އިނގިރޭސިވިލާތުގެ ރަސްގެފާނު ޗާލްސްއަށް ކެންސަރު ޖެހިފައިވާކަން އެންމެ ފުރަތަމަ ސިއްރުކޮށްފައި ބޭއްވުމަކީ ވަރަށް އުނދަގޫ ކަމެއްގެ ގޮތުގައި ރާނީ ކެމިލާ ފުރަތަމަ ފަހަރަށް އާންމުކޮށް ހާމަކުރައްވައިފިއެވެ.
ރަސްގެފާނު ޗާލްސް ކެންސަރަށް ފަރުވާ ހޯއްދަވަމުން ގެންދަވާކަން ބަކިންގހަމް ޕެލަސްއިން 2024 ވަނަ އަހަރުގެ ފެބްރުއަރީ މަހު ހާމަކޮށްފައިވާއިރު، އެމަނިކުފާނުގެ ފަރުވާ އަދިވެސް ދަނީ ކުރިއަށެވެ. ބަލި އަވަހަށް ދެނެގަނެވި އެކަށީގެންވާ ފިޔަވަޅުތައް އަވަހަށް އެޅުމުގެ ސަބަބުން ފަރުވާގެ މިންވަރު މަދުކުރެވިދާނެ ކަމަށް މިދިޔަ ޑިސެމްބަރު މަހު ރަސްގެފާނު ވަނީ ވިދާޅުވެފައެވެ.
ގަނޑުވަރުން މިކަން އިއުލާނުކުރުމުގެ ހަފުތާއެއްހާ ދުވަސް ކުރިން، ކެމިލާ ވަނީ ލަންޑަންގެ ހޮސްޕިޓަލެއްގައި ހުންނަ "މެގީސް" ކެންސަރު ސަޕޯޓް ސެންޓަރަކަށް ޒިޔާރަތްކުރައްވާފައެވެ. އަދި އެ ޗެރިޓީގެ ފަރާތުން އާންމުކުރި ވީޑިއޯއެއްގައި އެކަމަނާ ވިދާޅުވީ ފިރިކަލުންގެ އަމިއްލަފުޅު އާލާސްކަންފުޅާ ބެހޭގޮތުން ވާހަކަ ނުދައްކާ ހުރުމަކީ ވަރަށް ދަތިވި ކަމެއް ކަމަށެވެ.
ރާނީ ރައީސްކަން ކުރައްވާ މެގީސްގެ ޗީފް އެގްޒެކެޓިވް ލައުރާ ލީއާ ވާހަކަފުޅު ދައްކަވަމުން ކެމިލާ ވިދާޅުވީ، "އަޅުގަނޑު ހަނދާން އެބަހުރި ރަސްގެފާނަށް ބަލި ޖެހުނުކަން އެނގުނުތާ ކުޑައިރުކޮޅެއް ފަހުން މެގީސްއަށް އައި ހަނދާން. އެ ވަގުތު އެއްވެސް މީހަކަށް އެއްވެސް ވާހަކައެއް ދެއްކޭކަށް ނެތް، އެއީ ވަރަށް އުނދަގޫވި ކަމެއް،" ކަމަށެވެ. އަދި ބަލި ތަހައްމަލު ކުރަމުންދިޔަ މީހުންނާއި އާއިލާތަކަށް ބަލާލުމުން މިފަދަ ތަންތަނުގެ މުހިންމުކަން ވަރަށް ބޮޑަށް އިހުސާސްވި ކަމަށާއި އެ ވާހަކަ ހާމަކުރަން ބޭނުންވި ނަމަވެސް އެގޮތަށް އަމަލުނުކުރެވުނު ކަމަށް ވިދާޅުވިއެވެ.
މެގީސްގެ 30 ވަނަ އަހަރީ ދުވަހާ ގުޅިގެން ތައްޔާރުކުރި އެ ވީޑިއޯގައި، ކެމިލާ ވަނީ ރަސްގެފާނު ބެއްލެވުމާ ބެހޭގޮތުންނާއި، މަސައްކަތްޕުޅު ކުރިއަށް ގެންދެވުމަށް އެމަނިކުފާނު އަޒުމު ކަނޑައަޅުއްވާފައިވާ ގޮތުގެ ވާހަކަވެސް ހިއްސާކުރައްވާފައެވެ. އެކަމަނާ ފާހަގަކުރެއްވި ގޮތުގައި އެއްވެސް ކަމަކަށް އެމަނިކުފާނު ހުއްޓުވައެއް ނުލެވުނެވެ.
މެގީސްއިން ފާހަގަކުރި ގޮތުގައި، ރަސްގެފާނު ޗާލްސް އަދި ޕްރިންސެސް އޮފް ވޭލްސް ކޭޓް ކެންސަރަށް ފަރުވާ ހޯއްދެވިކަން ހާމަކުރައްވައި ފާޅުކަން ބޮޑު ގޮތެއްގައި ވާހަކަދެއްކެވުމަކީ، އެހެން ފަރާތްތަކަށް ލިބުނު ވަރަށް ބޮޑު ހިތްވަރެކެވެ. އަދި ރާނީގެ އިހުސާސްތަކުން، ބަލިމީހުންގެ އިތުރުން އެމީހުންގެ އާއިލާތަކަށް އެހީތެރިކަން ލިބުމުގެ މުހިންމުކަން ވަރަށް ބޮޑަށް ސާފުވެގެންދާ ކަމަށް ލީ ވިދާޅުވިއެވެ.