އެންޓި ކޮރަޕްޝަން ކޮމިޝަން (އޭސީސީ) އާއި، އިލެކްޝަންސް ކޮމިޝަން (އީސީ) ގެ ފަސް މެންބަރަކު ވަކިކުރުމަށް ރައްޔިތުންގެ މަޖިލީހުގެ މިނިވަން މުއައްސަސާތަކާބެހޭ ކޮމިޓީން މިއަދު ފާސްކޮށްފިއެވެ.
ސިވިލް ސަރވިސް ކޮމިޝަން (ސީއެސްސީ) ގެ ރައީސް މުޙައްމަދު ނާސިހާއި، އޭސީސީގެ ނައިބު ރައީސާއި، އެ ކޮމިޝަނުގެ މެންބަރަކާއި، އީސީގެ ނައިބު ރައީސާއި، އެ ކޮމިޝަނުގެ ދެ މެންބަރަކު މަގާމުން ވަކިކުރުމުގެ މަސައްކަތް، މަޖިލީހުން ފެށީ މި މަހުގެ 21 ގައެވެ.
އެ ދުވަހުގެ މަޖިލިސް ޖަލްސާގައި އިއްވި މިނިވަން މުއައްސަސާތަކާބެހޭ ކޮމިޓީގެ ސިޓީގައިވާ ގޮތުން އެ ހަ ބޭފުޅުން ވަކިކުރަން ހުށަހަޅާފައި އޮތީ ނުފޫޒަށް ލެނބުމާއި، ސުލޫކީ މިންގަނޑުތަކާ ޚިލާފުވެފައިވާތީ ކަމަށް ބުނެއެވެ.
މިނިވަން މުއައްސަސާތަކާބެހޭ ކޮމިޓީން މިއަދު ވަނީ އެ ކޮމިޓީއަށް ހުށަހެޅިފައިވާ މައްސަލަތައް ދިރާސާކުރުމަށް ބައްދަލުވުމެއް ބާއްވާފައެވެ. އެ ބައްދަލުވުން ކުރިއަށްގެންދިޔައީ ސިއްރުކޮށްގެންނެވެ.
އެ ބައްދަލުވުމުގައި ފާސްކުރީ އޭސީސީގެ ނައިބު ރައީސް ޢަބްދުއްސަލާމް މުޙައްމަދާއި، އެ ކޮމިޝަނުގެ މެންބަރު ޠާހާ މުޙައްމަދާއި، އީސީގެ ނައިބު ރައީސް ޢަލީ ނަޝާތުއާއި، އެ ކޮމިޝަންގެ ދެ މެންބަރު ކަމުގައިވާ ޑރ. މުޙައްމަދު ޒާހިރާއި، މެންބަރު މުޙައްމަދު އާސިފް މެންބަރުކަމުން ވަކިކުރުމަށެވެ.
މީގެއިތުރުން ފާސްކުރީ ސީއެސްސީގެ ރައީސް ނާސިހު ވަކިކުރަން ނުފެންނަ ކަމަށެވެ.
އޭސީސީއާއި، އީސީގެ ފަސް މެންބަރުން ވަކިކުރަން ނިންމިއިރު، އެ ދެ ކޮމިޝަންގެ ގާނޫނަށް އިސްލާހު ގެނައުމަށް ސަރުކާރުގެ ފަރާތުން ވަނީ މަޖިލީހަށް ބިލެއް ވެސް ހުށަހަޅައިފައެވެ.
އެ ބިލުގައިވާ ގޮތުން އޭސީސީއާއި، އީސީގެ ރައީސާއި، ނައިބު ރައީސް އައްޔަންކުރުމުގެ ބާރު ލިބޭނީ އެ އިރަކު ހުންނަ ރައީސުލްޖުމްހޫރިއްޔާއަށެވެ.
މި ލިޔުން ކިޔާލުމުން
