ގްރޫޕް ސްޓޭޖުގައި ރޭ ކުޅުނު ފޯރިގަދަ މެޗުތަކުން އެމެރިކާ އާއި މޮރޮކޯ މުހިންމު މޮޅެއް ހޯދައިފިއެވެ. ގްރޫޕް ޑީގައި ހިމެނޭ އެމެރިކާ އިން އޮސްޓްރޭލިއާގެ މައްޗަށް 2-0 ގެ ނަތީޖާއަކުން ކުރިހޯދިއިރު، ގްރޫޕް ސީގައި ހިމެނޭ މޮރޮކޯ އިން ވަނީ 1-0 އިން ސްކޮޓްލޭންޑް ބަލިކޮށްފައެވެ.
ކޯޗު ޕޮޗެޓީނޯގެ އިރުޝާދުގެ ދަށުން ކުޅުނު އެމެރިކާ ޓީމުން ވަނީ މުޅި މެޗު ޑޮމިނޭޓްކޮށްގެން ކުޅެފައެވެ. އެމެރިކާގެ ފުރަތަމަ ލަނޑަކީ އޮސްޓްރޭލިއާ އަތުން ބައިކޮޅަށް ވަން ލަނޑެކެވެ. އެމެރިކާގެ ފޯވާޑް ފޮލަރިން ބަލޮގުން ނެގި ހުރަހެއް އޮސްޓްރޭލިއާގެ ކެމަރަން ބާޖަސްގެ ގައިގައި ޖެހި ބައިކޮޅަށް ވަން މި ލަނޑާއެކު އެމެރިކާއަށް ކުރިލިބުނެވެ. އެ ޓީމުގެ ދެވަނަ ލަނޑު ފުރަތަމަ ހާފު ނިމުމުގެ ކުރިން ކާމިޔާބުކޮށްދިނީ އެލެކްސް ފްރީމަންއެވެ.
މޮރޮކޯ އާއި ސްކޮޓްލޭންޑް ބައްދަލުކުރި މެޗުގައި ފެނިގެންދިޔައީ ވަރަށް ވާދަވެރި ކުޅުމެކެވެ. މި މެޗުގެ ހަމައެކަނި ލަނޑު އަދި މި މުބާރާތުގައި މިހާތަނަށް ފެނުނު އެންމެ އަވަސް ލަނޑު މޮރޮކޯއިން ކާމިޔާބުކުރީ މެޗު ފެށިގެން އެންމެ 70 ސިކުންތުގެ ތެރޭގައެވެ. މި ލަނޑު އެ ޓީމަށް ކާމިޔާބުކޮށްދިނީ މިޑްފީލްޑަރު އިސްމާއިލް ސައިބަރީއެވެ.
މި މޮޅާއެކު އެމެރިކާ ވަނީ މުބާރާތުގެ ދެވަނަ ބުރަށް ދަތުރުކޮށްފައެވެ. މޮރޮކޯއަށް މި މޮޅަކީ ގްރޫޕް ސްޓޭޖުގައި ކުރިއަށް ދިއުމަށް ލިބުނު ވަރަށް މުހިންމު ތިން ޕޮއިންޓެވެ.