ބޭނުންކުރުމުގެ ހުއްދަ ދެވޭނީ ރައްޔިތުންގެ މަޖިލީހުގެ ޖުމްލަ މެންބަރުންގެ އަޣުލަބިއްޔަތުން ފާސްވެގެންނެވެ.
ޢަލީ ޙުސައިން ހުށަހެޅުއްވި ދުސްތޫރީ މައްސަލައަށް ތަދައްޚުލުވާން ނިންމިކަން ހާމަކޮށް އެމްޑީޕީން ނެރުނު ބަޔާނެއްގައި ބުނީ މަޖިލިސް މެންބަރުން ނިސްބަތްވާ ޕާޓީ ނުވަތަ މެންބަރު ތަމްސީލުވާ ހައިސިއްޔަތު ބަދަލުކޮށްފިނަމަ، މެންބަރުކަން ގެއްލޭ ގޮތަށް ގާނޫނުއަސާސީގެ 73 ވަނަ މާއްދާ އިސްލާހުކޮށް، މި މަހުގެ 20 ވަނަ ދުވަހު ފާސްކޮށް، ތަސްދީގުކުރެއްވި ގާނޫނަކީ ގާނޫނުއަސާސީގެ ބާރުކެނޑިގެންދާ ގޮތަށް ގެނެސްފައިވާ އިސްލާހެއް ކަމަށެވެ. އަދި އެއީ ގާނޫނުއަސާސީއާއި ޑިމޮކްރަސީގެ އަސާސީ ހަމަތަކާއި، މީގެކުރިން ގާނޫނުތައް ފާސްކުރުމުގައި އަމަލުކުރަމުން އައި އުސޫލުތަކާ ޚިލާފަށް ގެނެސްފައިވާ އިސްލާހެއް ކަމަށެވެ.
ޑިމޮކްރެޓްސްއިން ނެރުނު ބަޔާނުގައި ވެސް ބުނެފައިވަނީ ގާނޫނުއަސާސީއަށް 6 ވަނަ އިސްލާހު ގެނައުމުގެ ގާނޫނަކީ ރައްޔިތުންގެ މަޖިލީހުގެ ބާރާއި، ބޭނުން ކަނޑުވާލައި، ގާނޫނުއަސާސީގެ ކިތަންމެ ތަސައްވުރަކާ ދެކޮޅަށް އޮތް އަދި ވަކިން ޚާއްސަކޮށް ގާނޫނުއަސާސީގެ އަސާސީ ސިފަތަކާއި، އޮނިގަނޑު ބަދަލު ގެނުވާ ބޭސިކް ސްޓްރަކްޗަރ ޑޮކްޓްރިންއާ ޚިލާފު ގާނޫނެއް ކަމުން، ޢަލީ ޙުސައިން ކޯޓަށް ހުށަހެޅި މައްސަލައަށް ތަދައްޚުލުވާން ނިންމީ ކަމަށެވެ.
މި ލިޔުން ކިޔާލުމުން
