އިނގިރޭސިވިލާތުގެ ބޮޑުވަޒީރު ކަމުގެ މަގާމުންނާއި ލޭބަރ ޕާޓީގެ ލީޑަރުގެ މަގާމުން ކިއަރ ސްޓާމަރ އިސްތިއުފާ ދެއްވައިފިއެވެ. މިކަން އޭނާ އިއުލާނު ކުރެއްވީ ބޮޑުވަޒީރުގެ ރަސްމީ ގެކޮޅު، 10 ޑައުނިންގް ސްޓްރީޓްގެ ބޭރުގައި މިއަދު ދެއްވި ހާއްސަ ބަޔާނެއްގައެވެ.
ބީބީސީން ރިޕޯޓްކޮށްފައިވާ ގޮތުގައި، ސްޓާމަރ އިސްތިއުފާ ދެއްވުމަށް ނިންމެވީ ކުރިއަށް އޮތް އާންމު އިންތިޚާބުގައި ޕާޓީއަށް ކާމިޔާބީ ހޯދައިދިނުމަށް އޭނާއަކީ އެންމެ އެކަށީގެންވާ ފަރާތްތޯ ޕާޓީގެ ތެރޭގައި ސުވާލު އުފެދިފައިވާ ވަގުތެއްގައެވެ. އޭނާގެ ބަޔާނުގައި ވިދާޅުވީ، ޕާޓީގެ ތެރެއިން ކުރިމަތިވި އެ ސުވާލުތަކުގެ ޖަވާބު އޭނާއަށް ލިބިވަޑައިގެންފައިވާ ކަމަށާއި، މަގާމުން ދުރަށް ޖެހިވަޑައިގަންނަވަނީ އެ ސަބަބަށްޓަކައި ކަމަށެވެ.
ވަރަށް އަސަރާއެކު ވާހަކަދައްކަވަމުން ސްޓާމަރ ވަނީ އޭނާގެ އަނބިކަނބަލުން ވިކް އަށް ޝުކުރު އަދާކުރައްވާފައެވެ. އޭނާގެ ހަޔާތުގެ އެންމެ ބޮޑު އެހީތެރިޔަކީ އަނބިކަނބަލުން ކަމަށާއި، ކުރިއަށް އޮތް ތަނުގައި އޭނާ ބޭނުންވަނީ ދަރިންނަށް އެންމެ ރަނގަޅު ބައްޕައެއްގެ ގޮތުގައި ހުންނެވުމަށް ކަމަށް ވެސް ވިދާޅުވިއެވެ.
ސްޓާމަރ ވިދާޅުވި ގޮތުގައި، ލޭބަރ ޕާޓީން އާ ލީޑަރަކު އައްޔަން ކުރަންދެން އޭނާ ބޮޑުވަޒީރުގެ މަގާމުގައި ދެމިހުންނަވާނެއެވެ. އާ ލީޑަރަކު ހޮވުމުގެ މަސައްކަތް ޖުލައި 9 ވަނަ ދުވަހު ފެށުމަށް ޕާޓީގެ ނޭޝަނަލް އެގްޒެކެޓިވް ކޮމިޓީގައި އޭނާ ވަނީ އެދިވަޑައިގެންފައެވެ. އޭނާގެ އަމާޒަކީ ޖުލައި 16 ގެ ކުރިން މި މަސައްކަތް ނިންމައި، ސެޕްޓެމްބަރު 1 ގައި ޕާލަމެންޓްގެ މަސައްކަތްތައް އަލުން ފެށޭއިރު އާ ލީޑަރަކު މަގާމާ ހަވާލުވެފައި ހުރުމެވެ.
ސްޓާމަރގެ ބަދަލުގައި ލޭބަރ ޕާޓީގެ ލީޑަރުގެ މަގާމަށް ވަޑައިގަންނަވާނެ ކަމަށް އެންމެ ބޮޑަށް ބެލެވެނީ އެންޑީ ބާންހަމް އެވެ. އޭނާ މިއަދު ވެސްޓްމިންސްޓަރގައި ހުންނެވީ މިދިޔަ ހަފުތާގައި ކާމިޔާބު ކުރެއްވި ބައި-އިލެކްޝަނަށްފަހު، މޭކަރފީލްޑް ދާއިރާގެ މެމްބަރު ކަމުގެ ހުވާ ކުރެއްވުމަށެވެ.
އާ ލީޑަރަކު ހޮވުމަށް ވާދަވެރި އިންތިޚާބެއް ބާއްވަން ޖެހޭނެތޯ އަދި ސާފެއް ނުވެއެވެ. އެންޑީ ބާންހަމް ނޫން އެހެން ބޭފުޅަކު ކުރިމަތިނުލައްވާ ނަމަ، ޖުލައި 9 ގައި އޭނާ ޕާޓީގެ ލީޑަރުގެ މަގާމާ ހަވާލުވުމަކީ އެކަށީގެންވާ ކަމެކެވެ.