އެއްވެސް ކައުންސިލެއް ތަފާތުކުރުމެއްނެތި އަދި އެއްވެސް ރައްޔިތަކު ތަފާތުކުރުމެއްނެތި ޚިދުމަތް ދިނުމުގައި ސާބިތުކަމާއެކު ދެމި ތިބޭނެ ކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާއި ބެހޭ ވަޒީރު އާދަމް ޝަރީފު ޢުމަރު ވިދާޅުވެއްޖެއެވެ.
ވަޒީރު މިހެން ވިދާޅުވީ ހއ.މުރައިދޫ ކުޑަކުދިންގެ ޕާކު، "ބޮނބިފަންނު" ހުޅުވައިދެއްވުމަށް އެ ރަށުގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ރަސްމިއްޔާތުގައި ދެއްކެވި ވާހަކަފުޅުގައި މިނިސްޓަރު ވިދާޅުވީ ރައްޔިތުންނަށް ޚިދުމަތް ކުރުމުގައި ކޮންމެ ކައުންސިލަކީ ވެސް މުހިންމު ކައުންސިލެއް ކަމަށާއި، ކޮންމެ މުވައްޒަފަކީ ވެސް މުހިންމު މުވައްޒަފެއް ކަމަށެވެ. އަދި ހަމައެފަދައިން ކޮންމެ ރައްޔިތަކީ ވެސް ވަރަށް މުހިންމު ފަރާތެއް ކަމަށާއި، އެ ފަރާތްތަކުން ކުރައްވާ މަސައްކަތް ބައްލަވައިލައްވައި އެ ފަރާތްތަކުގެ ވާހަކަތައް އަޑުއެއްސެވުމަކީ ލިބޭ ވަރަށް ބޮޑު އުފަލެއްކަމަށް ވެސް ވަޒީރު ވިދާޅުވިއެވެ.
ވަޒީރު ވިދާޅުވި ގޮތުގައި މި ސަރުކާރުގެ ސިޔާސަތަކީ އެއްވެސް ކައުންސިލެއް ތަފާތުކުރުމެއްނެތި އެއްވެސް ރައްޔިތެއް ވެސް ތަފާތުކުރުމެއްނެތި ކޮށްދެވެން އޮތް ޚިދުމަތެއް ކޮށްދިނުމުގައި ސާބިތުކަންމަތީ ދެމި ތިބުމެވެ.
މީގެއިތުރުން މިނިސްޓަރު ވިދާޅުވީ މި ސަރުކާރުގެ އެންމެ ފުރަތަމަ ސިޔާސަތަކީ ކައުންސިލްތައް މާލީ ގޮތުން ބާރުވެރިކުރުމުގެ ސިޔާސަތު ކަމަށެވެ.
އެ ސިޔާސަތުގެ ދަށުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިހާރު ވަނީ ކައުންސިލްތަކަށް ބޭނުންވާ ފަޅުރަށްތައް އެ ކައުންސިލްތަކަށް ލިބޭނެ މަގުފަހިކުރައްވާފައި ކަމަށާއި، އެ ގޮތުން ކައުންސިލްތައް ބާރުވެރިކުރުމަށް ކުރިއަށް އޮތް ތަނުގައި ލިބޭ ޓެކްސްގެ 10 އިންސައްތަ ރަށްރަށުގެ ކައުންސިލްތަކަށް ލިބޭނެ މަގުފަހިވެގެންދާނެ ކަމަށް ވެސް ވަޒީރު ވިދާޅުވިއެވެ.
މީގެއިތުރުން 128 ކައުންސިލް އިދާރާ އަލަށް އެޅިގެންދާނެ ކަމަށާއި، އޭގެތެރޭގައި މުރައިދޫ ކައުންސިލް އިމާރާތް ހިމެނޭ ކަމަށާއި، ހަމައެކަނި ކައުންސިލް އިދާރާތައް އަލަށް ޢިމާރާތް ކުރުމުގެ މަޝްރޫޢުގެ ދަށުން ހއ. އަތޮޅުގައި މުޅިން އަލަށް 12 ކައުންސިލް އިމާރާތެއް އެޅުމަށް ހަމަޖެހިފައިވާ ކަމަށް ވެސް ވަޒީރު ވިދާޅުވިއެވެ.
ވަޒީރު އާދަމް ޝަރީފް މުރައިދޫއަށް ކުރައްވަމުން ގެންދަވާ ދަތުރުފުޅުގައި ވަނީ އެ ރަށު "ޕަބްލިކް ލައިބްރަރީ" ހުޅުވައިދެއްވާ ސިޓީސް މިނިސްޓްރީން ނިމިދިޔަ އަހަރު ކުރެވުނު މަސައްކަތްތައް އެކުލެވޭ އަހަރީ ފޮތް "ދުވެލި" ގެ ކޮޕީއެއް އެ ލައިބުރަރީއަށް ހަދިޔާ ކުރައްވައިފައެވެ.
މި ލިޔުން ކިޔާލުމުން
