72 އަހަރަށް ފަހު ފީފާ ވޯލްޑް ކަޕްގެ ނޮކްއައުޓް މަރުހަލާގައި ފުރަތަމަ މޮޅު ހޯދައި، ސުވިޒަލޭންޑުން އެ ގައުމުގެ ފުޓްބޯޅަ ތާރީޚުގައި އާ ސަފުހާއެއް ލިޔެފިއެވެ. ސްވިޒަލޭންޑުން ފީފާ ވޯލްޑް ކަޕްގެ ނޮކްއައުޓް މެޗަކުން އެންމެ ފަހުން މޮޅުވެފައިވަނީ، މިހާރުގެ ސްކޮޑުގައި ހިމެނޭ ކުޅުންތެރިން އުފަންވުމުގެވެސް މާކުރިންނެވެ.
އެ މެޗަކީވެސް ސީދާ ނޮކްއައުޓް ބުރުގެ މެޗެއް ނޫނެވެ. އެއީ 1954 ވަނަ އަހަރު އެގައުމުގައި ބޭއްވި ވޯލްޑް ކަޕްގެ ގްރޫޕް ސްޓޭޖް ނިމުނުއިރު، އިޓަލީއާ ޕޮއިންޓުގެ ގޮތުން އެއްވަރުވުމުން، ގްރޫޕުން ކުރިއަށްދާނެ ގައުމެއް ކަނޑައެޅުމަށް ކުޅުނު ޕްލޭ-އޮފް މެޗެކެވެ. އަލްޖީރިއާ އަތުން 2-0 އިން ސުވިޒަލޭންޑް މޮޅުވީ ބްރީލް އެމްބޯލޯ އާއި ޑެން އެންޑޯއީ ޖެހި ލަނޑުތަކުންނެވެ. މިއީ 1954 ވަނަ އަހަރުގެ ފަހުން ވޯލްޑް ކަޕްގެ ގްރޫޕް ސްޓޭޖަށްފަހު ކުޅުނު މެޗަކުން އެ ގައުމު މޮޅުވި ފުރަތަމަ ފަހަރެވެ.
މި ތާރީޚީ މޮޅަށްފަހު ފީފާއަށް ދިން ހާއްސަ އިންޓަވިއުއެއްގައި ލަނޑު ޖެހި ކުޅުންތެރިޔާ އެންޑޯއީ ބުނީ، މިއީ މުޅި ގައުމު ދެކެމުން އައި ހުވަފެނެއް ކަމަށެވެ. "ވަރަށް އުފާވެފައި މިހުރީ، ހަގީގަތުގައިވެސް ވަރަށް އުފާވެއްޖެ،" އޭނާ ބުންޏެވެ. "އަހަރެމެން މިވަނީ ގައުމުގެ ތާރީޚުގެ ސަފުހާއެއް ލިޔެފައި. އަދި މިގޮތަށް ކުރިއަށްދާނެ ކަމައް އުންމީދުކުރަން، ސަބަބަކީ މިއީ އަހަރެމެން ދެކެމުން އައި ހުވަފެނަކީ." އޭނާ އިތުރަށް ބުނީ މިއަދު މިކުރެވުނީ ހާއްސަ ކަމެއް ނަމަވެސް، ޓީމުގެ އަމާޒަކީ މިއަށްވުރެ ގިނަ ކާމިޔާބީތައް ހޯދުން ކަމަށެވެ.
ސުވިޒަލޭންޑްގެ ތަޖުރިބާކާރު ޑިފެންޑަރު މެނުއަލް އަކަންޖީ ފާހަގަކުރި ގޮތުގައި، މި މެޗުގައި ބައިކޮޅަށް ލަނޑެއް ވަނަނުދީ ހިފަހައްޓާލެވުމަކީ ލިބުނު އިތުރު ހިތްހަމަޖެހުމެކެވެ. ކުރީގެ ތިން މެޗުގައިވެސް އެ ޓީމު ކޮޅަށް ލަނޑު ވަދެފައިވާތީ، ޑިފެންސް ވަރުގަދަކޮށް ކްލީން ޝީޓެއް ހޯދުމަކީ ޓީމަށް ލިބުނު ކުރިއެރުމެކެވެ. "އަހަރެމެން ވަރަށް ރަނގަޅަށް ދިފާއުކުރިން، އަދި ލަނޑުތައް ޖެހުނީވެސް އެންމެ ރަނގަޅު ވަގުތުގައި،" އަކަންޖީ ބުންޏެވެ.
މި މުބާރާތުގައި ސުވިޒަލޭންޑްގެ އެޓޭކް ފެންނަނީ ވަރަށް ވަރުގަދަކޮށެވެ. އެންޑޯއީ އަކީ ފުރަތަމަ ހަތަރު މެޗުގައި ލަނޑު ޖެހި ފަސްވަނަ ތަފާތު ކުޅުންތެރިޔާއެވެ. މީގެ އިތުރުން ޒުވާން ތަރި ޖޯހަން މަންޒަމްބީގެ ކުޅުން ފާހަނގަ ކުރެވެއެވެ. ޓީމުގެ ގިނަ ކުޅުންތެރިންނަކީ ތަޖުރިބާކާރު ކުޅުންތެރިން ކަމަށްވާއިރު، އެންޑޯއީ އަކީ ފުރަތަމަ އެގާރައިގައި ހިމެނޭ ދެވަނައަށް އެންމެ ޒުވާން ކުޅުންތެރިޔާއެވެ.
ގަދަ 16 ގެ ބުރުގައި ސުވިޒަލޭންޑުން ކުރިމަތިލާން ޖެހޭނީ ކޮލަމްބިއާ ނުވަތަ ގާނާއާ އެވެ. އެންޑޯއީ ބުނި ގޮތުގައި ޓީމު އޮތީ ކޮންމެ ބަޔަކާ ކުރިމަތިލާން ޖެހުނަސް އެކަމަށް ފުރިހަމައަށް ތައްޔާރަށެވެ. އަހަރެމެން މިތިބީ ކޮންމެ ބަޔަކާވެސް ކުރިމަތިލާން ތައްޔާރަށް،" އޭނާ ޔަގީންކަމާއެކު ބުންޏެވެ.