މަގު ކޮނުމުގެ ތެރޭގައި އަޑީގައިވާ ހައިވޯލްޓޭޖް ކޭބަލްތަކަށް ގެއްލުންވުމުގެ ސަބަބުން، ހުޅުމާލޭގެ ބައެއް ސަރަހައްދުތަކުން ކައިރިކައިރީގައި ކަރަންޓު ކެނޑެމުންދާތީ، މަސައްކަތް ކުރާ ފަރާތްތަކުން އިތުރަށް ޒިންމާދާރުވުމަށް ސްޓެލްކޯ އިން އެދިއްޖެއެވެ.
ސްޓެލްކޯ އިން ހާމަކުރި ގޮތުގައި، ހުޅުމާލެ ފޭސް 1 އިން ރޭ ކަރަންޓު ދިޔައީ އަމިއްލަ ފަރާތަކުން އިމާރާތެއް ކުރުމަށްޓަކައި ކުރެދިމާ ހިނގުން ކޮނުމުގެ ތެރޭގައި ހައިވޯލްޓޭޖް ކޭބަލަކަށް ގެއްލުންވެގެންނެވެ. އަދި މިދިޔަ ބުރާސްފަތި ދުވަހުވެސް ދެ ގަޑިއެއްހާ އިރަށް ކަރަންޓު ކެނޑުނީ ބަނަފްސާ ހިނގުން ސަރަހައްދުގައި ވަޅު ކޮންނަނިކޮށް ކޭބަލަށް ގެއްލުންވެގެންނެވެ.
އެ ކުންފުނިން ފާހަގަކުރި ގޮތުގައި، ފަހަކަށް އައިސް ކަރަންޓު މެދުކެނޑުމުގެ ގިނަ ހާދިސާތައް ހިނގަނީ މަގު ކޮނުމުގެ ތެރޭގައި ކޭބަލްތަކަށް ގެއްލުންވުމުގެ ސަބަބުންނެވެ. ބައިނަލްއަގްވާމީ މިންގަނޑުތަކާ އެއްގޮތަށް ރައްކާތެރިކަމުގެ ޓޭޕާއި ޝީޓުތަކާއެކު ކޭބަލް ވަޅުލާފައި ހުރި ނަމަވެސް، މަގު ކޮންނަ ބައެއް ފަރާތްތަކުން އެކަމަށް ނުބަލައި، ކޭބަލަށް ގެއްލުންވުމުން އެކަން ސިއްރުކުރަން އަމިއްލައަށް ޓޭޕް އަޅާފައި ހުންނަކަންވެސް ވަނީ ފާހަގަކުރެވިފައެވެ.
ކައިރިކައިރީގައި މިފަދަ ހާދިސާތައް ތަކުރާރުވެ ކަރަންޓުގެ ހިދުމަތް މެދުކެނޑުމަކީ އާންމުންނަށް ބޮޑެތި ދަތިތަކާ ކުރިމަތިލާންޖެހޭ ކަމެއްކަން ފާހަގަކޮށް، ކަރަންޓު ވިއުގައަށް ގެއްލުން ނުވާނެ ގޮތަށް މަސައްކަތްތައް ރާވައިގެން ކުރިއަށްގެންދިއުމަށް ސްޓެލްކޯ އިން ވަނީ އިލްތިމާސްކޮށްފައެވެ.
މި ލިޔުން ކިޔާލުމުން
