އިސްރާއީލުން ސީރިޔާގެ ހުޅަނގު އުތުރު އަލެއްޕޯ ކައިރީގައިވާ އަބޫ އައްދަހޫރު ވައިގެ މަރުކަޒުގެ ރަންވޭއަށާއި ގުދަންތަކަށް އަމާޒުކޮށް އަށް ޙަމަލާއެއް ދީފައިވާއިރު، މި ޙާދިސާގައި އެއްވެސް މީހަކަށް އަނިޔާއެއް ލިބިފައެއް ނުވެއެވެ. މިއީ މާރޗު މަހަށްފަހު ސީރިޔާ ސަރުކާރުގެ ތަންތަނަށް އިސްރާއީލުން ދިން މިފަދަ ފުރަތަމަ ޙަމަލާއެވެ. މި ޙަމަލާއަކީ ސީރިޔާގެ ސިޔާދަތަށް އަރައިގަތުން ކަމަށް ބުނެ ތުރުކީވިލާތުން އެކަން ވަރަށް ބޮޑަށް ކުށްވެރިކޮށް، އިސްރާއީލުގެ އުދުވާނުތައް ހުއްޓުވަން ބައިނަލްއަޤްވާމީ ފިޔަވަޅުތަކެއް އެޅުމަށް ވަނީ ގޮވާލާފައެވެ. އަދި އެމެރިކާގެ ޚާއްޞަ މަންދޫބުވެސް ވަނީ މިއީ ބޭކާރު ގޮތުގައި މަސްރަޙު ގޯސްކުރުމެއްގެ ގޮތުގައި ސިފަކުރައްވައި، މަޝްވަރާއާއި ކެތްތެރިކަމަށް އިސްކަންދިނުމަށް ބާރުއަޅުއްވާފައެވެ.
އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ އޮފީހުން ބުނީ، ތުރުކީ ސިފައިން އެ ވައިގެ މަރުކަޒުގައި ޤާއިމުވުމުގެ ފުރުޞަތު ދިނުމަކީ ސަލާމަތީ ގޮތުން އިސްރާއީލާއެކު އެއްބަސްވެވިފައިވާ ޙާލަތާ ޚިލާފުވުން ކަމަށާއި، މިފަދަ ބޭރުގެ ފައުޖެއް އޮތުމަކީ އިސްރާއީލުގެ ސަލާމަތަށް އޮތް ނުރައްކަލެއް ކަމަށެވެ. ނަމަވެސް ތުރުކީވިލާތުގެ ބަޔާނުގައި އެ ޤައުމުގެ ސިފައިން އެ މަރުކަޒުގައި ތިބި ކަމަކަށް ބުނެފައެއް ނުވެއެވެ. ސީރިޔާގެ ޚާރިޖީ ވަޒީރު އަސްޢަދު އައްޝައިބާނީ ވަނީ މި ޙަމަލާތަކަކީ އެއްވެސް ސަލާމަތީ ޙުއްޖަތެއް އޮތް ކަމެއް ނޫން ކަމަށް ވިދާޅުވެ، ޙަމަލާތައް ހުއްޓުވުމަށް ޑިޕްލޮމެޓިކް މަސައްކަތްތައް ކުރިއަށް ގެންދަވާނެ ކަމަށް ވިދާޅުވެފައެވެ.
2024 ވަނަ އަހަރު ބައްޝާރުލް އަސަދުގެ ވެރިކަން ވެއްޓުނު ފަހުން އިސްރާއީލުން ދަނީ ތަކުރާރުކޮށް ސީރިޔާގެ ސިފައިންނަށް ޙަމަލާދެމުންނެވެ. ސީރިޔާގެ އައު ވެރިންނަކީ އިސްލާމީ ހަނގުރާމަވެރި ފިކުރުގެ މާޒީއެއް އޮތް ބައެއް ކަމަށްވާތީ، އިސްރާއީލުން އެ ފަރާތްތަކާމެދު ދެކެނީ ވަރަށް ބޮޑު ޝައްކުގެ ނަޒަރަކުންނެވެ. ނަމަވެސް ރައީސް އަޙްމަދު އަލް-ޝަރާޢު ވަނީ އިސްރާއީލާއެކު ސަލާމަތީ އެއްބަސްވުމަކަށް އައުމަށް މަސައްކަތް ކުރަމުންދާ ކަމަށް މީގެ ކުރިން ވިދާޅުވެފައެވެ.
މި ޙަމަލާތައް ދީފައި މިވަނީ ސީރިޔާގެ މައްސަލައިގައި އިސްރާއީލާއި ތުރުކީއާ ދެމެދު ސަލާމަތީ ގޮތުން ނުތަނަވަސްކަން އިތުރުވެފައިވާ ދަނޑިވަޅެއްގައެވެ. ތުރުކީއަކީ ސީރިޔާގެ އައު ސަރުކާރުގެ އެންމެ މުހިންމު އެއް މަދަދުގާރު ކަމަށްވާއިރު، އެ ޤައުމުން ދަނީ ސީރިޔާގެ އަސްކަރިއްޔާ ތަމްރީނުކޮށް، ދައުލަތުގެ މުއައްސަސާތައް އަލުން ބިނާކުރުމަށް އެހީތެރިވަމުންނެވެ. ދެ ޤައުމުގެ ސިފައިންވެސް ސީރިޔާގައި ޙަރަކާތްތެރިވަމުންދާތީ، އެއްވެސް ކުރިމަތިލުމެއް ހިނގިޔަ ނުދިނުމަށްޓަކައި ތުރުކީ އާއި އިސްރާއީލުން ވަނީ މިދިޔަ އަހަރު މުވާސަލާތީ ގުޅުމުގެ ނިޒާމެއްވެސް ޤާއިމުކޮށްފައެވެ.