6 ވަނަ ކެރަމް ވޯލްޑް ކަޕުން މެޑަލް ހޯދި ކެރަމް ގައުމީ އަންހެން އަދި ފިރިހެން ޓީމަށް ކޮމިޝަނަރ އޮފް ސްޕޯޓްސް، މުޙައްމަދު ޠަލާލް މަރުޙަބާ ދަންނަވައިފި އެވެ.
އެމެރިކާގެ ކެލިފޯނިއާގައި ކުރިއަށްދިޔަ 6 ވަނަ ކެރަމް ވޯލްޑް ކަޕްގައި 18 ގައުމަކުން ވާދަކުރިއިރު، މި މުބާރާތުގައި ދިވެހިރާއްޖޭގެ އަންހެން ޓީމުންނާއި ފިރިހެން ޓީމުން ވަނީ ލޯ މެޑަލް ހޯދާފަ އެވެ.
ޤައުމީ ކެރަމް ޓީމަށް ވެލާނާ އިންޓަނޭޝަނަލް އެއާޕޯޓުން މަރުޙަބާ ދެންނެވީ ކޮމިޝަނަރ ޠަލާލް އަދި ކުޅިވަރު ވުޒާރާގެ އިސްވެރިންނެވެ. މީގެ އިތުރުން މޯލްޑިވްސް އޮލިމްޕިކް ކޮމިޓީގެ ރައީސް މުޙައްމަދު އަބްދުއްސައްތާރު އާއި ޖެނެރަލް ސެކެޓްރީ ތަމޫހު އަޙްމަދު ސަޢީދު ވެސް ބައިވެރިވެވަޑައިގެންނެވި އެވެ.
ކެރަމް ވޯލްޑް ކަޕްގެ ތިން ވަނަ އަންހެން ޓީމުން ހޯދީ މުބާރާތް ބޭއްވި ގައުމު އެމެރިކާ އަތުން 2-1 ގޭމުން މޮޅުވެގެންނެވެ. ފިރިހެން ޓީމުން ވަނީ ތިންވަނަ ހޮވި މެޗުގައި ސިންގަޕޫރުގެ މައްޗަށް 2-1 އިން ކުރި ހޯދާފަ އެވެ.
މި އަހަރުގެ ކެރަމް ވޯލްޑް ކަޕްގައި ވާދަކުރި ރާއްޖޭގެ ފިރިހެން ޓީމުގައި ހިމެނެނީ ޙަސަން ނާޒިމް، އިބްރާހީމް ހުޖާން އަލީ، އިސްމާއީލް އަޒްމީން އަދި މުޙައްމަދު މުންތަސިރު އެވެ. އަދި އަންހެން ޓީމުގައި ހިމެނެނީ އާމިނަތު ވިދާދު، އައިޝަތު ނައުފާ، އައިޝަތު ފައިނާޒް އަދި ފާތިމަތު ރަޔާނާ އެވެ.
މި ލިޔުން ކިޔާލުމުން
