ގޯލްޑަން ފުޓްސަލް ޗެލެންޖުގައި މީދޫ ފުޓްސަލް ޓީމުން މި އަހަރުވެސް ނިންމާލަން ޖެހުނީ މާޔޫސްކަމާއެކުގައެވެ.ވިދިވިދިގެން ދެވަނަ އަހަރު މީދޫ ޓީމު މުބާރާތުން ކެޓި ގޮތަށް ބަލާއިރު، މައްސަލައަކީ ކުޅުންތެރިންގެ ހުނަރު ނޫންކަމާއި، މައްސަލައަކީ ދަނޑުން ބޭރުން ނިންމާ ނިންމުންތައްކަމަށް ބުރަވެވެ އެވެ.
މީދޫ ޓީމުން މުބާރާތަށް ތައްޔާރުވާން ފެށި ފުރަތަމަ އަހަރު، ތަޖުރިބާކާރު ގޯލްކީޕަރު ބަޓޭގެ އިރުޝާދުގެ ދަށުން ވަރަށް ކުރިން ފަރިތަކުރުންތައް ފެށިއެވެ. ނަމަވެސް މުބާރާތް ކައިރިވުމުން މާލެ ދިޔައީ ތަޖުރިބާކާރު ކޯޗެއް ނުވަތަ ވަރުގަދަ އޮފިޝަލް ބެންޗެއް ނެތިއެވެ. އެ އަހަރު މަރަދޫއާ އެއްވަރުވެ، ހިތަދޫ އަތުން ބަލިވި ނަމަވެސް، ގޯލުގެ ތަފާތުން ސެމީ ފައިނަލަށް ދަތުރުކުރިއެވެ. އެހެންނަމަވެސް ސެމީގައި ފޭދޫ އަތުން ބަލިވެ މުބާރާތާ ވަކިވާން ޖެހުނީއެވެ.
ދެވަނަ އަހަރުގެ ތަޖުރިބާ: ކުރިއެރުމުގެ ބަދަލުގައި ފަހަތަށް
މި އަހަރުގެ މުބާރާތަށް ނުކުތްއިރު ކަންތައްތައް އިތުރަށް ގޯސްވިއެވެ. ޓީމުގެ ސްކޮޑު ކުރީ އަހަރަށްވުރެ ވަރުގަދަ ނަމަވެސް، ކޯޗިން ތަޖުރިބާ ހުރި އެއްވެސް މީހަކު ޓީމާއެކު ނެތެވެ. މީދޫން މުބާރާތް ފެށީ ހުޅުދޫ އާއި ކޫޅެ 1-1 އިން އެއްވަރުވެގެންނެވެ. އޭގެ ފަހުން ހިތަދޫއާ ވާދަކޮށްވެސް ވީ އެއްވަރެވެ. ދެ ޕޮއިންޓާއެކު ސެމީއަށް ދަތުރުކުރި ނަމަވެސް، މަރަދޫ އަތުން 3-1 އިން ބަލިވެ މުބާރާތުން ކެޓީއެވެ.
ސަޕޯޓަރުންނާއި މުބާރާތް ބަލަން ތިބި މީހުންގެ ނަޒަރުގައި، ރަނގަޅު ޓެކްޓިކަލް އިރުޝާދާއި ބެންޗުގައި ތަޖުރިބާކާރު ބަޔަކު ތިބިނަމަ، މީދޫއަށް މި މެޗު ކާމިޔާބު ކުރެވުނީހެވެ. ދެ އަހަރުވެސް މީދޫ ޓީމަށް ކުރިމަތިވީ ހަމަ އެއް ނަތީޖާއެކެވެ. އަދި އުފެދެނީ ހަމަ އެއް ސުވާލުތަކެކެވެ.
މީދޫ ޓީމަކީ އަތޮޅު ޗެމްޕިއަންކަމަށް ވާދަކުރުމުގެ ފުރިހަމަ ހުނަރު ހުރި ޓީމެކެވެ. ނަމަވެސް މަދުވަނީ ރަނގަޅު ސްޕޯޓްސް މެނޭޖްމަންޓާއި، ތަޖުރިބާކާރު ކޯޗިން އޮފިޝަލުންނާއި އަދި ކުރިއާލާ ރޭވުންތެރިކަމާއެކު ތައްޔާރުވުމެވެ. މި ދާއިރާގެ ފަންނީ މީހުންގެ އެހީތެރިކަމާއި، ކައުންސިލްގެ ފުރިހަމަ އެއްބާރުލުން ލިބިގެން މެނުވީ މި ހާލަތު ބަދަލެއް ނުވާނެއެވެ.
"މީދޫއަކީ ފުރުސަތު އޮތް ޓީމެއް، ނަމަވެސް އެންމެ މުހިންމު ވަގުތު އެ ޓީމު އޮންނަނީ މިސްރާބެއް ނެތިފައެވެ." މިއީ ގިނަ ބައެއްގެ ކަންބޮޑުވުމެވެ.