ކަންގަނާ ޕްރޮޑިއުސްކޮށް ޑައިރެކްޓް ކޮށްފައިވާ ފިލްމު ”އިމަޖެންސީ” އަންނަ އަހަރު ޖަނަވަރީ 17 ވަނަ ދުވަހު ރިލީޒްކުރަން އިއުލާނު ކޮށްފިއެވެ.
އެކި މައްސަލަތަކާހުރެ މީގެ ކުރިން ހަތަރު ފަހަރެއްގެ މަތިން މި ފިލްމު ވަނީ ރިލީޒްކުރުން ފަސްކޮށްފައެވެ. އިންޑިއާގެ ސެންޓްރަލް ބޯޑް އޮފް ފިލްމު ސެޓިފިކޭޝަން އިން މިހާރު ވަނީ މި ފިލްމު އެޅުވުމަށް ހުއްދަ ދީފައެވެ.
މިދިޔަ ސެޕްޓެމްބަރު މަހު މި ފިލްމު ރިލިޒްކުރާނެކަން އިއުލާން ކުރުމާއެކު މި ފިލްމާ ދެކޮޅަށް އާންމުންގެ ބަޔަކު ވަނީ ކޯޓަށް މައްސަލައެއް ހުށަހަޅާފައެވެ. މި މައްސަލައާ ގުޅިގެން ސެންސަރު ބޯޑުން ހުއްދަ ނުދިނުމުގެ ސަބަބުން އޭރު ވަނީ ފިލްމު ރިލީޒްކުރުން ލަސްކޮށްފައެވެ.
މި ފިލްމުގައި އިންޑިޔާގެ ކުރީގެ ބޮޑުވަޒީރު އިންދިރާ ގާންދީގެ ވެރިކަމުގައި ސިޔާސީ މަޝްރަހު ހޫނުވެ އިއުލާންކުރި ކުއްލި ހާލަތާއި އެ ދުވަސްވަރު ޤައުމަށް އައި ހަލަބޮލިކަމުގެ ތެރޭގައި ދިމާވެފައިވާ ކަންކަން ފެނިގެންދާނެއެވެ.
ފިލްމުގެ ލީޑްރޯލް އަދާކޮށްފައިވަނީ މި ފިލްމުގެ ޕްރޮޑިއުސަރ އަދި ޑައިރެކްޓަރ ކަންގަނާއެވެ. މި ފިލްމުގައި ކަންގަނާ ފެނިގެންދާނީ އިންދިރާ ގާންދީގެ ރޯލުންނެވެ. މީގެއިތުރުން މި ފިލްމުގެ މުހިންމު ތަރިންގެ ތެރޭގައި ކުރީގެ މަޝްހޫރު ބަތަލާ މަހީމާ ޗައުދަރީއާއި ކުރީގެ އެކްޓަރު ސަތިޝް ކޯސިކް ފެނިގެންދާނެއެވެ.
