ރަޝިޔާއިން ޔޫކްރެއިންގެ އެކި ސަރަހައްދުތަކަށް ވަރުގަދަ ހަމަލާތަކެއް ދީފި

ރަޝިޔާއިން ޔޫކްރެއިންގެ އެކި ސަރަހައްދުތަކަށް ދިން ވަރުގަދަ މިސައިލް އަދި ޑްރޯން ހަމަލާތަކެއްގައި މަދުވެގެން އަށް މީހުން މަރުވެ، އެތައް ބަޔަކު ޒަޚަމްވެއްޖެއެވެ. މި ހަމަލާތަކުގައި ރަޝިޔާއިން ބެލިސްޓިކް މިސައިލާއި 121 ޑްރޯން ބޭނުންކޮށްފައިވާއިރު، އުތުރުގެ ސިޓީއެއް ކަމަށްވާ ސޫމީގެ މީހުން އެއްވެއުޅޭ ސަރަހައްދަކަށް ދިން ބޮމުގެ ހަމަލާތަކުގައި އެކަނިވެސް ފަސް މީހުން މަރުވެ 30 މީހުން ޒަޚަމްވިއެވެ. މީގެ އިތުރުން އޮޑެސާ، ޚާރްކީވް އަދި ސްލޮވިއަންސްކް ފަދަ ސިޓީތަކަށްވެސް ނުރައްކާތެރި ހަމަލާތަކެއް ވަނީ އަމާޒުވެފައެވެ.

ވެރިރަށް ކީވްއަށް ދިން ހަމަލާތަކުގައި އާންމުންގެ 11 މީހަކު ޒަޚަމްވެ، މުހިންމު އިންފްރާސްޓްރަކްޗާތަކަށް ބޮޑެތި ގެއްލުންތަކެއް ލިބިފައިވެއެވެ. މީގެ ތެރޭގައި ކަރަންޓު ޓްރާންސްފޯމަރުތަކާއި، އޮފީސް އިމާރާތްތަކާއި، ރޭލު އިންޖީނުތަކުގެ އިތުރުން ވިޔަފާރި ގުދަންތައް ހިމެނެއެވެ. ބައެއް ސަރަހައްދުތަކުގައި ބޮޑެތި އަލިފާނުގެ ހާދިސާތައް ހިނގައި، އެކަން ކޮންޓްރޯލްކުރުމަށް ޚާއްސަ އަލިފާން ނިއްވާ ރޭލުތައްވެސް ބޭނުންކުރަން ޖެހުނެވެ.

ޔޫކްރެއިންގެ ރައީސް ވޮލޮޑިމީރް ޒެލެންސްކީ ވިދާޅުވި ގޮތުގައި، ދިފާއީ ބާރުތަކުން ގިނަ ޑްރޯންތަކާއި ކުރޫޒް މިސައިލްތައް ވައްޓާލި ނަމަވެސް، ބެލިސްޓިކް މިސައިލްތައް ހުއްޓުވުމުގައި ވަނީ ނާކާމިޔާބުވެފައެވެ. ވައިގެ ދިފާއީ ހަތިޔާރުތައް މަދުވަމުންދާ މި ދަނޑިވަޅުގައި، ނޭޓޯގެ ގައުމުތަކުން ވީ ވައުދާ އެއްގޮތަށް އަސްކަރީ އެހީތައް އަވަހަށް ފޯރުކޮށްދިނުމަށް އޭނާ ވަނީ ގޮވާލައްވާފައެވެ. ޚަބަރުތައް ބުނާގޮތުން، މިސައިލްތައް މަދުވުމުގެ ސަބަބުން ޕެޓްރިއަޓް ސިސްޓަމްތައް މެނުއަލްކޮށް އޮޕަރޭޓްކުރަންވެސް ވަނީ މަޖުބޫރުވެފައެވެ.

ރަޝިޔާގެ ހަމަލާތަކަށް ރައްދު ދިނުމުގެ ގޮތުން ޔޫކްރެއިންގެ ފައުޖުތަކުން ދަނީ ރަޝިޔާގެ އަސްކަރީ ލޮޖިސްޓިކްސްއަށް އަމާޒުކޮށް ހަމަލާދެމުންނެވެ. އެގޮތުން ސީ އޮފް އަޒޯވްގައި ހުރި ރަޝިޔާގެ 21 ތެޔޮ ޓޭންކަރަކަށާއި މުދާ އުފުލާ ބޯޓުތަކަކަށް ޔޫކްރެއިންގެ ޑްރޯން ޔުނިޓުތަކުން ހަމަލާދީފައިވާ ކަމަށް އެގައުމުން ބުނެއެވެ. މި މަސައްކަތުގެ ބޭނުމަކީ ރަޝިޔާ ސިފައިންނަށް ބޭނުންވާ ތެލާއި ހަތިޔާރު ފޯރުކޮށްދިނުމަށް ހުރަސް އެޅުމެވެ.