އުރުގުއޭއަށް ނިސްބަތްވާ މަޝްހޫރު ފޯވާޑް ލުއިޒް ސުއަރޭޒްގެ ގައުމީ ޓީމުގެ ފަހު މެޗު، ދެކުނު އެމެރިކާ ވޯލްޑްކަޕް ކޮލިފައިންގައި އުރުގުއޭ އާއި ޕެރެގުއޭ ވާދަކުރި މެޗު އެއްވަރުވެއްޖެއެވެ.
ދެ ޓީމަށް ވެސް ގޯލު ޖަހާނެ ގިނަ ފުރުސަތުތަކެއް ލިބުނުނަމަވެސް އެއްވެސް ޓީމަކަށް ގޯލެއް ކާމިޔާބު ކުރެވޭ ގޮތެއް ނުވިއެވެ. މި މެޗުގައި ސުއަރާޒްއަށް ގޯލަކާއެކު ގައުމީ ޓީމުގެ ކެރިއަރު ނިންމާލަން ރަނގަޅު ފުރުސަތުތަކެއް ވަނީ ލިބިފައެވެ. އެހެން ނަަމަވެސް މީގެން އެއްވެސް ފުރުސަތެއްގެ ބޭނުން ހިފޭގޮތެއް ނުވިއެވެ.
އުރުގުއޭގެ ސެންޓެނާރިއޯ ސްޓޭޑިއަމްގައި ކުޅުނު މި މެޗު ދެ ޓީމުން ކުރެ އެއްވެސް ޓީމަކަށް ގޯލެއް ކާމިޔާބު ނުކުރެވި އެއްވަރު ވެގެން ނިމިފައިވާއިރު، މި މެޗުގައި އުރުގުއޭއަށް މިހާތަނަށް އެންމެ ގިނަ ގޯލު ޖަހައިދިން ސުއަރޭޒް ވަނީ ރަސްމީކޮށް ގައުމީ ޓީމަށް ކުޅުން ހުއްޓާލާފައެވެ. މީ ސުއަރޭޒް ގައުމީ ޓީމަށް ކުޅޭނެ އެންމެ ފަހު މެޗެވެ.
އުރުގޫއޭގެ ގައުމީ ޓީމަށް ސުއަރޭޒް ކުޅޭތާ ސަތާރަ އަހަރު ވެފައިވާއިރު، ގައުމީ ޓީމަށް މިހާތަނަށް 142 މެޗު ކުޅެދީފައިވެއެވެ. ސުއަރޭޒް މިހާތަނަށް 69 ގޯލު ކާމިޔާބުކޮށްދީފައިވާއިރު، މީ އުރުގުއޭގެ ތާރީހުގައި މިހާތަނަށް އެންމެ ގިނަ ގޯލު އެ ޓީމަށް ކާމިޔާބުކޮށްދީފައިވާ ކުޅުންތެރިޔާއެވެ.
2007 ވަނަ އަހަރުން ފެށިގެން އުރުގުއޭގެ ގައުމީ ޓީމަށް ކުޅެމުން އަންނަ ސުއަރޭޒް އަކީ 2010 ވަނަ އަހަރުގެ ފީފާ ވޯލްޑް ކަޕްގެ ސެމީ ފައިނަލުގައި ކުޅުނު އުރުގުއޭ ޓީމުގައި ވެސް މުހިންމު ދައުރެއް އަދާކޮށްފައިވާ ކުޅުންތެރިއެކެވެ. އަދި އޭގެ ޖެހިގެން އައި އަހަރު ކޮޕް އެމެރިކާ ފުޓްބޯޅަ މުބާރާތުގެ ޗެމްޕިއަންކަން ހޯދި އުރުގުއޭ ޓީމުގައި ވެސް ސުއަރޭޒް ވަނީ މުހިންމު ދައުރެއް އަދާކޮށްފައެވެ.
މި ލިޔުން ކިޔާލުމުން
