ނޭޝަންސް ލީގުގައި ކުޅުނު ފުރަތަމަ މެޗުން، މާކް ވެން ބޮމެލްގެ ކޯޗުކަމުގެ ދަށުން ނުކުތް ބެލްޖިއަމް އަތުން ރޮބާޓޯ މަންޗީނީގެ އިޓަލީ ވަނީ ބަލިވެފައެވެ. މި މެޗަކީ ނެދަލެންޑްސްގެ ކުރީގެ މިޑްފީލްޑަރު ވެން ބޮމެލް ބެލްޖިއަމްގެ ކޯޗެއްގެ ގޮތުގައި ފެނިގެންދިޔަ ފުރަތަމަ މެޗެވެ. އަދި މިއީ އިޓަލީގެ ކޯޗުކަމާ މަންޗީނީ ދެވަނަ ފަހަރަށް ހަވާލުވި ފަހުން އެ ޓީމު ކުޅުނު ފުރަތަމަ މެޗު ވެސް މެއެވެ.
މި މެޗުގައި ބެލްޖިއަމްގެ ފުރަތަމަ ލަނޑު ކާމިޔާބުކޮށްދިނީ ޕީއެސްޖީގެ މީކާ ގޮޑްޓްސްއެވެ. މިއީ އޭރިއާ ތެރެއިން ދެ ޑިފެންޑަރުން ކައިރިން ނައްޓާލުމަށްފަހު އޭނާ ގައުމީ ޓީމަށް ޖަހައިދިން ފުރަތަމަ ލަނޑެވެ.
ބެލްޖިއަމްގެ ދެވަނަ ލަނޑު ކާމިޔާބުކުރީ ބެންފީކާގެ ޑޯޑީ ލުކެބާކިއޯއެވެ. އޭނާ މި ލަނޑު ޖެހީ އަމިއްލަ ހާފުން ބޯޅަ ހިފައިގެން ގޮސް، 25 ޔާޑު ދުރުން ފޮނުވާލި ބާރު ހަމަލާއަކުންނެވެ.
މެޗުގެ ފަހުކޮޅުގައި އިޓަލީގެ ކޯޗު މަންޗީނީ ވަނީ ސްޕޯޓިންގެ އިއްސާ ޑޫމްބިއާ އާއި ނިއުރެމްބާގްގެ މުހައްމަދު އަލީ ޒޯމާ ކުޅެން އަރުވައި، އެ ދެ ކުޅުންތެރިންނަށް ގައުމީ ޓީމަށް ކުޅުމުގެ ފުރުސަތު ދީފައެވެ.
މި ދެ ކުޅުންތެރިންނަކީ 2023-24 ވަނަ އަހަރުގެ ސީޒަނާ ހަމައަށްވެސް އިޓަލީގެ ސެރީ ސީ ގެ ކްލަބް އަލްބީނޯލެފޭގައި އެކުގައި ކުޅެފައިވާ ދެ ކުޅުންތެރިންނެވެ.
ވޯލްޑް ކަޕަށް ކޮލިފައި ނުވުމުގެ ހިތާމައާ ގުޅޭގޮތުން ވާހަކަދައްކަމުން މަންޗީނީ ބުނީ، މާޒީގައި ވެދިޔަ ކަންކަން ބަދަލުނުކުރެވޭނެތީ އެކަމާ ޝަކުވާކުރުމުގެ ބަދަލުގައި ޕޮޒިޓިވްކޮށް ވިސްނުން މުހިންމު ކަމަށެވެ.
ދަނޑުގައި ތިބި ގާތްގަނޑަކަށް 50،000 އެއްހާ ސަޕޯޓަރުންގެ ނުރުހުމުގެ އަޑުތަކަކީ ކުޅިވަރުގައި އާންމު ކަމެއް ކަމަށް އޭނާ ފާހަގަކުރިއެވެ. މަންޗީނީ އަކީ މީގެ ކުރިން 2018 އިން 2023 އަށް އިޓަލީއަށް ކޯޗުކޮށްދީ، ޔޫރޯ 2020 އެ ޓީމަށް ކާމިޔާބުކޮށްދިން ކޯޗެވެ.
މި ލިޔުން ކިޔާލުމުން
