ގޭންގް ކުށްތަކާ ދެކޮޅަށް ފުލުހުން ވަރުގަދަ އޮޕަރޭޝަންތަކެއް ހިންގަމުންދާއިރު، މިހާތަނަށް ހިންގި 52 އޮޕަރޭޝަނެއްގެ ތެރެއިން 10 ގޭންގް ލީޑަރެއްގެ މައްސަލަ ތަހުގީގުކުރަމުންދާކަމަށް ދާޚިލީ ސަލާމަތާއި މަސައްކަތްތެރިކަމާ ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.
ސަލްޓަން ޕާކުގައި ބޭއްވި "އަހާ" ފޯރަމްގެ ހަތްވަނަ ސެޝަންގައި ވާހަކަދައްކަވަމުން ވަޒީރު ވިދާޅުވީ، 2007 އިން 2023 އަށް ކޮންމެ އަހަރަކުވެސް ގޭންގް މާރާމާރީތަކުގައި މީހުން މަރުވަމުންދިޔަ ނަމަވެސް، މި ސަރުކާރުގައި މިހާތަނަށް ގޭންގް މާރާމާރީއެއްގައި އެއްވެސް ދިވެހިއެއްގެ ފުރާނަ ގެއްލިފައިނުވާ ކަމަށެވެ. އަދި ގޭންގުތަކުގެ ނުފޫޒު ގަދަ ސަރަހައްދުތަކުގައި ފުލުހުންގެ ހާޒިރީ އިތުރުކޮށް، ގޭންގުތަކުގައި އުޅޭ ޒުވާނުންނަށް ކުށުގެ މާހައުލުން ދުރުވެ އަބުރުވެރި ދިރިއުޅުމެއް އުޅުމަށް ފުރުސަތު ދީފައިވާނެ ކަމަށްވެސް އޭނާ ފާހަގަކުރެއްވިއެވެ.
ފުލުހުން ކުރިއަށްގެންދިޔަ އޮޕަރޭޝަންތަކުގެ ތަފްސީލު ހާމަކުރައްވަމުން ވަޒީރު ވިދާޅުވީ، މިހާތަނަށް 10،450 މީހަކު ބަލައިފާސްކޮށް، 517 މީހަކު ހައްޔަރުކޮށްފައިވާ ކަމަށެވެ. މީގެއިތުރުން އެ ފަރާތްތަކާ ގުޅުންހުރި 670 ސައިކަލު ޓޯކޮށްފައިވާއިރު، ކުޑަކުދިން ގޭންގުތަކަށް ރެކްރޫޓްކުރަން ބޭނުންކުރި 26 "ސޭފް ހައުސް" އެއް ރެއިޑްކޮށް އެތަންތަނުގެ ބޭނުން ނުހިފޭގޮތް ވަނީ ހަދާފައެވެ.
ވަޒީރު އިޙްސާން އިތުރަށް ވިދާޅުވީ، އައު ގާނޫނުގެ ދަށުން ގޭންގް ލީޑަރުންނާމެދު ފިޔަވަޅުތައް އެޅެން ފެށުމުން ރާއްޖޭގައި އޯގަނައިޒްޑް ކްރައިމް އަދި ގޭންގު ހަދައިގެން ކުށްކުރުމުގެ މައްސަލައަށް ދާއިމީ ނިމުމެއް އަންނާނެ ކަމަށެވެ.
މި ލިޔުން ކިޔާލުމުން
